Te faaroo maira anei te Atua ia pure anaˈe outou?
E FAAOTI te hoê paoti ohipa mai te peu e e horoa ˈtu oia i te tahi hopoia na te tahi taata aore ra na ˈna iho e haapao i te reira. Oia atoa, te vai ra i te Arii Mana hope o te ao taatoa nei te maitiraa ia faataa oia i ta ˈna iho tuhaa e rave i roto i te tahi ohipa. Te faataa ra te mau Papai e ua maiti te Atua e na ˈna iho e haapao i ta tatou mau pure e te faaue maira oia ia pure atu tatou ia ˈna.—Salamo 66:19; 69:13.
Te faaite ra te maitiraa a te Atua i roto i teie nei ohipa i to ˈna anaanatae i te mau pure a te mau taata e tavini ra ia ˈna. Maoti i te tapeapea i to ˈna mau taata ia haafatata ˈtu ia ˈna ma to ratou feruriraa atoa e ma to ratou manaˈo hohonu atoa, te faaitoito nei oia ia ratou i te na ôraa e: “Eiaha e tuutuu i te pure,” “[a] tamau uˈana maite â i te pure,” “e tuu oe i ta oe hopoia ia Iehova ra,” “e huri i to outou ahoaho atoa i nia [i te Atua].”—Tesalonia 1, 5:17; Roma 12:12; Salamo 55:22; Petero 1, 5:7.
Mai te peu e aita te Atua i hinaaro e horoa i te tariˈa faaroo i te mau pure a ta ˈna mau tavini, eita ïa o ˈna e faanaho i teie ravea no te paraparau ia ˈna e e faaitoito ia faaohipa i te reira ma te ore e haamarirau. Teie ïa, oia hoi to te Atua maitiraa e vaiiho i to ˈna mau taata ia haafatata mai ia ˈna, te hoê tumu e tiaturi ai tatou e te faaroo mau ra oia. Oia, te haapao maira o ˈna i te mau pure tataitahi a ta ˈna mau tavini.
Eiaha ia moehia i te mea ra e te faaite papu ra te Bibilia e te faaroo ra te Atua i te pure. Ei hiˈoraa, teie ta te aposetolo Ioane i papai: “Teie taua taiâ ore no tatou i noaa ia ˈna ra, ia ani noa ˈtu tatou i te mau mea atoa i au ia ˈna ra, te faaroo maira ïa oia ia tatou.” (Ioane 1, 5:14) Te faahiti ra te Arii ra o Davida i te Atua ra o Iehova mai “Tei faaroo i te pure ra” e te faaite ra oia ma te tiaturi e: ‘E faaroo oia i to ˈu reo.’—Salamo 55:17; 65:2.
Mea papu maitai e te vai ra te mau haamaitairaa ia pure anaˈe tatou, te faaite nei râ te mau Papai e mea hau atu â te mea e titauhia ia pure anaˈe te hoê taata parau-tia. Te faaroo maira te hoê taata. E taua taata faaroo ra, o te Atua ïa.—Iakobo 5:16-18.
Te mau pure o tei faaroohia i te matamua ra
Te faahiti ra te Bibilia e rave rahi mau aamu no nia i te mau taata tei faaroohia ta ratou pure e ua pahonohia mai e te Atua. Te haapapu maitai ra to ratou hiˈoraa e ua hau atu te mau haamaitairaa a te pure i te tamǎrûraa e noaa mai na roto i te haamaramaramaraa e te faaiteraa i to ˈna mau manaˈo. Aita noa i taotiahia i te mau tutavaraa a te hoê taata no te ohipa ia au i ta ˈna mau pure.
Ei hiˈoraa, i te taime a faatupu ai o Abasaloma i te hoê opuaraa ino no te haru i te tiaraa arii i nia ia Iseraela, ua pure aˈera te Arii ra o Davida e: “E Iehova e, . . . e faariro oe i te aˈo a Ahitophela [te taata aˈo a Abasaloma] ei maamaa.” E ere teie i te aniraa haihai, inaha “o taua aˈo a Ahitophela i aˈo maira, riro atura mai te mea e ui na i te parau a te Atua: o te huru atoa ïa i taua mau aˈo a Ahitophela ra.” Ua patoi atura o Abasaloma i te opuaraa a Ahitophela no te faataahuri i te Arii ra o Davida. Eaha te tumu? “Ua opuahia e Iehova e, e faaore i taua parau maitai a Ahitophela, ia roohia mai â Abasaloma e te ino ia Iehova ra.” Ma te papu maitai, ua faaroohia te pure a Davida.—Samuela 2, 15:31; 16:23; 17:14.
Oia atoa, i to Hezekia taparuraa i te Atua ia faaora ia ˈna i to ˈna maˈi pohe, ua ora mai oia. Ua ora mai anei oia na roto noa i te puairaa o te feruriraa i muri aˈe i to Hezekia faahitiraa i te hoê pure? Aita roa ïa! Teie hoi te poroi ta Iehova i faatae atu ia Hezekia na roto i te peropheta ra o Isaia: “Ua faaroo vau i ta oe pure, ua ite au i to oe roimata: e inaha, e faaora vau ia oe.”—Te mau arii 2, 20:1-6.
Ua haapapu te hoê melahi a Iehova ia Daniela, tei pahonohia ta ˈna pure te hoê taime maoro aˈe i ta ˈna i manaˈo na, e: “Ua faaroohia ta oe i ani.” Ua pahonohia te mau pure a te tahi atu feia, mai ia Hana, te mau pǐpǐ a Iesu, e te raatira faehau ra o Korenelio, na roto i te mau ravea o te ore e nehenehe e parauhia e mea na roto anaˈe i te mana taata nei. No reira, te haapapu maitai ra te Bibilia e te mau pure o te au maite i te hinaaro o te Atua, e fariihia ïa, e faaroohia, e e pahonohia e te Atua.—Daniela 10:2-14; Samuela 1, 1:1-20; Ohipa 4:24-31; 10:1-7.
Mea nafea râ te Atua ia pahono i te mau pure a to ˈna mau tavini haapao maitai i teie mahana?
Te mau pahonoraa i te mau pure
Ua pahonohia te mau pure i faahitihia i nia nei na roto i te mau ravea puai, oia hoi te mau semeio. A haamanaˈo râ e, i te mau tau bibilia atoa, i roto i te mau tupuraa pinepine roa ˈˈe, e ere te mau pahonoraa i te mau pure mai teie te papu. No te mea hoi e ua riro ratou ei ravea no te horoa i te puai i te pae morare e te maramarama, ia nehenehe te mau tavini a te Atua e tapea i te haerea parau-tia. No te mau kerisetiano iho â râ, ua pahonohia te mau pure no nia i te mau ohipa i te pae varua, eiaha râ te mau ohipa rarahi e te puai.—Kolosa 1:9.
Eiaha ïa e haaparuparu mai te peu e eita ta outou mau pure e pahono-noa-hia mai ta outou e tiai ra aore ra mai ta outou e hinaaro ra. Ei hiˈoraa, maoti i te faaore i te hoê tamataraa, peneiaˈe e maiti te Atua i te horoa mai na outou i ‘te mana tei hau aˈe i tei matauhia’ no te faaoromai. (Korinetia 2, 4:7; Timoteo 2, 4:17) Eiaha roa ˈtu tatou e faaiti i te faufaa o teie puai, e eiaha atoa tatou e manaˈo e aita Iehova e pahono ra i ta tatou mau pure.
A rave na i te hiˈoraa o te Tamaiti iho a te Atua, o Iesu Mesia. No to ˈna tapitapi eiaha e pohe ei taata hiˈoraa faaino, ua pure aˈera Iesu e: “E tau Metua, ia tia ia oe ra, e hopoi ê atu i teie nei aˈua.” Ua faaroo anei te Atua i ta ˈna pure? Oia mau, mai ta te Hebera 5:7 e haapapu ra. Aita o Iehova i haapae i ta ˈna Tamaiti i te titauraa ia pohe i nia i te pou haamauiuiraa. Area ra, “ua fa maira te hoê melahi no te raˈi mai, ua faaitoito maira ia ˈna.”—Luka 22:42, 43.
E pahonoraa puai, e semeio anei teie? Ia au i to tatou hiˈoraa, oia mau ïa! Area no te Atua ra o Iehova, te pu o taua mana ra, e ere ïa i te hoê semeio. Ua matau o Iesu, i roto i to ˈna oraraa na mua ˈtu i nia i te raˈi, i te mau tupuraa i te matamua ra i reira te mau melahi i te faraa ˈtu i te mau taata. Eita ïa te faraa mai o te hoê melahi e haaputapû ia ˈna mai ia tatou nei. Noa ˈtu râ, ua tauturu teie melahi, o ta Iesu hoi i matau maitai i to ˈna oraraa na mua ˈˈe i To ˈna riroraa mai ei taata, no te haapuai Ia ˈna i mua te tamataraa e tupu a muri aˈe.
Ia pahono anaˈe oia i te mau pure a to ˈna mau tavini haapao maitai i teie mahana, mea pinepine Iehova i te horoa i te puai e titauhia ra no te faaoromai. E nehenehe teie turu e itehia na roto i te faaitoitoraa no ǒ mai i te tahi feia haamori o ta tatou e amuimui atu. E tano anei ia tatou ia patoi atu i taua faaitoitoraa nei, peneiaˈe ma te manaˈo e aita to tatou mau hoa kerisetiano i farerei i te hoê â tamataraa, e eita ïa e tia e na ratou e tauturu mai ia tatou nei? E nehenehe hoi o Iesu e faaohipa atoa i teie huru manaˈo i mua i te melahi o tei fa mai ia ˈna. Maoti râ, ua farii oia i te faaitoitoraa mai te pahonoraa a Iehova i ta ˈna ra pure e no reira ua nehenehe atura oia e faatupu i te hinaaro o to ˈna Metua ma te haapao maitai. E tano atoa ïa ia farii tatou ma te mauruuru i te puai ta te Atua e horoa maira ei pahonoraa i ta tatou mau pure. A haamanaˈo atoa e mea pinepine teie mau tau faaoromairaa tamau i te apeehia e te mau haamaitairaa rahi.—Koheleta 11:6; Iakobo 5:11.
A tiaturi e te faaroo maira te Atua
Eiaha outou ia erehia i te tiaturi i te aravihi o te pure mai te peu e eita outou e pahonohia i reira iho. E nehenehe te mau pahonoraa i te tahi mau pure, mai te aniraa ia tamǎrûhia te hoê taata i te hepohepo aore ra i te hopoia rahi aˈe i roto i ta ˈna taviniraa i te Atua, e tiai i te taime tano roa ˈˈe e te maitai aˈe ia au i te hiˈoraa o te Atua. (Luka 18:7, 8; Petero 1, 5:6) Mai te peu e te pure ra outou no nia i te hoê haapeapearaa hohonu, a faaite atu i te Atua na roto i te tuutuu ore e e hinaaro uˈana to outou, e e tumu viivii ore e te haavare ore atoa. Ua faaite o Iakobo i teie huru manaˈo ia ˈna i parau, i muri aˈe i to ˈna aro-uˈana-raa e te hoê melahi, e: “Ia ore oe ia haamaitai mai ia ˈu nei, e ore au e tuu ia oe.” (Genese 32:24-32) E tia atoa ia tatou ia tiaturi e mai te peu e e tamau noa tatou i te ani, e noaa mai te haamaitairaa i te tau tano ra.—Luka 11:9.
Teie te tahi manaˈo hopea. Te horoa maira te Arii Mana hope o te ao taatoa nei i to ˈna tariˈa faaroo, e ua riro te reira ei haamaitairaa faufaa rahi. Ia au i teie manaˈo, te horoa atoa ra anei tatou i te tariˈa faaroo ia faaite mai te Atua ra o Iehova i ta ˈna mau titauraa na roto i ta ˈna Parau? I te mea e te haafatata ra ta tatou mau pure ia tatou i to tatou Poiete, te hinaaro nei tatou e haapao maitai i te mau mea atoa o ta ˈna e faaite mai ia tatou.
[Hohoˈa i te api 6]
Te faaroo maira te Atua i te mau pure.Te faaroo ra anei tatou ia ˈna na roto i ta ˈna Parau?