E auraro atu outou i to outou mau aratai

“E faaroo i to outou mau aratai, e auraro atu outou; te faaitoito ra hoi ratou i to outou mau varua [i nia ia outou], e faaitehia hoi ta ratou parau.” — HEBERA 13:17.

1. Eaha te mau haamaitairaa e noaa mai ia tatou i te hiˈopoaraa a te mau matahiapo?

I TO tatou nei tau, “i te tau hopea”, te horoa mai nei Iehova i te tahi mau tiaau no ta ˈna faanahonahoraa (Daniela 12:4). Te faaite nei taua mau taata ra i te hiˈoraa na roto i te haapao-maite-raa i te mau “mamoe”, teie e ite nei i te tamahanahanaraa (Isaia 32:1, 2). Hau atu, ua riro te opuaraa here mau a te mau matahiapo e aupuru maite nei i te nǎnǎ i te Atua ei parururaa ia ratou no nia ia Satani e te amuiraa iino o te mau mea nei. — Ohipa 20:28-30; Petero 1, 5:8; Ioane 1, 5:19.

2. Eaha ta vetahi pae i parau na i nia i te aposetolo Paulo, eaha ra hoi te mau manaˈo te tia ia tatou ia faaohipa no te mau matahiapo?

² Teie râ, mea nafea ta outou huru hiˈoraa i te mau matahiapo? Te parau ra anei outou i roto ia outou iho e: ‘Ia farerei vau i te hoê fifi, eita roa ˈtu vau e haere e farerei i te hoê matahiapo i roto i te amuiraa, no te mea aita roa ˈtu vau e tiaturi i te hoê noa ˈˈe o ratou’? Ia na reira outou i te feruri, e ere anei no te mea e te faaea noa ra outou i nia i to ratou mau huru tia ore? I Korinetia i tahito ra, ua parau na vetahi pae no te aposetolo Paulo e: “E mea teimaha ta ˈna episetole e te uˈana, area te huru o to ˈna tino, aore ïa itoito, e te reo vahavaha.” Teie râ hoi, ua horoa ˈtu te Atua i roto i to ˈna rima i te hoê taviniraa e ua faaohipa hoi ia ˈna ei “aposetolo a te Etene [te mau nunaa]”. (Korinetia 2, 10:10; Roma 11:13; Timoteo 1, 1:12.) Te tiaturi nei râ matou e hoê â to outou manaˈo e to teie vahine kerisetiano tei parau i te hoê mahana e: “O ta matou tino aratai o te matahiapo maitai roa ˈˈe o te ao nei. I te mea e ia hinaaro anaˈe matou ia ratou, te vai ra ratou.”

No te aha e auraro ai ia ratou?

3. Mai te peu e e hinaaro tatou ia parahi mai te Fatu i pihai iho ia tatou, nafea ïa tatou ia hiˈo i te mau tiai kerisetiano?

³ I te mea hoi e o te Tiai rahi, te Atua ra o Iehova te tumu o te mau tiai kerisetiano, te hinaaro maira ïa oia ia faariro tatou ia ratou mai te aha te huru? Papu maitai, te hinaaro ra oia ia pee maite tatou i te aratairaa niuhia i nia i te Bibilia ta taua mau matahiapo aroha mau ra e horoa mai nei i raro aˈe i te hiˈopoaraa a te Tino aratai a te mau Ite o Iehova. Ia auraro tatou ia ratou, ‘tei pihai iho ïa te Fatu ia tatou’, e e ite mau tatou i te hau e e itoito i te pae varua. — Timoteo 2, 4:22; hiˈo Ohipa 9:31; 15:23-32.

4. Nafea tatou iho e nehenehe ai e faaohipa i te Hebera 13:7?

⁴ Teie te aˈoraa a Paulo ia tatou: “E haamanaˈo i to outou mau aratai, o tei parau mai ia outou i te parau a te Atua, e pee atu i to ratou faaroo, ma te manaˈo maite i te hopea o ta ratou parau.” (Hebera 13:7). Na mua ˈˈe, o te mau aposetolo te upoo o te mau kerisetiano matamua. I to tatou nei tau, e nehenehe tatou e ite i te mau melo o te Tino aratai o te mau Ite o Iehova, te tahi atu mau tiaau faatavaihia e te mau melo o te “feia rahi roa” tei riro ei aratai no tatou (Apokalupo 7:9). Noa ˈtu â ïa e eita tatou e aˈohia maira ia pee i ta ratou huru paraparau, i to ratou huru haerea aore ra te tahi atu mau huru to ratou, e faaitoito râ tatou ia riro to tatou haerea ei haerea maitai na roto i te peeraa i to ratou faaroo.

5. I to tatou nei tau, i nia i te fenua nei, tei ia vai ra te hopoia teimaha roa te haapaoraa i te amuiraa kerisetiano, e eaha te tia ia rave no taua mau taata ra?

⁵ I to ratou nei tau, i nia i te fenua nei, tei “te tavini haapao maitai e te paari” te hopoia no te faaî maite i to tatou mau hinaaro i te pae varua. O to ˈna tia, te Tino aratai, to mua roa e teie e faanaho nei i te ohipa pororaa a te Basileia i roto i te ao taatoa nei (Mataio 24:14, 45-47). E nehenehe tatou e faariro taa ê i te mau tiaau faatavaihia e te varua mai te mau ‘aratai’ i te pae varua, inaha e nehenehe e hurihia te Hebera 13:7 mai teie te huru: “Ia faaroo maite na outou i te feia e aratai ra ia outou.” (Kingdom Interlinear). I te mea hoi e te vai ra hau atu i te 60 000 amuiraa e hau atu i te 3 500 000 feia poro i te Basileia, “e rahi â [ta te mau matahiapo e 12 e o ratou te Tino aratai] te ohipa a te Fatu ra” (Korinetia 1, 15:58.) E no te ohipa ta te Atua i horoa mai ia ratou ra, mea tano mau iho â ia tahoê maite atu tatou ia ratou, mai te tino aratai i fanao i te senekele I i te autahoêraa a te mau kerisetiano matamua. — Ohipa 15:1, 2.

6. Eaha vetahi mau mea e ravehia nei e te mau matahiapo ei maitai no te mau tavini a Iehova?

⁶ Na te varua e haamau i te mau tiaau no te faaî i te mau hinaaro i te pae varua a te amuiraa (Ohipa 20:28). Te ara nei ratou e ia porohia te poroi o te Basileia i roto i te tuhaa fenua o ta ratou amuiraa. Te horoa atoa mai nei taua mau taata aravihi ra mai ta te mau Papai e titau ra i te hoê aratairaa i te pae varua ma te here mau. Te aˈo nei ratou, te tamahanahana nei i to ratou mau taeae e mau tuahine kerisetiano, e te horoa ˈtu nei hoi i mua ia ratou i te faaiteraa ia nehenehe â ratou e tamau â i te haere i te haerea e auhia mai ai e te Atua (Tesalonia 1, 2:7, 8, 11, 12). I te taime atoa te hoê taata e hape ai hou aˈe o ˈna e ite ai, e tamata taua mau taata nei i te faatitiaifaro ia ratou “ma te aau mǎrû”. — Galatia 6:1.

7. Eaha te aˈoraa ta Paulo i horoa mai i roto i te Hebera 13:17?

⁷ Te hinaaro nei tatou e tahoê maite atu e taua mau tiaau here mau ra, inaha teie hoi ta Paulo i papai: “E faaroo i to outou mau aratai, e auraro atu outou; te faaitoito ra hoi ratou i to outou mau varua [ia outou], e faaitehia hoi ta ratou parau; ia na reira râ ratou ma te oaoa, eiaha ma te oto: e ore hoi e faufaahia ta outou i te reira.” (Hebera 13:17). Eaha ïa te auraa o taua aˈoraa nei no tatou?

8, 9. a) Ia au i te Hebera 13:17, no te aha tatou e auraro ai i to tatou mau aratai? b) Eaha te mau faahopearaa maitai e nehenehe e noaa mai i to tatou faaroo e i to tatou auraro?

⁸ Te aˈo maira o Paulo ia tatou ia faaroo i te feia e aratai ra ia tatou i te pae varua. E tia ia tatou ia “auraro” i taua mau tiai ra. No te aha? No te mea ‘te haapao ra ratou ia tatou ma te tuutuu ore’, ia tatou tei pûpû ia tatou no te Atua. E nafea hoi ‘ratou ia haapao ia tatou ma te tuutuu ore’? Te auraa o te iho parau haa heleni ra agrupnéô, e faaohipahia no te faahiti i te mau ohipa e ravehia i teie nei, oia ïa “ia ore [te mau matahiapo] e taoto”. Te faahaamanaˈo hoi te reira ia tatou i te tiai mamoe hoê ra e ore roa ˈtu e taoto no te paruru i ta ˈna nǎnǎ i te mau fifi e farereihia i te po. I te tahi taime, eita te mau matahiapo e taoto i te po no te pure ei maitai no te nǎnǎ a te Atua aore ra no te haere atu e tauturu i to ratou mau hoa kerisetiano i te pae varua. Ia haapopou rahi na ïa tatou i ta ratou taviniraa haapao maitai. Papu maitai, eita tatou e hinaaro e tia i te “feia paieti ore” oia hoi, i te tau o Iuda, ‘e vahavaha na i te mau tavana, e e faaino na i te feia toroa’, oia hoi te mau tiaau kerisetiano faatavaihia, e i te hanahana, e te tura, ta te Atua i horoa mai no ratou. — Iuda 3, 4, 8.

⁹ Eita roa ˈtu Iehova e farii ia tatou mai te peu e eita tatou e faaroo e eita atoa tatou e auraro i te mau tiaau kerisetiano. E riro hoi taua huru nei i te haafifi i ta ratou ohipa e i te faaino atoa ia tatou i te pae varua. Mai te peu e eita tatou e tahoê, e riro ïa te mau matahiapo i te rave i ta ratou mau hopoia ma te amuamu e ma te rohirohi, e riro atoa hoi te reira i te faaere ia tatou i to tatou oaoa i roto i te mau ohipa kerisetiano. Teie râ, e turu to tatou faaroo e to tatou auraro i te hoê haerea paieti e e faaitoito hoi i to tatou faaroo. ‘Tei pihai iho te Fatu i te huru feruriraa ta tatou e faaohipa ra’, e e oaoa roa tatou i roto i taua huru tupuraa ra e itehia ˈi te autahoê e te hau. — Timoteo 2, 4:22; Salamo 133:1.

10. Ia au i te Timoteo 1, 5:17, no te aha te feia e peretiteni maitai e tano ai ia faaturahia?

¹⁰ I te mea hoi e e faaroo tatou e e auraro tatou i te mau matahiapo o te amuiraa, e ere ïa te auraa e te hinaaro ra tatou ia au mai taua mau taata ra ia tatou. Eita roa ˈtu ïa te reira e tano i te mau Papai, no te mea i te senekele I, e faaitoitohia na te mau tavini kerisetiano ia auraro i to ratou mau fatu ‘eiaha no te mea e te hiˈopoahia maira ratou, mai te huru ra ïa e te hinaaro ra ratou ia au mai taua mau taata ra ia ratou, ma te aau rotahi râ, e te mǎtaˈu ia Iehova’. (Kolosa 3:22; Ephesia 6:5, 6.) Mai te peu e e tia mau i te mau tiaau ‘e peretiteni maitai e e rahi atu â ta ratou ohipa i roto i te parau e i roto i te haapiiraa’ ia faaturahia, no te mea ïa ua niuhia ta ratou haapiiraa i nia i te Parau a te Atua. Inaha, teie hoi ta Paulo i papai: “O te mau peresibutero i faaite maitai ra, ia rahi atu ïa i te faatura ˈtu, ia hau atu râ i tei ohipa i te aˈo e te haapii ra. Te na ô maira hoi te parau i papaihia ra e, Eiaha oe e tavaha i te puaatoro ia taataahi i te sitona ra. E, E au i te rave ohipa ta ˈna ra utua.” — Timoteo 1, 5:17, 18.

11. Nafea te hoê matahiapo e nehenehe ai e “faatura-rahi-hia”, eaha râ te ore e tia ia ˈna ia rave?

¹¹ Te haapapu maira teie mau parau a Paulo e e nehenehe ta tatou, e mea tano hoi, e hopoi i te hoê tauturu materia i te feia e haapao ra i te mau faufaa pae varua o to ratou mau hoa. E ere ïa te auraa e e tia mau â te mau matahiapo ia aufauhia i te tahi tuhaa moni. Eita atoa te hoê matahiapo e faahepo e ia “rahi atu â [oia] i te faaturahia”. Peneiaˈe e horoa noa ˈtu te mau melo o te amuiraa, ma te ore e faahepohia na ˈna, eita roa ˈtu râ oia e faaohipa i to ˈna tiaraa no te faarahi i to ˈna mana aore ra i ta ˈna mau taoˈa materia. Eita atoa oia e imi i to ˈna iho hanahana e eita atoa e amuimui atu i roto i te mau taata moni roa ˈˈe e noaa mai ai te tahi maitai materia ia ˈna, e aore atu ai e haapao i te tahi pae (Maseli 25:27; 29:23; Iuda 16). E tia râ i te hoê tiaau ia faaamu i te nǎnǎ a te Atua, ‘no te hinaaro râ; eiaha no te taoˈa tia ore ra ia noaa, no te tae mau râ o te aau.’ — Petero 1, 5:2.

12. Eiaha roa ia moehia ia tatou i te aha e nehenehe ai tatou e ohie roa i te auraro i to tatou mau aratai?

¹² E ohie roa ˈtu â tatou i te faaroo i to tatou mau aratai e i te faatura ia ratou ia haamanaˈo tatou e na te Atua iho i horoa mai i te mau matahiapo (Ephesia 4:7-13). I te mea hoi e, na te varua i haamau ia ratou e e parahiraa faufaa roa to te faanahonahoraa a te Atua i roto i to tatou oraraa Ite o Iehova, e hinaaro mau ïa tatou e faaite i to tatou mauruuru e to tatou faatura i te mau faanahonahoraa teotaratia i ravehia. Hau atu, e nehenehe tatou e tauturu i te feia i ô apî mai i roto i te amuiraa ia faaohipa i taua huru nei ma te horoaraa ˈtu ia ratou i te hiˈoraa nehenehe roa i te pae no te faaroo e te auraro i te feia e aratai ra ia tatou.

No te aha e haapopou maite ai i ta ratou taviniraa?

13. a) Eaha te mau huru au ore e itehia ra i roto i te ao nei e i roto i te faanahonahoraa a te Atua no nia i te mana? b) Eaha te mau tumu tatou e tiaturi ai i te mau taata e aratai ra ia tatou? c) Maoti hoi i te faahiti noa i te mau huru tia ore o te mau matahiapo itoito mau, eaha te tia ia tatou ia rave?

¹³ Te itehia nei i roto i te ao nei e aita roa ˈtu te mana e faaturahia ra. Ta te tahi ïa taata orero i parau i te na ôraa e: “I te mea hoi e ua faateitei-roa-hia te faito ite i te aravihi, e no te mau faaino rahi hoi o te mau pǐpǐ, eita ˈtura ïa e nehenehe faahou e faatere ia ratou.” Aita te huru feruriraa e fatere ia ˈna iho e itehia ra i roto i te faanahonahoraa a te Atua, e e nehenehe ta tatou e tiaturi i te mau taata e aratai ra ia tatou. Ei hiˈoraa, o te feia anaˈe e farii i te mau huru e titauhia ra e te Bibilia te nominohia ei matahiapo (Timoteo 1, 3:1-7). E tauturu te faaineineraa e noaa ia ratou, ia riro ei mau taata hamani maitai, te here e te tavini hoi i te tahi pae, e oia atoa ia paruru maite i te mau faaueraa tumu a Iehova. Te tapea maite nei ratou i te parau mau bibilia, ‘ma te ati maite i te parau e nehenehe ratou e aˈo na roto i te haapiiraa o te faaora’. (Tito 1:5-9.) Papu maitai, eita e tia ia tatou ia faahiti noa i to ratou mau huru taata tia ore, inaha e mau taata tia ore anaˈe hoi tatou paatoa (Te mau Arii 1, 8:46; Roma 5:12). Maoti i te riri no to ratou huru paruparu e te ore e tâuˈa i ta ratou mau aˈoraa, e farii anaˈe na i te aratai i niuhia i nia i te Bibilia ta te mau matahiapo e horoa mai nei, ma te ite e no ô mai te reira i te Atua ra.

14. Eaha te manaˈo e faaitehia ra i roto i te Timoteo 1, 1:12 ta te hoê matahiapo e faaohipa no te taviniraa i horoahia ˈtu ia ˈna ra?

¹⁴ Teie ta Paulo, tei faaite hoi i to ˈna mauruuru, i parau: “E te haamaitai nei au i to tatou nei Fatu i te Mesia ra ia Iesu, i tei faaetaeta mai ia ˈu nei, oia i parau ia ˈu i te haavare ore, e ua faatoroa orometua mai ia ˈu nei.” (Timoteo 1, 1:12). I roto i taua taviniraa ra, te vai ra ïa te ohipa pororaa e te tauturu ta ˈna e hopoi atu na i to ˈna mau hoa kerisetiano. Parau mau, na te varua moˈa e haamau i te hoê tiaau no te rave i te ohipa tiai, eiaha râ o ˈna e manaˈo e ua hau aˈe o ˈna i te tahi pae, inaha no roto atoa oia iho i te nǎnǎ no te mau “mamoe” a te Atua (Petero 1, 5:4). E tia râ ia ˈna ia faaite i to ˈna aau mehara no te Upoo o te amuiraa, oia hoi o Iesu Mesia, tei farii mai e e nehenehe mau iho â ta ˈna e tavini i te mau melo o te nǎnǎ, e oia atoa i te Atua tei faaaravihi mai ia ˈna i te horoaraa mai i roto i te tahi faito i te ite, te paari e te maramarama (Korinetia 2, 3:5). I te mea hoi e e tia mau iho â i te hoê matahiapo ia mauruuru no te mau haamaitairaa ta te Atua i horoa mai na ˈna, e tia i te tahi atu mau melo o te amuiraa ia haapopou i te taviniraa ta ˈna e faatupu ra.

15. Eaha te auraa o te aˈoraa i horoahia maira e Paulo i roto i te Tesalonia 1, 5:12, 13?

¹⁵ Te haapopou nei te mau Ite o Iehova i te faanahonahoraa ta te Atua i faanaho i to tatou nei tau, i te mau mahana hopea nei, e e faaitoito hoi to ratou mauruuru ia ratou ia faatura i te mau matahiapo. E tia ia tatou ia oaoa roa i te apee maite i te mau faanahoraa ta ratou e rave nei ei maitai no tatou. Teie hoi ta Paulo i parau: “Te aˈo atu nei râ matou ia outou, e te mau taeae, e ite atu outou i te feia i rave i te ohipa i roto ia outou na, o te mau faaite i nia iho ia outou i te Fatu nei, o tei aˈo atu hoi ia outou; e ia rahi roa te faatura ia ratou ma te aroha, no ta ratou ra ohipa.” (Tesalonia 1, 5:12, 13). E mau taata oaoa te mau taata e pee nei i teie nei aˈoraa, e te haamaitai mai nei Iehova ia ratou.

Ia haavitiviti na tatou i te faaohipa i ta ratou mau aˈoraa

16, 17. Eaha te aˈoraa ta te mau matahiapo e rave i te tahi taime no nia i te faaipoiporaa, e eaha hoi te haamaitairaa e noaa mai ia pee tatou i taua aˈoraa ra?

¹⁶ Ua faaitoito atu o Paulo ia Tito e ia ‘aˈo hua ˈtu, ia faaite hua ˈtu, ei parau tumu ïa’. (Tito 2:15.) I to tatou atoa nei mau mahana, te feia i tia no te Atua, te huti nei hoi ratou i to tatou manaˈo i nia i te mau faaueraa tumu e te mau ture bibilia. No reira e tia mau ia tatou ia tâuˈa i te faaitoitoraa e horoa-pinepine-hia mai nei ia tatou nei, oia hoi te peeraa i te mau aˈoraa e te aratairaa e horoahia mai nei e te faanahonahoraa a Iehova e te mau matahiapo.

¹⁷ Ei hiˈoraa, e feruri anaˈe na e e tia i te mau matahiapo ia aˈo i te hoê kerisetiano ia faaohipa oia i te aˈoraa bibilia e faaipoipo “ia au râ i te Fatu”. (Korinetia 1, 7:39; Deuteronomi 7:3, 4.) E nehenehe ta ratou e faahaamanaˈo atu ia ˈna e e riro te faaipoiporaa i te hoê taata aita i bapetizohia i te faatupu i te mau fifi ino roa, mai te roohia i nia i te arii ra o Solomona, tei rave i te hoê hape ino roa i te raveraa i te mau vahine ěê. Oia mau, ua faaitoito taua mau vahine nei ia ˈna ia fariu tia i nia i te mau atua haavare e ua haafariu ê hoi te reira ia ˈna ia Iehova (Te mau Arii 1, 11:1-6). E nehenehe atoa te mau matahiapo e faataa ˈtu ia ˈna e ua faaue o Ezera i te mau ati Iuda e faahoˈi i ta ratou mau vahine etene, e ua parau atu o Nehemia i te feia i faaipoipo na i te mau vahine aita e haamori ra i te Atua e ‘e hara rahi hoi ta ratou i mua i te Atua’. (Nehemia 13:23-27; Ezera 10:10-14; hiˈo i te Te Pare Tiairaa no te 15 no tiunu 1982, api 31; no te 15 no novema 1986, api 26 e tae atu i te 30 na roto i te reo farani.) Te feia e pee i teie nei aˈoraa bibilia e horoahia nei e te mau matahiapo here mau, e riro ïa i te noaa mai ia ratou i te mau haamaitairaa e e oaoa atoa hoi ratou i te mea e e farii mai Iehova ia ratou.

18. Ia au i ta Paulo e papai i roto i te Korinetia 1, 5:9-13, eaha te tia ia tatou ia rave mai te peu e e tiavaruhia te hoê melo o to tatou utuafare fetii?

¹⁸ Mea tano atoa ia faatura tatou i te mau opuaraa i ravehia e te mau matahiapo i te pae no te haavaraa. Ua na ô atura hoi o Paulo i te mau kerisetiano no Korinetia e “eiaha outou e amui atu i te taata i parauhia e taeae ia riro ei taiata, e te nounou taoˈa, e te haamori idolo, e te faaino, e te taero ava, e te haru; e eiaha atoa e amu noa ˈtu i te maa i reira”. E tia hoi ia ratou ia ‘faataa ê atu i taua taata parau ino ra i roto ia ratou na’. (Korinetia 1, 5:9-13.) E nafea ïa outou mai te peu e e tiavaruhia te hoê taata piri roa ia outou? Noa ˈtu â ïa e e tia ia tatou ia taotia i ta tatou mau farereiraa e te hoê fetii tei tiavaruhia no te faatitiaifaro i te tahi mau tumu parau i te pae fetii, ia faaore roa ïa tatou i te mau taatiraa i te pae varua e o ˈna (hiˈo i Te Pare Tiairaa o te 1 no me 1988, api 3 e tae atu i te 7). Oia mau, e tia hoi to tatou haapao maitai i te Atua e i ta ˈna faanahonahoraa ia faaitoito ia tatou ia faatura i te mau opuaraa e ravehia e te mau tiaau i te pae no te haavaraa.

19. Eaha te tia ia tatou ia rave ia faaite mai te mau matahiapo ia tatou e te hape ra tatou i te purumu i te pae varua?

¹⁹ E ere i te mea ohie ia faaea noa i nia i te eˈa pirihao e aratai tia ˈtu i te ora. Ia tapae tatou, e tia ia tatou ia pee i te aratairaa e horoahia mai nei e te Parau a te Atua e te feia tei ia ratou te hopoia no te faaamu i te mau melo o ta ˈna faanahonahoraa (Mataio 7:13, 14). A feruri anaˈe na tatou e ia haere tatou na nia i te pereoo mai tera oire e tae atu i te tahi oire, e hape tatou i te purumu. E tia iho â ïa ia itea mai ia tatou i te aratairaa maitai, mai te peu eita ra eita roa ˈtu ïa tatou e tapae. Oia atoa, mai te peu e te faaite mai nei te mau matahiapo ia tatou e, i te pae varua, te hape ra tatou i te purumu, na roto paha i te amuimuiraa ˈtu i te hoê taata aita to roto i te parau mau, e tia ia tatou ia haavitiviti i te faaohipa i ta ratou aˈoraa bibilia. Tera te hoê ravea no te faaite e ‘te tiaturi mau ra tatou ia Iehova’. — Maseli 3:5, 6.

Ia faatura na tatou ia ratou i roto atoa i te mau mea haihai ra

20. Eaha te mau uiraa ta tatou e nehenehe e uiui no te faatura i te mau aratairaa a te mau matahiapo i roto i te mau mea iti ra?

²⁰ E tia ia tatou ia faatura i te aratairaa a te mau matahiapo i roto atoa i te mau mea iti ra. Ia uiui na ïa tatou i teie mau uiraa: ‘Te tahoê ra anei vau i te mau matahiapo ia ani mai ratou i te amuiraa e haere farerei i te feia maˈi aore ra e faaineine i te feia poro apî i roto i te pororaa? Te farii ra anei vau ma te ore e amuamu i te mau tumu parau e horoahia mai na ˈu i roto i te mau putuputuraa e te faaineine maitai ra anei au i te reira? E faaroo anei au ia horoa mai te mau matahiapo i te mau aˈoraa no nia i te faaherehereraa paha i te parahiraa i te mau tairururaa, no nia i te huru faaeta aore ra faanehenehe, aore ra i te tahi atu mau tumu parau? Te faaite ra anei au e te tahoê mau ra vau ia ratou ia ani mai ratou ia ˈu e apiti atu i roto i te ohipa tamâraa i te Piha o te Basileia, te oreraa e faataere i te vaiiho i te mau tabula taviniraa aore ra te taeraa ˈtu i te mau putuputuraa i te hora tia?’

21. E faahaamanaˈo maira te faatura ta tatou i faaite atu nei i te mau matahiapo i tei hea mau parau a Iesu?

²¹ Mea anaanatae roa na te mau tiaau o te mau amuiraa ia tahoê atu tatou ia ratou, e riro hoi te reira i te faatupu mai i te mau faahopearaa maitai roa. Inaha, e nehenehe to tatou faatura e to tatou tahoêraa ˈtu ia ratou i roto i te mau mea haihai ra e faahaamanaˈo mai ia tatou i teie mau parau a Iesu e na ô ra e: “O tei haapao maitai i te mea iti ra, ua haapao maitai atoa i te mea rahi.” (Luka 16:10). Eita anei tatou e hinaaro ia parauhia tatou e e feia haapao maitai tatou?

Ia tamau na tatou i te anaanatae i ta ratou hiˈopoaraa here mau

22. Eaha vetahi mau haamaitairaa e noaa mai i te hiˈopoaraa here mau a te tavini haapao maitai e a te mau matahiapo o te mau amuiraa?

²² Te haapapu maira te mau haamaitairaa no roto mai te hiˈopoaraa here mau a te tavini haapao maitai e a te mau matahiapo o te mau amuiraa e te haamaitai rahi maira Iehova i ta ˈna faanahonahoraa i nia i te fenua nei. Hau atu, e tahoê te aratairaa maitai roa ta te mau matahiapo e horoa mai nei i to ratou aravihi e e turu hoi i to tatou autahoêraa. E tauturu atoa te reira ia tatou ia tahoê i ta tatou mau tutavaraa e ia tavini i te Basileia ma te aravihi. Ma te papu maitai, e riro to tatou mauruuru no te hiˈopoaraa e faaohipahia ra e te feia e aratai ra ia tatou, i te haamaitaihia mai e te Atua i roto i te ohipa pororaa e te fariroraa i te mau taata ei pǐpǐ (Mataio 28:19, 20). E faaineine atoa to tatou autahoêraa ˈtu i te mau matahiapo ia tatou no te ora mure ore i roto i te amuiraa apî o te mau mea.

23. Ia au i te Ioane 1, 5:3, e faaitoitohia ïa ia tatou ia aha?

²³ I te mea hoi e mea here na tatou ia Iehova, e ere atura ïa i te ohipa teimaha roa ia auraro roa ˈtu tatou ia ˈna. Teie ta te aposetolo Ioane i papai: “Teie hoi te hinaaro i te Atua, o te haapao i ta ˈna ra parau: e ere hoi ta ˈna parau i te mea teimaha.” (Ioane 1, 5:3). Te auraro nei te mau kerisetiano haapao maitai i te mau faaueraa a Iehova ma te oaoa e te hinaaro mau nei hoi e tahoê i te feia ta ˈna i horoa mai i te hopoia tiaau i roto i te amuiraa. Auê hoi tatou i te mauruuru i te mea e tei roto tatou i te faanahonahoraa a te Atua e i te mea e ua horoa mai oia i taua mau “[taata ra ei maitai]”! (Ephesia 4:8). Ma te tiaturi papu e te aratai ra Iehova i to ˈna nunaa, ia tamau na ïa tatou i te auraro i te feia tei ia ratou te hopoia, oia hoi te riroraa ei aratai no To ˈna mau ite.

Eaha to outou manaˈo?

◻ No te aha e tia ia tatou ia faaroo i to tatou mau aratai?

◻ Eaha te huru te tia ia tatou ia faaohipa no te taviniraa e faatupuhia nei e te mau matahiapo ma te itoito?

◻ No te aha e tia ia tatou ia haavitiviti i te faaohipa i te mau aˈoraa a te mau matahiapo?

◻ Eaha te mau haamaitairaa e itehia e te mau kerisetiano e auraro i te hiˈopoaraa here mau a te mau matahiapo?

[Parau iti faaôhia i te api 27]

Te tahoê ra atura anei outou e te mau matahiapo, na roto paha i te fariiraa i te mau tumu parau e horoahia mai nei na outou i roto i te mau putuputuraa, na roto i te apitiraa ˈtu i roto i te tamâraa i te Piha o te Basileia e te oreraa e haamarirau i te vaiiho i ta outou tabula taviniraa?

[Hohoˈa i te api 26]

Mea oaoa roa na Paulo ia poro i te parau apî maitai e ia tavini i to ˈna mau hoa kerisetiano. E te mau matahiapo, te mauruuru ra anei outou i te mau hopoia no nia i te taviniraa ta te Atua e horoa mai nei na outou?