Ua riro mau anei te Bibilia ei ô no ǒ mai i te Atua?
“TE TIATURI nei au e ua riro te Bibilia ei ô faahiahia roa ˈˈe ta te Atua i horoa mai na te taata.” Na Abraham Lincoln i faahiti i teie mau parau, o ˈna te 16raa o te peretiteni o te mau Hau amui no Marite.a E ere o ˈna anaˈe o tei faaite i to ˈna mauruuru no teie buka tahito roa.
Teie ta te hoê tia no te hau beretane o te senekele 19, o William E. Gladstone, i parau: “Ua tapaohia te Bibilia e te hoê Tumu taa ê, e aita oia e nehenehe e faaauhia i te tahi atu mau buka.” Ia au i teie manaˈo, ua parau te tia no te hau marite o te senekele 18 ra o Patrick Henry e: “Ua hau aˈe te Bibilia i te mau buka atoa i piahia.” No to ˈna maere i mua i te mau Papai, ua faaite te emepera farani ra o Napoléon Bonaparte e: “E ere te Bibilia mai te tahi atu mau buka, e mea ora râ oia, e e mana to ˈna no te upootia i nia i te mau mea atoa e patoi mai ia ˈna.”
No vetahi pae, ua riro te Bibilia ei pu e noaa mai ai te tauturu e te tamahanahanaraa. Ua parau te tenerara a te Nuu amui marite o Robert E. Lee e: “I roto i to ˈu mau hepohepo e to ˈu mau haapeaparaa atoa, aita te Bibilia i mairi i te horoa mai na ˈu i te maramarama e te puai.” E no to ˈna mauruuru no teie nei buka, ua parau te peretiteni marite ra o John Quincy Adams e: “E rave rahi mau matahiti i teie nei to ˈu taioraa i te Bibilia taatoa hoê taime i te matahiti.”
Mai te peu e ua horoa mai Tei hau aˈe i te teitei i te Bibilia na te taata nei, te vai ra ïa te mau haapapuraa e ua faauruahia mai oia e te Atua. E hau aˈe ïa oia i te faahiahia i te tahi atu mau buka. E ia nehenehe te Bibilia e riro ei pu mau no te puai e te haapiiraa, e tia ia ˈna ia riro ei buka tiaturihia. Teie ïa te uiraa, Ua riro mau anei te Bibilia ei ô no ǒ mai i te Atua? E imi anaˈe na i te pahonoraa i teie nei uiraa.
[Nota i raro i te api]
a Parau mau, te vai ra te tahi ô faahiahia roa ˈtu â—oia hoi o Iesu Mesia.—Ioane 3:16.
[Hohoˈa i te api 3]
William. E. Gladstone
[Faaiteraa i te tumu]
U.S. National Archives photo
Abraham Lincoln
[Faaiteraa i te tumu]
U.S. National Archives photo
Patrick Henry
[Faaiteraa i te tumu]
Harper’s U.S. History
Napoléon Bonaparte
[Faaiteraa i te tumu]
Drawn by E. Ronjat
John Quincy Adams
[Faaiteraa i te tumu]
Harper’s U.S. History
Robert E. Lee
[Faaiteraa i te tumu]
U.S. National Archives photo