E tia anei ia tiaturi i te Toru Tahi?

I roto i te tumu parau no nia i te mau haapaoraa a te Sunday Gleaner, vea tei neneihia i Jamaïque (Antilles), ua papai o Ian Boyne i teie parau no nia i te hoê vea iti i piahia i te matahiti i mairi aˈenei e te mau Ite no Iehova:

“E tia ia horoa i te parau ‘maitai roa’ i te mau Ite no Iehova no taua vea ra. Noa ˈtu e ua papaihia ma te ohie roa e e nehenehe ai te hoê taurearea e taio, e nehenehe e parau, ma te ore e faarahi roa i te parau, e e rave rahi mau faahororaa a te mau taata tuatapapa i te Bibilia e a te mau buka tuiroo i roto. (...) Ua riro te vea iti ra E tia anei ia tiaturi i te Toru Tahi? ei buka faahiahia mau a te mau Ite. I teie nei, e tia i te feia e paruru ra i te Toru Tahi, aore ra i te huru atua o Iesu, ia haapao maitai ia ratou. Te itehia ra i roto i taua vea iti ra e rave rahi faahitiraa no roto mai i te mau pu i te pae o te aamu e i te pae o te tuatapaparaa i te parau faaroo e faaite ra e e ere te haapiiraa no nia i te Toru Tahi no roto mai i te Bibilia. Te itehia ra taua tuhaa parau ra no roto mai i te buka parau paari maitai roa, te Buka parau paari a te mau haapaoraa, oia hoi: ‘Ua tahoê te feia tuatapapa i te parau faaroo no te farii e aita atoa e vai ra i roto i te Faufaa Apî te hoê haapiiraa taa maitai no nia te Toru Tahi.’”

Te parau faahou ra o Ian Boyne e: “Mea fifi atura ïa i taua taata papai no nia i te mau haapaoraa ia taa e mea nafea te hoê taata faaroo au noa, aore ra te taata e vai ra ia ˈna te hoê ite i te pae faaroo hau atu i te au noa, e nehenehe e patoi atu i te mau haapapuraa maramarama maitai e o te ore e nehenehe e faahapa ˈtu tei faahitihia e te mau Ite no te patoi atu i te manaˈo e o te Atua Iesu.”

Mai te peu e te hinaaro ra outou hoê o taua vea iti ra, a faaî e a faahoˈi mai i te parau-pahonoraa i muri nei.

Te hinaaro nei au e ia haponohia mai te vea iti e 32 api, E tia anei ia tiaturi i te Toru Tahi? (Mai te peu e aita outou e noho ra i Polinesia Farani, a papai atu i te hoê o te mau vahi nohoraa i faahitihia i te api 2.)

[Faaiteraa i te fatu o te hohoˈa i te api 32]

Musée du Louvre, Paris

Museo Egizio, Turin

Musée des Beaux-Arts de Troyes

Museo Bardini, Florence

Musée du Louvre, Paris