Te mau tiare — Ohipa maerehia no roto mai i te poieteraa
E ERE anei i te mea maere mau ia itehia te mau tiare nehenehe mau e te rau te huru, ia uaˈa mai, i muri aˈe i te ueueraahia ˈtu te mau huero huru rau i roto i te hoê â repo? E faaoaoa mai teie panairaa peni huru rau nehenehe mau, e te mau noˈanoˈa atoa, ia tatou nei.
Oia mau, e parau te tahi pae e te huru peni e te noˈanoˈa o te mau tiare e mea titau-noa-hia ïa no te huti mai i te mau manumanu o te faatito i te mau tiare. Tera râ, mai te peu e, te reira anaˈe te tumu no taua nehenehe rahi, no te aha ïa te mau tiare e faaoaoa rahi mai ai ia tatou? No te aha hoi ratou e faatupu mai ai i roto ia tatou nei, te hau i roto i to tatou feruriraa, e te hoê huru au mau?
E mea papu maitai, ia ite anaˈe tatou i te tiare, e oaoa rahi ïa te tupu mai. E nehenehe te mau peni puai o te hoê ruru tiare e haamaramarama oioi i te mata o te hoê vahine aore ra o te hoê metua vahine, e tamahanahana i te hoê hoa tei pohehia i te maˈi, e faaitoito i te hoê taata paruparu, e oia atoa e faatupu mai i te auhoa aore ra te here. E ere anei i te mea au-rahi-hia, ia ori haere i roto i te hoê aua î i te mau tiare? Teihea haamaramarama, teihea fare utuutu o tei ore i faaunaunahia aore ra teihea piha aparauraa o tei ore i taui roa te huru, auaa maoti te mau tiare nehenehe e te au? Auê ïa ao peapea e, ahani e aita te mau tiare!
Aita te mau 250 000 huru tiare i tupu noa mai. Ua riro ratou ei faaiteraa no te here o to tatou ra Atua o Iehova, i te fetii taata nei. Noa ˈtu e i teie anotau, ua tuinohia te fenua nei e te taata, te fatata maira râ te tau, e faarirohia ˈi oia ei Paradaiso, ia au i te opuaraa a te Atua. I reira, ia au i te Parau i faauruahia mai e te Atua, “e rearea te medebara e te vahi pâpâmaro ra no ratou; e oaoa hoi te fenua aihere e e ruperupe hoi mai te tiare ra: e ruperupe rahi ïa, e ouˈauˈa noa ma te oaoa e te himene”. — Isaia 35:1, 2.
[Hohoˈa i te api 16, 17]
A haamata na nia na te pae aui e na roto i te ohuraa o te mau nira o te hoê uati: te mau aute, dimorphoteca, roti thé hybride, nénuphar.