Te tatararaa a Paulo e ta Platon no nia i te tia-faahou-raa
UA PAPAI te aposetolo Paulo no nia i te tia-faahou-raa i roto i te Korinetia 1, 15:35-58 e te Korinetia 2, 5:1-10. Ia ˈna i papai, ua pee anei oia i te mau manaˈo o Platon e to te mau philosopho Heleni no nia i te nephe pohe ore, aore ra ua tuea anei ta ˈna faataaraa e te haapiiraa a Iesu e te toea o te mau Papai?
Te horoa ra te buka iti Pohe-ore-raa o te nephe aore ra Tia-faahou-raa o te taata: Te manaˈo o Paulo Peata ma te faahiti taa ê ia Platon (beretane), papaihia i te matahiti 1974 e tei fariihia e te arii epikopo no te Ekalesia Tumu Heleni no Marite Apatoerau e Apatoa, i te hoê pahonoraa anaanatae roa. I muri aˈe i te tatararaa i te huru o te tia-faahou-raa i roto i te mau irava i faahitihia i nia nei e te mau manaˈo heleni o taua tau ra, teie te faaotiraa i noaa mai i te taata papai i teie buka iti:
“Te haapii ra o Platon e e tamau noa te nephe i te hoê oraraa hopea ore e te mure ore, taa ê atu i te tino. No Platon, ua riro te pohe-ore-raa ei huru iho e fatuhia ra e te nephe . . . Aita o Paulo Peata i haapii i teie manaˈo e aita atoa oia i faahiti i te reira . . .
“Aita te aposetolo Paulo e tuatapapa ra no nia i te pohe-ore-raa o te huru aore ra te iho taata ei mau tuhaa taa ê e te taa maitai, ua tuatapapa râ oia i te tia-faahou-raa o te taatoaraa o te nephe-feruriraa e te tino amuihia o te taata ia au maite i te tia-faahou-raa o te Mesia. Aita te hiˈoraa o Paulo no nia i te tia-faahou-raa e tuea ra e te faaora-faahou-raa o te mau tino pohe mai roto mai i te menema.
“Mea papu aˈe ia faataa i to ˈna hiˈoraa no nia i te tia-faahou-raa mai te tauiraa, te poiete-apî-raa, e te hamani-faahou-raa, na roto i te mana o te Atua, i te taatoaraa o te taata, taua taata noa nei â, o to ˈna huru, to ˈna tino e to ˈna feruriraa taatoa, oia hoi te taata maoti to ˈna mau aravihi i te pae no te tino e no te feruriraa. E tupu to tatou tia-faahou-raa i mua nei, eiaha na nia i to tatou iho tiaraa, teie râ, ei ô hau aˈe a te Atua.”
Oia mau, e ere te pohe-ore-raa i te hoê taoˈa fatuhia e te taata. Ua riro râ oia ei ô faufaa e te faito ore no ǒ mai ia Iehova na roto i to tatou Fatu o Iesu Mesia na te mau melo o te amuiraa kerisetiano faatavaihia.—Korinetia 1, 15:20, 57; Philipi 3:14.
[Hohoˈa i te api 9]
Te philosopho heleni o Platon
[Faaiteraa i te tumu]
Hohoˈa Vatican Museum