Mau uiraa a te feia taio
Ia au i te Mataio 11:11, e tia anei ia tatou ia faaoti e ua ite ê na o Iesu e e pohe o Ioane Bapetizo na mua ˈˈe ia Iesu?
E, e au ra e ua ite Iesu e eita o Ioane e ora no te riro ei kerisetiano faatavaihia, no te mea ua faaite o Iesu e: “E parau mau ta ˈu e parau atu ia outou nei, i ta te vahine i fanau nei aita ˈtu ïa peropheta rahi i itea ia Ioane Bapetizo nei, o tei iti roa râ i te basileia o te ao ra, e rahi ïa ia ˈna.”—Mataio 11:11.
I to te melahi ra o Gaberiela faaiteraa i te fanauraa o Ioane, ua tohu oia e “ma te aau itoito e te mana o Elia, . . . [e] faaineine [oia] i te hoê pae taata ia au no [Iehova].” E riro o Ioane ei taata o te na mua mai no te faaineine i te hoê nunaa no te Mesia a Iehova. Aita râ hoê mea i roto i taua faaiteraa a te Atua ra o te haapapu ra e e riro o Ioane iho ei pǐpǐ na te Mesia e haere maira, e aita atoa e parau e faataa ra i te reira i roto i te parau tohu i faahitihia e Zakaria, te metua tane o Ioane.—Luka 1:17, 67-79.
No reira, i muri aˈe i to ˈna bapetizoraa ia Iesu, ua tamau noa o Ioane i te poro e i te bapetizo i te taata, ma te pee maite i ta ˈna hopoia e faaineine i te hoê nunaa. Ua ite o Ioane na roto i te hoê semeio e e horoa o Iesu i te hoê bapetizoraa e te varua moˈa, aita râ o Ioane i parau e e noaa atoa ia ˈna te varua moˈa, a riro atu ai ei kerisetiano faatavaihia. (Mataio 3:11) Ua farii atoa o Ioane e e iti oia, area o Iesu ra, e tupu ïa o ˈna i te rahi.—Ioane 3:22-30.
I to Iesu faahitiraa i te parau o ta tatou e taio ra i roto i te Mataio 11:11, ua tuu-ê-na-hia o Ioane i roto i te fare tapearaa. Ua faaite o Iesu na mua roa ˈˈe e mea iti aˈe teie peropheta tapeahia i te auri i te taata hopea e tavini a muri aˈe ei arii-tahuˈa i roto i te raˈi. E au ra ïa e ua ite o Iesu e fatata roa o Ioane i te pohe, ma te moe i te fenua nei hou te eˈa “apî” e aratai tia ˈu i te oraraa i nia i te raˈi e matara ˈi. (Hebera 10:19, 20) Te haapapu ra te reira e eita o Ioane e ora e tae roa ˈtu i te Penetekose o te matahiti 33 o to tatou nei tau, i te taime e haamata ˈi te faatavairaa o te mau pǐpǐ a Iesu e te varua. No reira, e nehenehe te parau a Iesu i roto i te Mataio 11:11 e ravehia ei haapapuraa e ua ite oia e eita o Ioane e haere i nia i te raˈi.