Te taoˈa faufaa no roto mai i te mau haapueraa pehu no Aiphiti
E MANAˈO anei outou e itea mai i te mau papai faufaa a te Bibilia i roto i te hoê haapueraa pehu? O te ohipa ïa i tupu i roto i te mau vahi one no te Aiphiti, i te hopea o te senekele i mairi aˈenei. Mea nafea ïa?
Mai te matahiti 1778 e tae atu i te hopea o te senekele 19, e rave rahi mau papai opaero tei itehia mai ma te manaˈo-ore-hia i Aiphiti. Mea iti râ te maimiraa i ravehia e te roa ˈtu i te hoê hanere matahiti i mairi aˈenei. Mai reira mai, ua itehia mai te hoê haapueraa rahi o te mau papai tahito e te feia faaapu no taua fenua ra, e ua taa ˈtura i te Faufaa Maimi no Aiphiti tei turuhia e te fenua Beretane i te titauraa ia tono i te hoê pûpû maimi hou e maoro roa ˈi. Ua maiti ratou e piti feia ite no Oxford, o Bernard P. Grenfell e o Arthur S. Hunt, o tei faatiahia ia maimi i te pae apatoa o te vahi faaapu o te mataeinaa no Faiyūm (faaitehia i nia nei).
Ua manaˈo o Grenfell e mea tano roa te vahi parauhia Behnesa no to ˈna iˈoa heleni tahito, Oxyrhynchus. Ei pu no te kerisetianoraa no Aiphiti, ua riro o Oxyrhynchus ei vahi faufaa roa i te mau senekele maha e te pae o to tatou nei tau. E rave rahi mau fare monahi tahito tei iteahia mai na pihai iho, e mea aano roa te mau vahi paparari o teie oire mataeinaa. Ua manaˈo o Grenfell e e itehia mai te mau toetoea o te mau papai kerisetiano i reira, aita râ hoê aˈe mea i itehia na roto i te paheruraa i te mau menema e te mau fare paparari. Ua toe noa maira te vahi haapueraa pehu o te oire, vetahi e 9 metera te teitei. Ua riro te heruraa i teie vahi no te imi i te tahi papai opaero ei faˈiraa i to ratou manuïa-ore-raa; teie râ, ua faaoti te feia maimi e tamata noa.
Te hoê taoˈa faufaa itehia ma te manaˈo-ore-hia
I te avaˈe tenuare 1897, ua ǒhia ˈtura te hoê apoo tamataraa e tau hora i muri iho, ua iteahia mai te mau papai opaero tahito. Te vai ra te mau rata, te mau parau faaau, e te mau papai haamanahia. Ua tapoˈi te one i puhipuhihia mai e te mataˈi i teie mau taoˈa, e ua faaherehere te ahuaraˈi mǎrô ia ratou fatata e 2 000 matahiti.
Hau atu i te toru noa avaˈe i muri iho, ua iteahia mai fatata e piti tane papai opaero i Oxyrhynchus. E piti ahuru ma pae afata rahi tei faaîhia e tei faautahia ˈtu na nia i te pahi i Beretane. E i te mau tau toetoe atoa i roto i na ahuru matahiti i muri iho, ua hoˈi atu teie feia ite itoito i Aiphiti no te faarahi atu â i ta raua haapueraa taoˈa.
I te hoê taime, a heru ai raua i te hoê menema i Tebtunis, aita ˈtu taoˈa ta raua i iriti mai i te repo maoti râ te tahi mau tino moo pape mirihia. No to ˈna riri, ua faahuˈahuˈa roa ˈˈera te hoê rave ohipa i te hoê o teie mau animala mirihia. I to ˈna maere rahi, ua ite aˈera oia e ua puohuhia oia i roto i te mau vehî opaero. Mai te reira atoa te puohuraahia te tahi atu mau moo pape, e ua faaîhia to vetahi arapoa i te mau potaro opaero. Ua iteahia mai te mau huˈahuˈa papai tahito, e tae noa ˈtu te mau faaueraa e te mau parau faaau a te arii i anoihia e te mau tabula faufaa moni e te mau rata taa ê.
Eaha te faufaaraa o teie mau papai atoa? Ua riro ratou ei mau taoˈa anaanatae roa, no te mea ua papaihia te rahiraa e te feia au noa na roto i te reo Koine, te reo heleni matauhia o taua mahana ra. I te mea e e rave rahi o te mau parau o ta ratou e faaohipa ra o te vai atoa ra i roto i te mau Papai heleni a te Bibilia, te “Faufaa Apî,” ua taahia ˈtura e e ere te reo o te mau Papai i te reo heleni faataahia no te Bibilia, mai ta vetahi feia ite i faaite na, e reo râ ta te mau huru taata atoa e paraparau na. No reira, na roto i te faaauraa i te huru faaohiparaa o te mau parau i roto i te mau huru tupuraa matauhia, ua fa maira te hoê maramarama hau aˈe no nia i to ratou auraa i roto i te mau Papai heleni kerisetiano.
Mau papai a te Bibilia
Ua itea-atoa-hia mai te mau vaehaa o te mau papai bibilia, mea pinepine i te papaihia na roto i te mau parau aravihi ore tei ore i faaunaunahia e i nia i te hoê taoˈa faufaa iti haihai roa, tei riro hoi ei Bibilia na te taata riirii. E hiˈopoa anaˈe na i te tahi mau papai i itehia mai.
Ua itea mai ia Hunt i te hoê papai o te pene matamua o te Evanelia a Mataio, mau irava 1 e tae atu i te 9, te 12, e te 14 tae atu i te 20, papaihia i te senekele toru o to tatou nei senekele na roto i te mau reta orarahi. Ua piihia ˈtura P1, te taoˈa matamua o te hoê pueraa papai opaero no te mau vahi huru rau, tei taeahia i teie nei fatata i te hoê hanere papai aore ra vaehaa papai o te mau Papai heleni kerisetiano. Eaha te faufaaraa o te mau irava ta Hunt i ite mai? Te faaite ra te huru papairaa e no ǒ mai te reira i te senekele toru o to tatou nei tau, e i te hiˈopoaraahia ta ˈna mau parau, ua itehia e te tuea ra oia e te papai apî tei faataahia e Westcott e Hort. Ua vaiihohia te P1 i te Fare vairaa tauihaa tahito a te Fare haapiiraa tuatoru i Philadelphia, Pennsylvania, i te Fenua Marite.
I nia i te hoê api opaero no roto mai i te hoê buka parauhia codex, te vai ra i te pae aui o te api vetahi mau tuhaa o te Ioane pene 1 e i te pae atau te mau tuhaa o te Ioane pene 20. Na roto i te amui-faahou-raa i te mau tuhaa tei moe, ua manaˈohia e i te omuaraa te vai ra e 25 api no te taatoaraa o te Evanelia, e mai mutaa ihora mai â, tei roto atoa te pene 21. Ua numerahia ˈtura oia e P5, ua tapaohia oia no te senekele toru o to tatou nei tau, e ua vaiihohia i teie nei i te Fare vairaa buka Beretane i Lonedona, i te fenua Beretane.
Ua papaihia te hoê vaehaa papai te vai ra i roto te Roma 1:1-7 na roto i te mau reta orarahi e te aravihi ore ta vetahi feia ite i manaˈo e peneiaˈe e ohipa teie na te hoê tamaroa haere haapiiraa. Ua numerahia teie parau i teie nei e P10 e ua tapaohia no te senekele maha o to tatou nei tau.
Te vai ra i roto i te hoê papai rahi aˈe te hoê tuhaa i nia i te toru o te episetole i to Hebera. Ua papaihia i nia i te muriraa o te hoê otaro, area i nia mai ra, te vai ra te mau papairaa tahito a te taata tuatapapa aamu Roma ra o Livy. No te aha hoi teie mau papai taa ê roa i nia i te muaraa e te muriraa o teie otaro? I taua tau ra, no te varavara e te moni o te mau taoˈa papairaa, eita ïa te mau api opaero tahito e haamâuˈahia. I teie nei, ua numerahia oia e P13, e ua tapaohia no te senekele toru aore ra maha o to tatou nei tau.
No roto mai te hoê api opaero tei roto te mau tuhaa o te Roma pene 8 e te 9, tei papaihia i roto i te mau reta nainai roa, i te hoê buka fatata e 11.5 tenetimetera te teitei e e 5 tenetimetera noa te aano. E au ra ïa e te vai ra i te senekele toru ra o to tatou nei tau te mau buka faito nainai o te mau Papai. Ua piihia ˈtura teie i te P27 e ua tuea oia e te Buka Codex Vaticanus.
I roto i te mau tuhaa o na api e maha no roto mai i te buka heleni a te Septante, te vai ra te mau tuhaa no e ono pene a te Genese. Mea faufaa roa teie buka no te mea ua tapaohia oia no te senekele piti aore ra toru o to tatou nei tau e no te mea aita teie mau pene i roto i te Codex Vaticanus e e ere ratou i te mea papu maitai i roto i te Codex Sinaiticus. Ua tapaohia teie mau papai i te iˈoa Papyrus 656, e ua vaiihohia i teie nei i te Fare vairaa buka Bodleian, i Oxford, i te fenua Beretane.
I roto i teie mau vaehaa atoa, aita e itehia ra te tahi tauiraa rahi e te mau papai matamua e vai ra, no reira, te haapapu ra te reira e e faaohipa na te mau huru taata atoa i te papai bibilia i taua tau ra i roto i taua vahi atea ra no Aiphiti. Te haapapu atoa ra te reira i to tatou tiaturi i roto i te parau mau e te papuraa o te Parau a te Atua.
[Hohoˈa i te api 27]
Papai opaero no Faiyūm mai e te mau tuhaa o te Ioane pene 1
[Faaiteraa i te tumu]
Ma te parau faatia a te British Library
[Faaiteraa i te fatu o te hohoˈa i te api 26]
Pictorial Archive (Near Eastern History) Est.