Ia anaana outou ei mau tiarama i roto i te ao nei

I ROTO i te hoê ao tei faainohia e te haavare i te pae morare e te peu tia ore, e tia i te mau kerisetiano mau na te ao atoa nei ia riro ei mau pu maramarama. E tia ia ratou ia riro ei tiarama i roto i te hoê ao poiri. (Philipi 2:15) E rave rahi tausani taata o te hinaaro nei e na reira ei mau pionie, oia hoi ei feia poro ma te taime taatoa. Ua rave te rahiraa i teie taviniraa e rave rahi mau matahiti e ua haamauruuruhia ratou i to ratou iteraa i te mau huru taata atoa i te tauiraa i to ratou oraraa no te riro mai ei mau pǐpǐ mau a Iesu Mesia.—Mataio 28:19.

No te faaitoito i teie mau pionie ia tamau â i roto i teie taviniraa moˈa e ia haamaitai i to ratou aravihi no te haapiiraa, ua faanaho te mau Ite no Iehova i te Haapiiraa no te Taviniraa Pionie. E haapiiraa teie no nia i te Bibilia e hoê ahuru mahana te maoro tei faaineinehia no te tauturu i te mau pionie i roto e toru tuhaa: te haereraa e o Iehova ei mau pǐpǐ na Iesu Mesia; te faatupu-rahi-raa i te here no te autaeaeraa taatoa; te anaanaraa ei mau tiarama i roto i teie nei ao.

Te Haapiiraa a te mau Pionie i Repubilita Afirika no Ropu

I Bangui, te oire pu o te Repubilita Afirika no Ropu, e 48 feia haapii e e 2 feia horoa i te haapiiraa o tei putuputu i te avaˈe atete 1991. E fanaˈo te feia haapii i te mau faaueraa e te mau manaˈo ohie no ta ratou ohipa. Eaha te vahi anaanatae no nia i teie pǔpǔ feia haapii no Bangui?

A tahi, e 21 o teie feia haapii o te haere noa râ i te fare haapiiraa. A haere noa ˈi ratou i te haapiiraa, ua manuïa ratou i te faanaho i ta ratou tabula ohipa no te rave i te taviniraa pionie tamau. Ua faaohipa ratou i ta ratou mau avaˈe faafaaearaa, ta ratou mau hopea hebedoma vata, e te mau avatea no te poro e no te horoa i te haapiiraa.

Ua ite teie mau taurearea i te faufaaraa ia tavini i to ratou Poiete i teie nei. (Koheleta 12:1; a faaau e te Korinetia 1, 7:29.) Mea anaanatae atoa ia tapao e e 12 o ratou aita to ratou mau metua to roto i te parau mau. O ratou anaˈe to roto i te parau mau i te fare. E piti taurearea tamaroa, e taeae hoi raua, o tei faahepohia e to raua metua tane ia faarue i te fare no to raua faaroo. Ua farii aˈera te hoê tane e te hoê vahine i teie nau taurearea i to raua fare.

E ere hoê â huru no Michée e o Sulamithe Kaleb. E pionie raua toopiti atoa ra e te haere atoa ra raua i te haapiiraa, e mau Ite no Iehova râ to raua mau metua. Inaha, e taata haapii atoa to raua metua tane i roto i taua pǔpǔ feia haapii ra!

Ua apiti atoa mai te mau amuiraa no Bangui i roto i te haapiiraa, na roto râ i te tahi atu ravea. Ua hopoi mai ratou i te mea materia, mai te maa. Ua afaihia mai te moni, e te moa, te tihota, te raiti, e te maniota no te faaamu i te pǔpǔ feia haapii.

Ua faanahohia te mau pǔpǔ tunu maa e te mau amuiraa fatata mai no te faaineine i te maa ohie e te au. Ua tui te roo o te Repubilita Afirika no Ropu no te ngunza, te hoê maa au-roa-hia. Eaha to roto? Te mau rauere maniota, te hinu haari, te oniani, te rea papaa, te tahi maa pata aratita, e te faaoromai no te tiai e ia ama pauroa. Mea taa ê te tunuraa a te pǔpǔ tunu maa tataitahi. Ua manuïa teie ohipa; eita hoê e mairi i te amu i teie maa.

I rapaeau ia Bangui, e piti pǔpǔ ê atu o tei faatupuhia, hoê i Bouar e te tahi i Bambari, e ia amuihia te taatoaraa e 68 ïa feia haapii. I roto i na matahiti e piti i mairi aˈenei, ua ite te Repubilita Afirika no Ropu i te hoê maraaraa o te numera o te mau pionie. I roto i te avaˈe tenuare 1992, e 149 pionie tamau e e 17 pionie taa ê e tae noa ˈtu e 78 pionie tauturu. Ua faatupu te reira i te hoê ohipa rahi atu â i roto i te fenua taatoa e te mau numera teitei apî i te pae no te feia poro, te mau hora, te mau hoˈi-faahou-raa e farerei, e te mau haapiiraa bibilia. Ia rahi atu â te feia rave ohipa, e rahi atoa te auhune.—Isaia 60:21, 22; Mataio 9:37, 38.

Te haamauruuru nei tatou i te Atua ra o Iehova no teie mau faanahoraa atoa e no ta ˈna faanahonahoraa i nia i te fenua o te faaineine nei i teie mau pǔpǔ feia haapii. Te tauturu nei te reira i te feia haapii e te feia horoa i te haapiiraa ia anaana ei mau tiarama i roto i teie nei ao poiri.

[Hohoˈa i te api 24]

Piti ahuru ma hoê feia i te haapiiraa pionie o te haere noa râ i te fare haapiiraa tuarua

[Hohoˈa i te api 25]

Ua faarue teie e piti taurearea i te fare no te parau mau