Uiraa a te feia taio

Afea te ohipa pororaa e hope ai?

Ua parau Iesu: “E porohia te parau apî oaoa o te Faatereraa arii e ati aˈe te fenua ia ite te mau nunaa atoa, i reira ïa te hopea e tae mai ai.” (Mat. 24:14) O telo te taˈo Heleni tei hurihia ei “hopea” i roto i teie irava e na irava 6 e 13. O te hopea o te ao a Satani i Aramagedo tera e parauhia ra. (Apo. 16:14, 16) Te auraa ïa, e tamau tatou i te poro i te parau apî oaoa tae roa i tera taime. E faatanoraa apî ïa teie i ta tatou i haapii noa na.

Na mua ˈˈe, i manaˈo na tatou e faaea tatou i te poro ia tupu te ati rahi, i te taime e haamouhia ˈi o Babulonia rahi. (Apo. 17:3, 5, 15, 16) I tiaturi na tatou e ia tupu te ati rahi, ua taere roa no te feia aita â i farii atura i te parau apî oaoa. (Isa. 61:2) I manaˈo atoa na tatou e te feia o te ora ˈtu i te ati rahi, o te feia anaˈe ïa tei vai taiva ore ia Iehova hou a tupu ai te ati rahi. Ua faaau tatou ia ratou i te ati Iuda tei ora mai i te haamouraahia o Ierusalema i te matahiti 607 hou te tau o Iesu. Ua tuuhia te tahi tapao i nia i to ratou rae no te ora ei auraa parau, no te mea ua haamori ratou ia Iehova e ua haapae i te ino. (Ezk. 5:11; 9:4) Aita râ teie manaˈo e tuati ra i ta Iesu i parau i te Mataio 24:14. Te faaite ra hoi teie irava e taime â to te taata no te farii i te parau apî oaoa hou a tae mai ai te hopea o teie nei ao i Aramagedo.

No teie faatanoraa apî i te Mataio 24:14, e faatano-atoa-hia te tatararaa o te Apokalupo 16:21 no nia i ta tatou poroi faaauhia i te ûa paari. Ua tuati teie na irava. Mea nafea ïa? Te faataa ra te Bibilia i te huru o te taata i nia i te parau apî oaoa o te Faatereraa arii. Ua papai Paulo e no “te feia e faaorahia,” e “hauˈa ora ïa” te poroi o te parau apî oaoa. Area no te mau enemi o te Atua, e “hauˈa pohe ïa.” (Kor. 2, 2:15, 16) Mea au ore na ratou taua poroi ra, no te mea te faaitehia ra mea ino te ao ta ratou e poihere nei, o Satani hoi te faatere. E fatata te reira i te haamouhia.—Ioa. 7:7; Ioa. 1, 2:17; 5:19.

A tapao atoa na e ûa paari “ino mau” te topa mai ei auraa parau. Te auraa ïa, i te roaraa o te ati rahi, a rave-faahope-hia ˈi te ohipa pororaa, e ite roa te taata atoa o Iehova te iˈoa o te Atua. (Ezk. 39:7) No reira, ua mou anaˈe o Babulonia rahi, te vai ra anei o te farii i ta tatou poroi, “mea noˈanoˈa” hoi? E, te vai ra. Peneiaˈe e haamanaˈo vetahi e mea maoro to te mau Ite no Iehova faaararaa e mou o Babulonia rahi. No te tahi atu râ, a tahi ra ïa a faaroo ai i tera poroi.

Tera atoa tei tupu i Aiphiti i tahito ra i te tupuraa na ati ahuru. I muri iho i to Iehova ‘faautuaraa i te mau atua atoa o Aiphiti,’ ua haere “te hoê nahoa taata ěê” na muri i te nunaa Iseraela. (Exo. 12:12, 37, 38) Ua faaoti ratou e apee i to Iehova nunaa, ua ite mata hoi ratou i te tupuraa na ati ahuru mai ta Mose i faaara.

Te taata atoa o te fariu ia Iehova ra i muri mai i te haamouraa o Babulonia rahi, e nehenehe ïa ratou e turu i te mau taeae o te Mesia e toe ra i te fenua nei. (Mat. 25:34-36, 40) Hou rii noa ia Aramagedo, ua reva anaˈe te toea o te mau mero faatavaihia i te raˈi, e haavahia ˈi te taata ei mamoe aore ra eita.

Te haapapu maitai ra teie faatanoraa apî i to Iehova here rahi e to ˈna aroha hamani maitai. Inaha, “aita oia e hinaaro ra ia haamouhia te hoê, te hinaaro nei râ ia noaa i te taata atoa te tatarahapa.”—Pet. 2, 3:9.