E haaparare anaˈe na i te noˈanoˈa o te ite no nia i te Atua

“Ia haamaitaihia râ te Atua, o tei faaoaoa mai ia matou i te Mesia aore e faaea, o tei faaite haere hoi i te hauˈa i te ite ia ˈna ia matou nei e aore e vahi toe!” — KORINETIA 2, 2:14.

1. No teihea huru noˈanoˈa ta tatou e parau ra i ǒ nei, e eaha ïa to tatou manaˈo no nia i te haamaitairaa ia haaparare i te reira?

HMM! Te hauˈa ra anei outou i teie hauˈa noˈanoˈa? Aita matou e faahiti ra i ǒ nei i te noˈanoˈa o te mau tiare tei uaa, i te “hauˈa” noˈanoˈa taipe râ e matara mai mai roto i te mau buka faufaa roa ˈˈe o te ao nei. E ere taua mau buka ra no ǒ mai i te mau taata. Eita, o te hoê râ anairaa tiare taipe i faauruahia mai e Tei poiete atoa i te mau tiare o te faanoˈanoˈa ra e o te faanehenehe ra i te fenua nei. Ua riro te haamaitairaa no te haaparare i taua noˈanoˈa ra o te ite no nia i te Atua ei taoˈa huna rahi mau. Oia mau, o te hoê ohipa ïa teie tei tia e ia poiherehia, o tei ore i horoahia i te mau taata atoa.

2. Afea ra to te mau pǐpǐ a Iesu Mesia i te haamataraa i te haaparare i te hoê noˈanoˈa taipe, e eaha te mau faahopearaa?

² Ua horoahia taua taoˈa huna ra i te mau pǐpǐ a te Mesia i to ratou faaôraa i roto i te hoê taviniraa itoito mau no te Atua ra o Iehova, i te mahana o te Penetekose o te matahiti 33 o to tatou nei tau. Ma te î roa i te varua moˈa, ua haamata ratou i te haaparare i te hoê hauˈa noˈanoˈa taipe ma te parau no nia “i te peu taa ê a te Atua”. (Ohipa 2:1-4, 11.) Na roto ia ratou, e tae roa taua noˈanoˈa ra o te ite no nia i te Atua i te tahi atu mau taata, eiaha noa i te mau ati Iuda tei peritomehia, oia atoa i te mau taata tei ore i peritomehia no te mau fenua atoa, no te mau opu atoa, no te mau nunaa atoa e no te mau reo atoa (Ohipa 10:34, 35). No te mau pǐpǐ mau, mea faufaa roa ˈˈe taua taviniraa ra i te mau taoˈa i te pae materia ta te mau taata e nehenehe e haaputu na ratou iho.

3. Ua tapae roa te ohipa o te haaparareraa i te noˈanoˈa o te ite no nia i te Atua i teihea faito, e eaha te uiraa tei tia ia tatou ia uiui?

³ I teie mahana, te faatupuhia ra te ohipa faahiahia roa o te haaparareraa i te hauˈa noˈanoˈa o te ite no nia i te Atua i roto i te ao atoa nei, i te hoê faito teitei roa mai tei ore aˈenei i itehia i roto i te aamu o te taata. Te faaroo nei te huitaata atoa i te faaiteraa no nia i te Basileia o te Atua tei haamauhia i teie nei, e tei horoahia i te Arii ra o Iesu Mesia i faatoroahia e te Atua (Mataio 6:10; Ohipa 1:8). Ua riro anei te faaiteraa i te Arii e to ˈna Basileia ei ohipa faufaa mau e o te ore e nehenehe e faaauhia? Ua haafaufaa o Iesu i taua taviniraa ra, na ˈna hoi i rave matamua i te ohipa pororaa i te parau apî maitai o te Basileia, ma te vaiiho mai i te hiˈoraa. — Mataio 4:17; 6:19-21.

E faanoˈanoˈa na tatou i te eˈa o te tiaa taata apee hanahana

4. Ia au i te Korinetia 2, 2:14, ihea roa te Atua e aratai ai i teie mahana i ta ˈna mau tavini i nia i te fenua nei, e eaha te peu no te Tau tahito ta Paulo e faahiti ra?

⁴ No te aha e tia e ia riro te taviniraa i te Atua ei taoˈa huna na tatou? Te tumu matamua, no te mea ïa, mai teie atu nei, te vai ra i te feia e tavini ra ia Iehova, te haamaitairaa faahiahia roa ia arataihia ratou e te Atua i roto i te hoê haereraa hanahana nehenehe mau. Ia au i te Tatararaa Apî o te Ao atoa nei, te taiohia ra i roto i te Korinetia 2, 2:14 e: “Ia haamaitaihia râ te Atua, o tei faaoaoa mai ia matou i te Mesia aore e faaea, o tei faaite haere hoi i te hauˈa i te ite ia ˈna ia matou nei e aore e vahi toe [“i rave e ia tae to tatou ite no nia ia ˈna na roto i te ao atoa nei mai te hoê hauˈa noˈanoˈa au-roa-hia!” Phillips].” Na roto i teie mau parau, mai te huru ra ïa e te faahiti ra te aposetolo Paulo i te parau no te hoê peu o te Tau tahito: te faanahonahoraa o te mau haereraa tiaa taata apee hanahana maua.

5, 6. a) Eaha te ohipa e tupu ra i roto i te mau haereraa hanahana no te Roma tahito ra, e eaha te auraa o te noˈanoˈa mǎrû i haapararehia no te tahi e te tahi i roto i taua tupuraa ra? b) Eaha te faaohiparaa pae varua o te faahohoˈaraa e vai ra i roto i te Korinetia 2, 2:14-16?

⁵ I te tau o te Faatereraa roma, te hoê o te mau faahanahanaraa rahi roa ˈˈe ta te Apooraa e nehenehe e horoa i te hoê tenerara o tei upootia, o te faatiaraa ïa ia ˈna ia faaite i ta ˈna upootiaraa na roto i te hoê haereraa tiaa taata apee hanahana mea moni rahi roa. E haere maite noa ïa te tiaa taata apee roma na nia i te Via Triumphalis e e paiuma ratou na nia i te hoê eˈa tipuupuu e tae roa ˈtu i te hiero a Jupiter, i nia i te Capitole. E arataihia te mau arii, te mau tamaiti hui arii e te mau tenerara tei haruhia i te tamaˈi, e oia atoa ta ratou mau tamarii e ta ratou mau tavini, ma te taamuhia e te fifi auri e mea pinepine, ma te ahu ore, no te faahaama ia ratou.

⁶ Ia haere anaˈe taua tiaa taata apee ra na roto i te oire o Roma, e taora te mau taata i te mau tiare i mua i te pereoo a te taata i upootia mai, e e tutui ratou i te taoˈa o tei faanoˈanoˈa i te eˈa. Te auraa o taua hauˈa noˈanoˈa hau mǎrû ra no te mau faehau o tei upootia mai, o te mau hanahanaraa ïa e te hoê oraraa papu aˈe. E auraa pohe ïa te reira no te feia i haruhia mai e i faautuahia i te taime hopea o taua haereraa taata ra. Te haamaramarama maira taua tupuraa ra i te faaohiparaa i te pae varua, e ravehia ra e Paulo no taua faahohoˈaraa i roto i te Korinetia 2, 2:14-16. Te faaite ra teie faahohoˈaraa ia Paulo e to ˈna mau hoa kerisetiano mai te mau melo e auraro nei i te Atua, o te apee nei, ‘ma te apiti atu i te Mesia’, i te haereraa hanahana a te Atua, o te aratai nei ia ratou i roto i te hoê taahiraa tiaa taata apee o tei upootia i nia i te hoê eˈa noˈanoˈa.

Hauˈa noˈanoˈa no te ora aore ra hauˈa no te pohe

7, 8. a) Mea nafea to te mau Ite no Iehova haaparareraa i te noˈanoˈa mǎrû o te ite no nia i te Atua? b) A haaparare noa ˈi te mau Ite i taua noˈanoˈa taipe ra, eaha ïa te huru o te feia o te faaorahia ra? c) Eaha te huru o te feia o te pohe ra?

⁷ Ma te poro i te mau vahi atoa i te mau parau mau bibilia no nia i te Basileia o te Atua faaterehia e te Mesia, te haaparare nei e te faaite tahaa nei te mau Ite no Iehova i te mau vahi atoa i te hauˈa noˈanoˈa mǎrû o te ite no nia i te Atua maitai mau, e na te parau mau hoi i faatiamâ mai ia ratou i te haapaoraa hape. Te haere nei ratou paatoa ma te upootia i roto i te taviniraa a Iehova. Ua riro ta ratou mau ô, oia hoi te taviniraa ta ratou e rave nei ma te tiaraa Ite no te Atua e no te Arii ta ˈna i haamau, mai te mea noˈanoˈa e auhia ra e Iehova. No reira, e nehenehe tatou e taa eaha ta te aposetolo i hinaaro e parau a papai ai oia e: “Ua riro hoi matou i te Atua ei hauˈa noˈanoˈa no te Mesia, i te feia faaorahia e te feia e pohe: i te tahi pae râ, e hauˈa pohe ïa matou e tae noa ˈtu i te pohe; area i te tahi pae, e hauˈa ora ïa matou e tae noa ˈtu i te ora [“te hoê hauˈa ora o te horoa mai i te ora”, Français courant; “te hauˈa hau mǎrû o te aratai i te ora”, Kuen].” — Korinetia 2, 2:15, 16.

⁸ Te ite ra te feia aau rotahi e faaite ra i te hoê haerea mai te mamoe ra te huru, i te mǎrû o te ite no nia i te Atua, maramarama tei haapararehia e Ta ˈna mau ite. No taua mau taata ra, e hauˈa te ohipa faaiteraa i te oraora-maitai-raa e te ora, i te parau mau ora e te parau mau o te faaora. Te haamauruuru nei ratou ia Iehova e te Arii ta ˈna i haamau, e te apee nei ratou i to ratou haereraa tiaa taata apee hanahana ma te tuô na roto i te reo teitei e: “Tei to tatou Atua te ora, tei parahi i nia iho i te terono ra, e tei te Arenio.” (Apokalupo 7:10). Te hutihuti nei ratou i te mataˈi o te parau mau no nia i te Basileia, mataˈi o tei riro ei hauˈa faaora au maitai o te aratai tia ˈtu i te ora. Ua haaviivii râ o Satani e ta ˈna mau demoni i te hutihutiraa aho o te feia e taai maite nei i te haapaoraa hape, e no reira te tapiri nei ratou i to ratou ihu e te patoi nei ratou i te parau mau ma te vahavaha. No “te feia e pohe”, te haaparare nei te parau mau e ta ˈna feia paruru haapao maitai, i te hoê hauˈa pohe e aratai tia ˈtu i te pohe. Aore ra, mai ta te New International Version e parau ra: “No te tahi pae ra, e hauˈa pohe ïa matou”. Mai teie to te La Parole Vivante (huriraa a Kuen) tatararaa i teie irava: “No ratou, ua riro ïa ei hauˈa no roto mai i te pohe e o te aratai i te pohe.”

9. Eaha te uiraa ta Paulo e ui ra i teie nei? Nafea outou ia pahono atu, e no te aha?

⁹ “E o vai hoi te au i teie nei parau?” ta te aposetolo ïa e ani ra i muri iho (Korinetia 2, 2:16). Na roto i te tahi atu mau parau: “E o vai tei ineine no te hoê ohipa mai te reira te huru?” (Beaumont). “E no te hoê ohipa mai te reira, o vai te taata aravihi?” (Crampon 1905). Te panoho nei te mau Papai e: Te mau Ite no Iehova! No te aha? No te mea o te mau taata aau rotahi anaˈe tei pûpû ia ratou no te Atua, o te ore e imi ra i to ratou iho hinaaro miimii e o te faaite tahaa ra i te parau mau, ma te ore e faaau ma te tia ore e te haapaoraa hape, tei aravihi aˈe no taua ohipa ra no te haaparare i te noˈanoˈa o te ite no nia i te Atua ra. — Kolosa 1:3-6, 13; Timoteo 2, 2:15.

10. No te aha aita te upoo faatere haapaoraa i aravihi no te haaparare i te noˈanoˈa o te ite no nia i te Atua?

¹⁰ Aita te upoo faatere hapaoraa o te amuiraa faaroo kerisetiano, teie e imi nei i te hoê roo maitai i roto i teie nei ao, i aravihi no taua ohipa tei tia ia ravehia ma te ore e imi i to ˈna iho maitai. No te aha? No te mea aita oia e faaohipa nei i te huru titauhia tei faaitehia i roto i teie parau a Paulo: “E ere hoi matou mai te hoê pae e anoi i te parau a te Atua ra, te parau nei râ matou i te parau a te Mesia, no ǒ mai i te Atua ra, ma te haavare ore, e i mua hoi i te aro o te Atua.” (Korinetia 2, 2:17). Aore ra, mai ta La Bible en français courant e faahiti ra: “E ere tatou mai te tahi pae o te hoo nei i te parau a te Atua; ma te taa ê hoi, no te mea e na te Atua i tono ia tatou, te parau nei tatou ma te aau rotahi i mua ia ˈna, mai te mau tavini a te Mesia.”

11, 12. a) No te aha e ere te mau Ite i te feia “e anoi [ra] i te parau a te Atua” no te mea e te farii nei ratou i te mau ô horoa noa? b) Taa ê atu i te tatararaa hape a te kerisetianoraa fariihia e te rahiraa, eaha ta te mau Ite no Iehova e pûpû ra?

¹¹ Ua tonohia te mau Ite no Iehova e te Atua, e te rave nei ratou i ta ratou ohipa faaiteraa i raro aˈe i te mata o te Atua. Oia mau, te horoa ra ratou na te mau taata e anaanatae mau ra i te tahi mau buka e i te tahi mau huru buka faufaa roa e faataa ra i te Parau a te Atua, e te farii nei ratou i te mau ô horoa noa no te ohipa o te pororaa o te Basileia i roto i te ao atoa nei. E ere râ taua raveraa ra i te hoê ohipa hoohooraa aore ra i te faahuru ê i te Parau a te Atua. Oia mau, o te hoê noa ïa tauturu taua mau ô horoa-noa-hia, no te haaparare i te ite no nia i te Atua i te rahiraa o te feia e vai râ.

¹² I teie mahana, noa ˈtu e ua ite ratou aore aita, e rave rahi teie e farii nei i te hoê tatararaa hape o te kerisetianoraa, no te mea e tano te reira i to ratou mau hinaaro miimii e eita te reira e titau e ia taui ratou i ta ratou huru oraraa. Te manaˈo nei ratou e te farii nei te Atua ia ratou no te mea te faaite nei ratou i te hoê here hohonu no ˈna. Teie nei râ, ia faaite-anaˈe-hia râ ia ratou e te patoi ra te Parau a te Atua i ta ratou mau tiaturiraa e to ratou haerea, e taui ïa ratou i te auraa o te mau Papai, ma te tuu i to ratou iho mau manaˈo na nia ˈˈe i te ite papu o te Bibilia (Mataio 15:8, 9; Petero 2, 3:16). Area te mau Ite no Iehova, te faaite nei ratou i te parau mau viivii ore, o tei ore i faahuru-ê-hia, no roto mai i te Bibilia, ma te faahaere ïa i te hoê noˈanoˈa mǎrû tei auhia e te Atua e ta ˈna feia haamori mau. No reira, te patoi nei ratou i te mau tutuu i te pae faaroo atoa e te faataa ê nei ratou i te mau mea atoa e tapea nei e ia ore e noaa te ite mau no nia i te Atua.

13. Taa ê atu i te mau kerisetiano i faatavaihia, o vai tei roto i te haereraa a te tiaa taata apee hanahana, e eaha ta ratou e rave nei i te mau vahi atoa ta ratou e haere ra?

¹³ I te parau mau, ia ô atoa ˈtu i roto i te haereraa o te tiaa taata apee hanahana a te Atua, ma te apiti atu e te Mesia, ua riro te reira ei haamaitairaa aita e faaauraa. E horoahia teie haamaitairaa, eiaha noa i te mau kerisetiano faatavaihia, i te mau “mamoe ê atu” o te “feia rahi” atoa râ, e te reira, mai teie atu nei, no te mea ua fatata roa te upootiaraa o te Basileia (Apokalupo 7:4, 9; Ioane 10:16). Ma te tiai i te tahi atu mau re a to tatou Arii o te upootia, i te mau vahi atoa ta tatou e haere, e haaparare ïa tatou i te ite no nia i te Atua, o te horoa i te ora, mai te hoê hauˈa noˈanoˈa, aore ra te hoê taoˈa noˈanoˈa faufaa mau, no te feia e hinaaro rahi nei i te parau mau e te parau-tia. Auê ïa haamaitairaa i te riroraa mai ei taata aravihi no te rave i taua ohipa faahiahia mau ra! — Ioane 17:3; Kolosa 3:16, 17.

Faatiahia no te riro ei feia hopoi i te hauˈa noˈanoˈa

14. No te aha aita e titauhia i te feia e haaparare ra i te noˈanoˈa o te ite no nia i te Atua, i te hoê parau faatia no ǒ mai i te taata ra?

¹⁴ Mea titauhia anei e ia roaa i te feia e haaparare ra i te noˈanoˈa o te ite no nia i te Atua e to ˈna Basileia, te hoê parau tuite aore ra te hoê parau faatiaraa no ǒ mai i te taata? Aita roa ˈtu! Ua faatia-aˈena-hia tatou, aore ra ua tapaohia tatou, mai te mau Ite no te Taata teitei roa ˈˈe o te ao atoa nei. No reira, eiaha tatou e haamarirau no te haaparare na pihai iho ia tatou i te noˈanoˈa o te parau apî maitai o te Basileia o te Atua. Eiaha ia moehia ia tatou e na Iehova e aratai ra ia tatou. Ua faatupu o Iesu i ta ˈna taviniraa noa ˈtu te mau “huru faaino a te feia rave hara”. (Hebera 12:3.) Tera râ, e parau mau noâ te faatiaraa no nia i ta ˈna ohipa pororaa, tei faataahia i roto i te Bibilia, te faahiti nei oia i te parau maitai no ˈna e te haapapu ra i to ˈna tiaraa ei tavini mau no te Atua ra o Iehova.

15. Mea nafea to te aposetolo Paulo faaiteraa e aita e faufaa na te mau kerisetiano mau i te mau “episetole haamaitai”?

¹⁵ Ua faaruru te aposetolo Paulo i te hoê â patoiraa i to ˈna ra anotau ma te faatupu i teie haaferuriraa: “E haamaitai faahou anei matou ia matou iho? e ei episetole haamaitai anei ta matou ia matou iho ia outou na, mai ta te hoê paeau ra, e tia ˈi, e te episetole haamaitai ia matou no ǒ na mai ia outou na? O outou hoi ta matou episetole, i papaihia i roto i to matou aau, ua itea e ua taiohia e te taata atoa. Ua faaite-papu-hia hoi outou e o te episetole ïa a te Mesia, i ohipahia e matou, aita râ i papaihia i te inita, na te [v]arua râ o te Atua ora ra; eiaha i nia i te pǎpǎ ofai, ei nia râ i te pǎpǎ taata ra i te aau.” — Korinetia 2, 3:1-3.

16. Eaha te huru rata ta te mau Ite no Iehova e pûpû ra no te haapapu e no ǒ mai ta ratou taviniraa i te Atua ra?

¹⁶ Aita te mau mana faatere o te ao nei e farii nei i ta tatou faaueraa ei Ite no Iehova. E vaiiho anaˈe ïa i ta tatou ohipa no te haaparare i te noˈanoˈa o te ite no nia ia Iehova, ia parau no ˈna iho! Eita e nehenehe e faaore i taua ohipa ra, noa ˈtu e te patoi nei vetahi i te taio atu i taua faaiteraa ra o ta tatou taviniraa. Te faaite nei te mau ekalesiatiko i te mau parau faatia no ǒ mai i te mau mana e haapao ra i te faufaa o te upoo faatere haapaoraa. Tera râ, ua riro te reira ei tuhaa iti papie horoahia mai e te taata. Area te mau Ite no Iehova râ, eita noa ratou e turui ra i nia i te Parau a te Atua, ua riro atoa râ ratou iho ei mau faaiteraa ite-mata-hia. Ua haaputuputu-atoa-hia te feia rahi o te mau mamoe ê atu o tei faaroo i te parau apî maitai o te Basileia, i te pae atau o te Arii i haamauhia e Iehova (Mataio 25:33, 34). Ua riro ratou pauroa ei episetole haamaitai na tatou, na tatou te mau Ite no Iehova, te hoê rata ta tatou e nehenehe e hopoi i te mau vahi atoa i roto i to tatou mafatu e i roto i to tatou feruriraa, e o ta tatou e nehenehe e faaite ma te papu. Te feia atoa o te turu i te mana arii o te ao atoa nei o te Atua e o te tavini nei ia ˈna ma te apiti atu i te mau Ite no Iehova, ua riro atoa ratou ei episetole haamaitai i itehia e i taiohia e te mau taata atoa.

17. Mea nafea ta tatou ‘episetole a te Mesia’ i te papairaahia, e no te aha o Paulo i parau ai e ua papaihia te reira i nia i te mafatu?

¹⁷ Oia mau, te riri nei e te faahinaaro nei te mau kerisetiano haavare, ia taio anaˈe ratou i taua parau faatia ra. Teie râ, ua riro te maraaraa o te feia rahi o te mau mamoe ê atu, ei rata haamaitai no ǒ mai ia Iesu Mesia, te Tiai mamoe maitai roa, teie e faaohipa nei i te mau Ite no Iehova atoa i roto i ta ˈna ohipa haapao i te nǎnǎ. Ua riro tatou ei penitara, aore ra ei mauhaa taata, ta ˈna e faaohipa ra no te papai i taua rata ra. Aita te reira rata i papaihia e te inita o te nehenehe e tumâhia i muri iho, ua papaihia râ oia e te puai ohipa, aore varua, a te Atua, o te ohipa ra i roto ia tatou nei. E ere mai te ohipa i tupu no Mose, a papaihia ˈi na Ture Ahuru e te rima o te Atua i nia i na pǎpǎ ofai e piti. Ua papaihia ta tatou rata i nia i te mau pǎpǎ taata, i nia i te mau mafatu taata, no te mea te faatupu nei ta tatou taviniraa i te hoê tauiraa o te huru feruriraa e o te mafatu i ǒ te mau taata e farii ra i te parau apî noˈanoˈa.

18. Eaha te tauiraa e faariro nei i te mau taata e farii ra i te parau apî maitai ei episetole haamaitai?

¹⁸ Te haaputapû nei te ohipa ta tatou e rave ra e te Parau a te Atua, i te feia aau mehara o te faaroo ra i te parau apî maitai, e te turai nei te reira ia ratou ia faatupu i te mau tauiraa faahiahia mau. Aita ratou e maiti ra e tavini i te Atua ma te ore e feruri maitai, ma te turaihia e te hoê hinaaro faatupuhia i roto ia ratou e te hoê taata poro e hauti ra i nia i to ˈna mau manaˈo hohonu. Aita, te faaite ra taua opuaraa ra i te hoê tauiraa tamau o to ratou oraraa, tauiraa niuhia i nia i te mau parau mau maramarama a te Bibilia Moˈa. E turai to ratou here i te Atua mau ra o Iehova, ia ‘haapae i te taata tahito i tei ino i te hinaaro haavare ra’ e ia ‘faataata apî ia ratou’, o te faaite nei i ‘te hotu o te varua’. (Ephesia 4:20-24; Galatia 5:22, 23.) E faariro taua tauiraa ra i taua mau taata ra ei rata haamaitairaa o te paraparau maramarama roa ˈˈe i te hoê noa ˈˈe rata papaihia e tatou aore ra e te hoê faanahonahoraa ite-mata-hia o te nehenehe e tono atu ia tatou.

19. Mea nafea to Paulo faataaraa i te tiaraa o te mau ‘orometua o te faufaa apî’, e eaha te ohipa ta ta ratou taviniraa e faatupu ra i nia i te mau melo o te feia rahi?

¹⁹ Te parau faahou ra o Paulo i roto i te Korinetia 2, 3:4-6, e: “O te huru ïa o to matou manaˈo i te Atua i noaa i te Mesia ra. E ere râ mai te mea e e au ia matou iho ia manaˈo e, e tia te hoê mea iti ia matou anaˈe iho, no ǒ mai râ i te Atua ra to matou tia; o tei faariro atoa ia matou ei orometua itoito i te faufaa apî nei.” Inaha, noa ˈtu e o te mau melo anaˈe o te toea faatavaihia o tei riro ei mau ‘orometua no te hoê faufaa apî’, ua ohipa râ ta ratou taviniraa i nia i te feia rahi o te mau mamoe ê atu, e e ohipa atoa te reira i nia i te hoê numera o te ore e nehenehe e taiohia o te tahi atu mau mamoe ê atu o tei tia ia haaputuputu-atoa-hia. O te reira ta te mau Ite no Iehova atoa e tiai ra ma te tiaturi, te hoê tiaturiraa ta ratou e atuatu ra i roto i te Atua ra o Iehova, maoti o Iesu Mesia. Ma te mauruuru, te faaitoito nei te toea o te mau kerisetiano faatavaihia i te mau melo o te feia rahi, ia apiti atu ma to ratou mafatu atoa i te ‘papairaa i taua episetole ra’, oia hoi te apitiraa ˈtu i roto i te taviniraa ta Iesu Mesia i tohu i roto i te Mataio 24:14 e i roto i te Mataio 28:19, 20.

20. a) Eaha ta te Buka matahiti e parau ra no nia i te feia e haaparare ra i te noˈanoˈa o te ite no nia i te Atua? b) Eaha ta tatou paatoa e nehenehe e parau no nia i to tatou aravihi i roto i te taviniraa no te ‘papai i te hoê rata’?

²⁰ O te mea ïa ta ratou e rave nei, mai ta te tabula no roto mai i te Buka matahiti 1990 e haapapu maira. Te faaite ra taua tabula ra e te haaparare nei te mau Ite no Iehova i te noˈanoˈa o te ite no nia i te Atua i roto e 212 fenua. Ua hau atu ïa ratou i te 3 787 000 feia poro itoito, e i te matahiti noa i mairi aˈenei, ua rave ratou fatata e 835 000 000 hora no te pororaa i te parau apî o te Basileia. I te matahiti i mairi aˈenei, i te Oroa haamanaˈoraa o te poheraa o te Mesia, ua haaputuputu mai e 9 479 064 taata. E nehenehe te mau melo o te toea i faatavaihia e te feia rahi o te mau mamoe ê atu e parau e: “No ǒ mai râ i te Atua ra to matou tia.” Aore ra mai ta te The Jerusalem Bible e parau ra: “To tatou ite atoa, no ǒ mai ïa i te Atua ra.”

21. Eaha tei tia ia tatou paatoa ia rave, e no te aha?

²¹ No reira, a haaparare na i te noˈanoˈa mǎrû no nia i te Atua, o te horoa i te ora, i te mau vahi atoa! A rave na e ia î roa te mataˈi o te tabula fenua o ta outou amuiraa i te noˈanoˈa o te ite no nia ia Iehova. I reira, mai te hoê Tenerara teotaratia o tei upootia, e aratai o Iehova ia outou i roto i ta ˈna haereraa tiaa taata apee hanahana e ta ˈna mau Ite atoa e haere ra i mua i teie mahana i roto i taua taviniraa hanahana ra!

[Nota i raro i te api]

Eaha ta outou e pahono atu?

◻ Eaha te faahohoˈaraa ta Paulo e rave ra i roto i te Korinetia 2, 2:14-16?

◻ Eaha te ohipa e tupu ra i nia i te feia o tei haapararehia i te noˈanoˈa o te ite no nia i te Atua?

◻ O vai anaˈe o tei aravihi no te haaparare i taua noˈanoˈa ra, e no te aha?

◻ No te aha aita e faufaa no te mau taata e haaparare ra i te noˈanoˈa, i te hoê parau faatia papai-rima-hia no te faatupu i ta ratou taviniraa?