Te titau mau ra anei te huitaata nei i te hoê Mesia?

“TE TITAU NEI TE AO NEI I TE HOÊ MESIA, E PARAU TEIE NA TE HOÊ TAATA TOROA”

Ua papaihia teie nei upoo parau i roto i te vea The Financial Post no Toronto, i Kanada, i te matahiti 1980 ra. Taua taata toroa ra, o Aurelio Peccei ïa, e peretiteni e e taata haamau o te hoê pǔpǔ feia aravihi tuiroo piihia Pǔpǔ no Roma. Ia au i te vea Post, te tiaturi ra o Peccei e “e riro te hoê raatira tiaraa mana—i te pae aivanaa, i te pae politita, aore ra i te pae faaroo—ei ravea hoê roa no te faaora i te ao nei i te mau tauiraa i te pae totiale e i te pae faanavairaa faufaa o te haamǎtaˈu nei i te haamou i te iho o te nunaa.” Eaha to outou manaˈo? Tei roto mau anei teie nei ao i te hoê tupuraa atâta e titau ai te huitaata nei i te hoê Mesia? E hiˈo anaˈe na hoê noa o te mau fifi e faaruruhia nei e teie nei ao—te poia.

TE HIˈO noa maira e piti mata maereere araara maitai ia outou i nia i te hohoˈa o te hoê vea. E mata tamarii teie, no te hoê tamahine iti aita paha i naeahia i te pae matahiti. Teie râ, eita outou e ataata ia hiˈo atu outou i to ˈna mata. Aita hoi e anaana ra i te ieie o te tamarii, aita e maere ra i te oaoa, aita atoa e tiaturi to roto. Ua î roa râ i te mauiui o te ahoaho, te peapea hohonu, e te poia rahi. Te pohe ra teie tamarii i te poia. Te mauiui e te poia, te reira anaˈe ta ˈna i ite.

Peneiaˈe, mai te rahiraa o te taata, eita outou e au i te mataitai maoro i teie mau hohoˈa, e e huri oioi noa outou i te api. E ere no te mea e aita outou e tâuˈa ra, teie râ, te huru ê nei outou no te mea te taa ra ia outou e ua maoro roa no teie tamahine iti. Ua riro te mau melo pararai roa e te opu tei oru roa ei mau tapao e ua haamata ê na to ˈna tino i te haapau ia ˈna iho. I te taime outou e hiˈo ai i to ˈna hohoˈa, eita e ore e ua pohe ê na oia. Te mea ino roa ˈtu â, ua ite outou e e ere o o ˈna anaˈe.

Eaha te aanoraa o te fifi? Inaha, e nehenehe anei ta outou e feruri e e 14 mirioni tamarii? Aita te rahiraa o tatou e nehenehe; mea rahi roa hoi teie numera ia maraa ia tatou ia feruri. I teie nei, a rave na i te hoê tahua taaro e 40 000 parahiraa. A feruri na i teie nei e ua î roa oia i te tamarii—tera anairaa parahiraa i muri aˈe i te tahi, tera tuhaa i muri aˈe i te tahi, e mata tamarii anaˈe. Mea fifi atoa ia feruri i te reira. E titauhia ïa e 350 tahua mai teie te huru tei î roa i te tamarii ia naeahia e 14 mirioni. Ia au i te UNICEF (Faufaa a te mau Nunaa Amui no te tamarii), te reira te numera riaria o te mau tamarii i raro mai i te pae matahiti o te pohe nei i te navai ore o te maa e i te mau maˈi e nehenehe hoi e rapaau-ohie-hia i te mau matahiti atoa i roto i te mau fenua veve i te pae faanavairaa faufaa. Oia hoi fatata hoê tahua taaro e tamarii to roto o te pohe nei i te mau mahana atoa! A amui atu i te numera o te feia paari e poia ra, e naeahia ïa te numera taatoa na te ao nei e hoê miria taata o te erehia nei i te maa.

Eaha te tumu o te poia rahi?

Te faatupu nei teie palaneta hau atu i te faito maa e amuhia nei e te taata, e e nehenehe ta ˈna e faatupu hau atu â. Teie râ, i te mau minuti atoa, e 26 tamarii o te pohe nei i te ereraa i te maa e te maˈi. I roto i taua noâ minuti ra, te haamâuˈa nei te ao nei fatata e 2 000 000 dala marite no te faaineine i te tamaˈi. E nehenehe anei outou e feruri i ta teie rahiraa moni—aore ra te tahi noa maa tuhaa iti—e nehenehe e rave no teie e 26 tamarii?

Oia mau, eita te oˈe na te ao nei e nehenehe e parihia i nia i te ereraa i te maa aore ra i te moni. Mea hohonu roa ˈtu â te fifi. Mai ta Jorge E. Hardoy, te hoê orometua haapii no Raparata, e faaite ra, “te erehia ra te taatoaraa o te ao nei i te ravea no te tufa i te maitairaa, te puai, te taime, te mau faufaa e te ite e te feia e titau rahi nei i teie mau mea.” Te fifi, e ere ïa tei roto i te mau ravea a te taata, tei roto râ i te taata iho. E au ra e ua riro te nounou e te miimii ei mau puai e faatere nei i te totaiete taata nei. Te fanaˈo nei te afaraa feia moni roa ˈˈe o te huiraatira o te fenua e 60 taime rahi aˈe i te mau taoˈa e te mau faufaa i te tahi atu afaraa veve roa ˈˈe.

Parau mau, te haa nei vetahi i te faatae atu i te maa na te feia e pohe nei i te poia, te haafifihia nei râ te rahiraa o ta ratou mau tutavaraa e te mau tumu aore e vî ia ratou. Mea pinepine te oˈe i te tairi i te mau fenua e roohia ra i te tamaˈi tivila aore ra te orureraa hau, e e ere i te mea varavara ia tapea te mau puai enemi ia tapae atu te mau tauturu i te feia e erehia ra. Te mǎtaˈu nei hoi na pae e piti e ia vaiihohia te maa ia tapae atu i te feia tivila e poia ra i roto i te fenua enemi, te faatamaa ra ïa ratou i to ratou mau enemi. Te faaohipa atoa nei te mau faatereraa i te haapoiaraa i te taata ei mauhaa politita.

Aita anei e ravea?

Tera râ hoi, ua riro noa te mau mirioni taata pohe poia, ei hoê anaˈe o te mau ati e tairi nei i te taata i teie nei tau. Te haamouraa e te viiviiraa o te natura e parare noa ˈtura, te ati tamau o te tamaˈi e haapohe nei i te mau mirioni taata, te uˈanaraa o te taparahiraa taata o te faatupu i te mehameha e te tiaturi ore na te mau vahi atoa, e te huru morare e topa noa ˈtura o tei riro ei tumu no te rahiraa o teie mau fifi—te tahoê nei teie mau ati atoa o te ao nei no te haapapu i teie parau mau—eita te taata e nehenehe e faatere ia ˈna iho ma te manuïa.

Eita e ore e tera te tumu aita e rave rahi mau taata e tiaturi faahou ra e te vai ra te hoê ravea no te mau fifi o te ao nei. Te manaˈo nei vetahi mai ia Aurelio Peccei, te taata ite Italia i faahitihia i te omuaraa o te tumu parau. Mai te peu e te vai ra te hoê ravea, i to ratou ïa feruriraa, no ǒ mai ïa i te hoê pu faahiahia roa—peneiaˈe tei hau aˈe i te taata nei. Ua ume puai ïa te parau no te hoê mesia i te manaˈo. Teie râ, mea papu anei ia tiaturi i te hoê mesia? Aore ra, ua riro noa anei teie tiairaa ei moemoeâ?

[Faaiteraa i te fatu o te hohoˈa i te api 2]

Hohoˈa rapaeau: I nia: U.S. Naval Observatory photo; I raro: NASA photo

[Faaiteraa i te fatu o te hohoˈa i te api 3]

WHO photo a P. Almasy

[Faaiteraa i te fatu o te hohoˈa i te api 4]

WHO photo a P. Almasy

U.S. Navy photo