Te faatia ra te feia poro i te Basileia

E faaroo te mau mamoe a Iesu i to ˈna reo

A PARARE ai te pororaa na te fenua atoa nei, te aratai nei Iehova na roto i ta ˈna mau melahi i ta ˈna mau tavini i te feia e au i te mamoe ra. E faaroo ratou i te reo o Iesu e e haapii ratou i te tavini ia ˈna ma te titau i te ora mure ore. Ua parau o Iesu i roto i te Ioane 10:27, 28: “E faaroo mai ta ˈu ra mamoe i to ˈu reo, . . . ua ite au ia ratou, e e pee mai hoi ratou ia ˈu. E e horoa ˈtu â hoi au i te ora mure ore no ratou.” A hiˈo na e mea nafea te feia aau mehara i Madagascar i te faarooraa i te reo o Iesu.

Ua horoa te hoê Ite no Iehova i te mau buka E nehenehe oe e ora e a muri noa ˈtu i roto i te paradaiso i nia i te fenua nei e Nafea ia fanaˈo i te taurearearaa (farani) na te taote o tei haere mai e hiˈo i to ˈna metua tane o tei maˈihia.

E Porotetani taua taote nei e mea patoi roa oia i te mau Ite, ua taio râ oia i te buka e ua maimi oia i te mau irava i roto i ta ˈna Bibilia. Ua taio ta ˈna vahine, e Katolika e e taote atoa oia, i te buka e rave rahi taime no te mea ua parau oia e mai te mea ra e ua papai-taa-ê-hia teie buka no ˈna. Ua putapû roa raua toopiti atoa ra i te tatararaa niuhia i nia i te Bibilia a te Taiete no nia i te auraa o te matahiti 1914. Ua haere atura te tane e farerei i te Ite o tei horoa mai i te mau buka. Ua horoa ˈtura te Ite i te buka Nohea mai te ora—Mea tupu noa mai aore ra mea poietehia? e ua rave ihora i te mau faanahoraa no te haere e hiˈo ia raua ta ˈna vahine no te pahono i ta raua mau uiraa. I to ˈna haereraa ˈtu e hiˈo ia raua, ua haamata ˈtura oia i te hoê haapiiraa bibilia tamau e o raua e ta raua e toru tamarii. Ua haere oioi noa ˈtura to ratou ite no nia i te Bibilia i mua.

I muri aˈe i te haapiiraa matamua, ua haere mai te utuafare taatoa i te mau putuputuraa i te Piha no te Basileia e i muri iho ua tapao aˈera ratou i to ratou iˈoa i te Haapiiraa no te taviniraa teotaratia. Ua maitai roa mai te haerea o te mau tamarii. Na roto i ta ratou haapiiraa bibilia, ua haapii ratou e e ere te faatupuraa i te oroa fanauraa e te tahi atu mau oroa faaroo i te mea kerisetiano; no reira, aita ˈtura ratou i haapao faahou i te reira. Ua patoi te tane i te horoa i to ˈna toto no te hoê fetii, noa ˈtu e aitâ taua tumu parau ra i tuatapapahia ˈtura i roto i ta ratou haapiiraa bibilia. I muri iho, ua tatara maira oia i ta ˈna ahu karate i te vahi vairaa ahu; ua afai atura oia i te taata nira ahu no te hamani i te ahu no ta ˈna mau tamarii. Ua tutui oia i ta ˈna mau vea e ta ˈna mau buka atoa no nia i te mau tatararaa fetia i te auahi. E toru noa avaˈe i muri aˈe i to ratou haamataraa i te haapii, ua tatara ihora te tane e te vahine i to raua iˈoa i roto i ta raua mau ekalesia e ua faaite aˈera i to raua hinaaro e apiti i roto i te pororaa. Ua bapetizohia raua i teie nei.

◻ Ua imi noa te hoê vahine no Thaïlande i te parau mau. Noa ˈtu e e faaroo Bouddha ta ˈna, aita o ˈna i faaohipa i ta ˈna haapaoraa no te mea ua ite oia i te haavare e te nounou rahi. Hau atu, e rave rahi mau peu mea fifi roa na ˈna ia farii. Ua ravai roa o ˈna.

Ua parau maira te hoê vahine e faaea ra i to ˈna vahi e ia tamata oia i te mau kerisetiano e ua afai atura ia ˈna i te hoê fare pure a te faaroo Penetekose. Teie râ, i te taime pureraa, ua hinaaro aˈera teie vahine e hoˈi i te fare no te maniania, no te mea te pure ra te feia atoa i tia mai i reira ma te reo puai. Aita o ˈna i hoˈi faahou atu i taua fare pure ra.

I muri iho, ua tamata ˈtura oia i te Ekalesia Katolika Roma. Tera râ, i muri aˈe i to ˈna haereraa e rave rahi taime, ua ite faahou atura oia i te haavare e te nounou, e tae noa ˈtu te oraraa moni rahi o te perepitero. Ua inoino roa o ˈna e aita ˈtura o ˈna i haere faahou atu i reira. Ua hinaaro te perepitero e ite e no te aha oia i faarue mai ai. I to ˈna iteraa i te tumu, ua parau atura oia ma te faaooo e: “Mai te peu e te hinaaro ra oe e farerei i te mau taata haerea afaro, a haere atu ïa i ǒ te mau Ite no Iehova.” Ua ani atura o ˈna: “Teihea roa ratou?” Ua pahono maira te perepitero e: “Tei pihai iho ratou i te fare opereraa pape.” I te poipoi aˈe, ua haere atura oia e imi ia ratou e aita i itehia mai. Ma te paruparu, ua manaˈonaˈo noa ihora oia i te mau Ite no Iehova.

I te hoê mahana, ua faaroo atura oia i te hoê o to ˈna mau taata e faaea ra i pihai iho mai, i te faaoooraa ˈtu i te tahi taata: “Eita e maoro e riro atoa mai oe ei Ite no Iehova!” I to ˈna faarooraa i teie parau, ua horo atura te vahine i taua taata ra e ua ani atura: “Te vai ra anei te mau Ite no Iehova na ǒ nei?” “E,” o te parau ïa i pahonohia mai. “E haere mai vetahi e poro na te mau fare na ǒ nei. Mea ohie roa ia ite ia ratou na nia i to ratou mau ahu mâ e te faanehenehe maitai.” Ua horo atura oia no te imi ia ratou. I te omuaraa, aita o ˈna i ite ia ratou, i to ˈna râ hoˈiraa ˈtu i to ˈna fare, ua ite atura oia e piti vahine faanehenehe-maitai-hia e tauaparau ra e te tahi taata. Ua tapiri atura oia i pihai iho ia ratou e ua ani atura mai te peu e e Ite no Iehova raua. I to ratou faaiteraa mai e oia, ua taparu atura oia: “A haere mai i to ˈu fare. Te hinaaro nei au e paraparau ia outou.”

Ua haamatahia ˈtura te hoê haapiiraa bibilia, e noa ˈtu te patoiraa e te mau faaoooraa a to ˈna mau fetii, ua haamata teie vahine i te haere mai i te mau putuputuraa e i te faaite i te poroi i to ˈna mau fetii.

Ua ite mau â o Iesu i ta ˈna mau mamoe e te haaputuputu ra oia ia ratou i roto i ta ˈna faanahonahoraa no te ora ˈtu i roto i te ao apî parau-tia.