Mau peu taatiraa hairiiri mau — I tahito ra e i to tatou nei tau
EAHA ïa te huru faufau te haamoriraa ia Moloha, te hoê o te mau atua o te mau ati moabi? Ua papai o Paolo Mantegazza i roto i ta ˈna buka Te taatiraa i te pae tino o te huitaata nei (beretane), e i rave na te mau ati Moabi o te mau tau bibilia i te mau peu taatiraa faufau mau “ma te amu, a ori noa ˈi na te hiti o te tii e ama noa ra a Moloha. Na mua ˈtu, ua amu atura ïa na vaha veo e hitu o taua atua ra i te mau tusia a te feia haamori, mau tusia faraoa ota, manu manu, mau arenio, mamoe oni, puaatoro, e mau tamarii tamaroa apî”. Te na ô ra â te taata i papai i taua buka ra e: “Te taata i taio i te Bibilia, papu maitai e te haamanaˈo ra oia i te mau katararaa riaria mau ta Mose i faahiti i nia i te mau ati Hebera tei taiata e o Moloha. Ua farii atoa te mau ati Iuda ma te anaanatae uˈana ia Baala Peora, te atua au-roa ˈˈe-hia e e mau ati Midiana, tei ore hoi te haamoriraa i iti mai i te faufau ia faaauhia i te mau peu e ravehia na no Moloha.” — Levitiko 18:21, Traduction du monde nouveau, neneiraa beretane faahororaa o te matahiti 1984 ra, nota i raro i te api; 20:2-5; Numera 25:1-5; Ieremia 32:35.
Te itehia ra te “anaanatae uˈana” o taua mau ati Iuda ra i teie nei tau i roto i te “morare apî” i fa mai i te mau matahiti 60 ra, i te mau Etats-Unis iho â ra e i roto i te tahi atu mau fenua o te amuiraa faaroo kerisetiano.
I raro aˈe i te upoo parau ra “Ia faaite tahaa anaˈe na tatou i to tatou manaˈo” a te Medical World News, vea aivanaa i neneihia i Houston (Etats-Unis), ua faataa mai o Alexandra e o Vernon Mark, na taata toopiti i papai i te buka ra The Pied Pipers of Sex, i te mau faahopearaa maoro mau o taua tauiraa rahi ra i te pae no te taatiraa pae tino. Teie ta raua i papai i te matahiti 1985 ra:
“I roto i na 25 matahiti hopea i mairi aˈenei, ua itehia te hoê tauiraa rahi i roto i te mau peu i te pae taatiraa. (...) Ua piihia te toparaa te morare tumu ei tauiraa rahi i te pae no te taatiraa.” I muri aˈe to raua tohuraa i te mau taata e rave i te ohipa i te pae rapaauraa e o ratou te tumu no taua tauiraa i te huru i te pae taatiraa, te na ô ra taua na taata i papai i taua buka ra e: “E mana rahi mau to [taua mau melo e rave ra i te ohipa i te pae rapaauraa], aita e faaauraa na roto i ta ratou turu tataitahi, i nia i te totaiete e i nia i ta ˈna mau faanahoraa atoa. Maoti hoi i te haamauruuru i taua mau taata rave ohipa i te pae no te taatiraa, e tia ia tatou ia faaiti mai i to ratou mana na roto i te faaitoitoraa i te mau taata ia faaohipa i te hoê hiˈoraa mâ e te aifaito i nia i te haerea i te pae taatiraa e i nia i te parururaa i te oraora-maitai-raa o te huiraatira.”
“Aitâ te tupuraa te tauiraa rahi i te pae taatiraa i hopoi mai atura i te mau haamaitairaa no te taatoaraa o te fenua — mai te peu râ e manaˈo tatou i te parau no te moni, e nehenehe iho â ïa e parau e oia. Tera râ, na roto i te vauvauraa mai i te taatiraa i te pae tino mai te hoê peu faaanaanataeraa, mai te hoê ohipa taaro e huti i te manaˈo o te feia mataitai, ua faatupu mai te reira e rave rahi mau fifi, mau maˈi pee no roto mai i te taatiraa i te pae tino, e nehenehe e faatupu i te hoê ati totiare rahi mau. E ere noa te mau maˈi pee no roto i te taatiraa pae tino i te hoê ati apî, ua riro mairâ te reira i teie mahana ei ati rahi mau. Te fa mai nei e rave rahi mau manumanu e mau tirotiro. Te haapohe nei te herpès génital, e ia roohia te taata paari i teie maˈi eita ïa ratou e ora, i te mau aiu fanau apî i roohia i te maˈi roro (méningo-encéphalite). Ua ô (...) rahi roa mai hoi te SIDA i roto i to tatou nei totaiete e tae roa ˈtu i roto i te mau uaua o te feia i pâmuhia ˈtu te toto e te mau taata i roohia i teie maˈi.”
Ua faaoti teie na taata toopiti i papai i taua buka ra i te na ôraa e: “Mea rahi mau te mau pariraa i parihia i nia i te feia i hamani i te tauiraa rahi i te pae no te taatiraa. Ua tǎpǔ mai ratou i te oaoa, te tiamâraa e te oraora-maitai-raa i te pae tino. O te ati ra, te maˈi e tae noa ˈtu te pohe ta ratou i hopoi mai.” Te parau maramarama maitai ra te Bibilia e eaha te mea e tiai maira ia ratou. Ei hiˈoraa, teie ta tatou e taio i roto i te Korinetia 1, 6:9, 10: “Eaha! aita outou i ite e e ore te feia parau-tia ore e parahi i te basileia o te Atua? Eiaha e vare; e ore hoi te taiata, e te haamori idolo, e te faaturi, e te mahu, e te paia, (...) e ore anaˈe ïa e parahi i te basileia o te Atua.” — Hiˈo atoa Iuda 7.