Ia vai nahonaho noa na tatou no te ora ˈtu e no te ite atu i te Mileniuma

“Ia hoê aˈe nǎnǎ, e hoê hoi tiai.” — IOANE 10:16.

1. E faaauhia hoê tausani matahiti i mua i te aro o te Atua mure ore ra, i te aha?

NA IEHOVA i horoa mai i roto i te taata te manaˈo no nia i te tau. No ˈna, no te Atua pohe ore e vai e a muri noa ˈtu, hoê tausani matahiti hoê ïa mahana, e morohi noa, oia hoi mai te araraa hoê i te rui ra. — Salamo 90:4; Petero 2, 3:8.

2. Eaha te taime ta Iehova i haapao no te haamaitai mai i te taatoaraa o te mau taata?

² Ua haapao te Atua i te hoê mahana taipe hoê tausani matahiti i reira hoi oia e haamaitai mai ai i te mau fetii atoa o te fenua nei (Genese 12:3; 22:17, 18; Ohipa 17:31). I roto i taua mau fetii ra, te vai ra ïa te mau taata o tei pohe aˈena e te feia e ora nei â. Nafea hoi te Atua e haamaitai ai ia ratou? Na roto ïa i te ravea o to ˈna Basileia e arataihia e Iesu Mesia, oia hoi te “huaai” o Ta ˈna vahine taipe. — Genese 3:15.

3. a) Mea nafea te avae o te huaai o te vahine a te Atua i te haaparuparuraahia, nafea râ hoi taua pepe ra i te faaoraraahia? b) Ia hope ta ˈna Faatereraa hoê tausani matahiti, eaha ïa te ohipa ta Iesu Mesia e rave i nia i te ophi taipe?

³ Ua haaparuparuhia te poro avae taipe o te Huaai a te vahine a te Atua (ta ˈna faanahonahoraa i nia i te raˈi) ia Iesu i pohe ma te taparahihia i te matahiti 33 e i faaea i roto i te apoo e toru mahana i te maoro. I te toru o te mahana râ, ua faaora maira te Atua Puai hope ra, oia hoi o Te horoa i te ora, i taua pepe ra na roto i te faatia-faahou-raa mai ta ˈna Tamaiti haapao maitai no te oraraa pohe ore i roto i te mau reva varua (Petero 1, 3:18). I te mea hoi e eita roa ˈtu Iesu e pohe faahou, e nehenehe atura ïa ta ˈna e faatere i nia i te huitaata nei hoê tausani matahiti te maororaa e e ‘haaparuparu’ i te afii o te ophi taipe, na roto i te haamou-roa-raa ia ˈna i muri aˈe i te Faatereraa hoê tausani matahiti. Auê hoi haamaitairaa no te mau taata haapao maitai e faahoˈi-faahou-hia i nia i te huru taata tia roa e!

4. Eaha te huru porotarama ta te Atua e aratai nei no to ˈna nunaa?

⁴ Te tupu nei te hoê ohipa rahi roa i te pae no te faanahonahoraa i roto i te nunaa o Iehova i nia i te fenua taatoa nei i roto i te roaraa o te “[hopea o te amuiraa o te mau mea nei]”, mai te hopea mai â o te mau tau o te mau Etene i te matahiti 1914 (Mataio 24:3; Luka 21:24). Na te Atua ra o Iehova te Faanahonaho rahi i hinaaro e, e aratai maira i taua tabula faanahonahoraa ra e tupu na mua ˈˈe i te Mileniuma. Mai ta te tupuraa o te mau parau tohu bibilia e haapapu maira, i te matahiti 1914 ra ua fanau mai ta ˈna vahine, oia hoi ta ˈna faanahonahoraa i nia i te raˈi e faaauhia i te hoê vahine faaipoipo, i To ˈna Basileia i tǎpǔhia mai e e arataihia e Iesu Mesia.

5. Eaha te fanauraa i tohuhia i roto i te Apokalupo 12:5, e afea ra to ˈna auraa i te faataaraahia mai no te taime matamua i roto i te mau api o Te Pare Tiairaa?

⁵ Mea na reira ˈtura ïa te tupuraa teie mau parau i faaitehia i roto i te Apokalupo 12:5 e na ô ra e: “Ua fanau maira ta ˈna e tamaroa, o te riro ia ˈna te tavana i te mau fenua atoa ma te sepeta auri ra: e i haruhia mai ta ˈna tamaiti e hopoihia i nia i te Atua ra i to ˈna ra terono.” I roto i Te Pare Tiairaa no tiunu 1925 te faataa-matamua-raahia mai te parau no nia i te fanauraahia te Basileia o Iehova e arataihia mai e te Mesia, fanauraa i faahohoˈahia e te tamarii fanau-apî-hia e te vahine a te Atua. E taa ê mau â te fanauraahia taua Basileia mesia ra, tei tupu i nia i te raˈi i te matahiti 1914 ra, i te fanauraahia te “nunaa” o te mau ‘tamarii’ no Siona i nia i te fenua nei i te matahiti 1919. — Isaia 66:7, 8.

6. a) Eaha te ohipa i faaite-atea-hia mai e Iesu te tia ia haamata i muri aˈe i te fanauraahia te Basileia? b) Eaha te tia i te mau tavini a Iehova ia rave no te faatupu i taua ohipa ra, e te aha nei ratou i teie nei no te aro atu i teie nei ao?

⁶ Ua riro te fanauraahia te Basileia o Iehova na roto i te ravea e na reira ˈi te Atua i te faatiamâ i to ˈna faatereraa i roto i te ao taatoa nei ei ohipa te tia mau â ia faaitehia na nia i te fenua atoa nei. E ua tae hoi te taime no te faatupu i teie mau parau a Iesu no nia i te mau haapapuraa no to ˈna “taeraa mai” ite-ore-hia i te mata taata nei: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:3, 14). No te poro i roto i te autahoê, ma te au maite i roto i te ao taatoa nei, oia hoi na nia i te fenua atoa nei, e tia mau iho â ïa ia faanaho i te tuhaa ite-mata-hia o te faanahonahoraa a Iehova i roto i te ao nei. O ta te Watch Tower Bible and Tract Society ïa, e tiahia mai i to ˈna peretiteni i taua tau ra e Joseph Rutherford, e hinaaro ra. No reira, i muri aˈe i te tamaˈi, mai te matahiti 1919 iho, ua faanaho maitai anei te feia paruru e haapao maitai atoa hoi o te Taiete ia ratou, ei nunaa e haamau-faahou-hia, na roto i te pureraa i te Atua ra o Iehova, te Faanahonaho teitei, ia aratai mai ia ratou e ia haamaitai mai ia ratou. I roto i te roaraa o te Piti o te Tamaˈi Rahi, noa ˈtu te patoiraa uˈana a te mau fascistes, na te taatiraa nazi e arataihia ra e Hitler e te Taatiraa katolika, i nia i te fenua atoa nei, ua tahoê te mau Ite o Iehova no te aro atu i te ao e patoi maira ia ratou.

7. a) Eaha te mau auraa te tia i te mau tavini a Iehova ia atuatu mau â i rotopu ia ratou mai te peu e e hinaaro ratou e ora ˈtu i te ati rahi ra? b) Na te aha e tauturu ia Noa e i to ˈna utuafare fetii ia ora ˈtu i te diluvi rahi, e te faahohoˈa ra ratou ia vai?

⁷ Ia au i te Bibilia, o te mau Ite o Iehova anaˈe, oia hoi te mau melo o te toea faatavaihia e te mau melo o te “feia rahi roa”, te nehenehe e tiaturi e ora mai ratou ma to ratou tiaraa fanahonahoraa tahoêhia i raro aˈe i te parururaa a te Faanaho teitei roa ra, o te amuiraa nei e haamouhia e e faaterehia nei e te Diabolo ra o Satani (Apokalupo 7:9-17; Korinetia 2, 4:4). O ratou te “tino” oia hoi, mai ta Iesu Mesia i faaite atea mai, o te faaorahia, ia tupu te ati rahi riaria mau o te aamu taata nei. Mai te tau o Noa, ta Iesu ïa i parau, na reira atoa te mahana oia e faaitehia mai ai. I roto i te araka, tei titau hoi te hamaniraa e rave rahi matahiti ohipa faanahohia, e vau anaˈe taata i ora mai mai roto mai taua diluvi rahi ra. Ua riro taua mau taata i ora mai ra ei pǔpǔ fetii tahoê (Mataio 24:22, 37-39; Luka 17:26-30). E faahohoˈahia te vahine a Noa i te vahine a te Mesia, e ta ˈna mau tamarii tamaroa e tae noa ˈtu i ta ˈna mau hunoa vahine i te mau “mamoe ê atu” a Iesu, o te riro hoi i teie mahana ei feia rahi roa e o ta matou hoi e ore e ite i te numera hopea (Ioane 10:16). No te ora ˈtu e no te ite atu i te Mileniuma i raro aˈe i te faatereraa a te Noa Rahi ra o Iesu Mesia, e tia i taua mau “mamoe” ra ia vai nahonaho noa e te toea faatavaihia, oia hoi te “feia [i] maitihia ra” no reira hoi te mau mahana o te “ati rahi” e haapotohia ˈi. — Mataio 24:21, 22.

E ora ˈtu ratou e e ite atu ratou i te Mileniuma

8. Na roto i tei hea parabole to Iesu faaotiraa i ta ˈna parau tohu no nia i to ˈna taeraa mai, e, i te taio mahana faufaa mau ra o te 1 no tiunu 1935 ra, eaha te faataaraa i horoahia?

⁸ Mai ta te Evanelia a Mataio e haapapu ra, ua faaoti Iesu i ta ˈna parau tohu no nia i te tapao no to ˈna taeraa mai na roto i te hoê parabole, parauhia te parabole no nia i te mau mamoe e te mau puaaniho. E tano taua parabole ra no to tatou nei tau, no te tau o te hopea o te amuiraa o te mau mea nei, tei haamata i te hopea o te mau tau o te mau Etene, i te matahiti 1914 ra (Mataio 25:31-46). Ua riro te mahana maa 1 no tiunu 1935 ei taio mahana faufaa mau, inaha i reira hoi te taaraahia e e tano te mau mamoe o te parabole i te mau melo o te feia rahi roa. I taua mahana ra, i roto i te hoê tairururaa i faatupuhia e te mau Ite o Iehova i Washington, 840 taata tei bapetizo ia ratou ei taipe no te pûpûraa ratou ia ratou iho no te Atua ra o Iehova na roto i te arai o Iesu Mesia. Ua rave te rahiraa o ratou i taua taahiraa avae ra i muri aˈe i to ratou faarooraa i te hoê oreroraa parau niuhia i nia i te Apokalupo 7:9-17 e i vauvauhia mai e Joseph Rutherford. To ratou hinaaro, ia riro atoa ïa ratou ei melo no te feia rahi roa o te mau mamoe ê atu a te Tiai mamoe maitai ra, no te ora ˈtu mai roto atu i te ati rahi i mua nei, i te hopea o te amuiraa o te mau mea nei, e no te ora atoa ˈtu i raro aˈe i te Faatereraa hoê tausani matahiti a te Arii-Tiai ra, o Iesu Mesia. I te pae hopea, e noaa mai ai ia ratou i te ora mure ore i nia i te hoê fenua e faarirohia ei paradaiso. — Mataio 25:46; Luka 23:43.

9. No te aha te mau mamoe e titauhia ˈi ia fatu i te ‘basileia i faaineinehia no ratou’, e mea nafea ˈtura ïa to ratou vairaa i roto i te tiaraa faahiahia roa ˈˈe no te hamani maitai i te mau taeae o te Arii?

⁹ No te aha hoi taua mau “mamoe” ra i titauhia ˈi no te ‘fatu i te basileia i faaineinehia no ratou mai te omuaraa mai â o teie nei ao’? No te mea, ta to ratou Arii ïa e parau maira ia ratou, ua hamani maitai ratou i to ˈna mau “taeae”, e, ia na reira ratou, o ˈna iho ïa ta ratou e hamani maitai ra. Te mairi ra te Arii i to ˈna mau “taeae” te toea o to ˈna mau taeae pae varua e ora nei â i nia i te fenua nei i roto i te roaraa o te hopea o te amuiraa o te mau mea nei. I te mea hoi e ua riro mai te mau “mamoe” ei hoê anaˈe nǎnǎ e taua mau taeae o te Arii-Tiai ra, Iesu Mesia, e ati maite atu ïa ratou i taua mau taeae ra, e tei roto atura ïa ratou i te tiaraa faahiahia roa ˈˈe no te hamani maitai ia ratou. I te pae materia atoa, e tauturu ratou i te mau taeae o Iesu ia poro i roto i te ao taatoa nei i te poroi no nia i te Basileia i haamau-faahou-hia hou te hopea e tae mai ai. No reira te mau mamoe e poihere ai i ta ratou haamaitairaa, oia hoi te vai-nahonaho-raa e te toea ei nǎnǎ hoê ra na te Tiai mamoe hoê ra.

10. Eaha te auraa no te mau mamoe ‘e parahi i te basileia i haapaohia no ratou mai te hamaniraa mai o te fenua nei ra’?

¹⁰ I te mea hoi e e fatu taua mau mamoe ra i te ‘basileia e faaineinehia no ratou’, e ere ïa te auraa e e faatere atu ratou i pihai iho ia Iesu Mesia e to ˈna mau taeae i roto i te mau raˈi hoê tausani matahiti te maororaa. Oia mau, i te omuaraa ra o te Mileniuma, e fatu te mau mamoe i te tuhaa o te Basileia i nia i te fenua nei. I te mea hoi e e huaai ratou na Adamu raua o Eva, ua faaineinehia ïa taua tuhaa ra i nia i te fenua nei i reira te Basileia a te Atua e faaterehia mai e te Mesia, no ratou “mai te haamaniraa mai o te fenua nei ra” o te mau taata i hoohia mai. I te tahi aˈe pae, i te mea hoi e e riro mai te mau mamoe ei mau tamarii na te Arii i nia i te fenua nei, o te riro hoi no ratou ei “Metua no te ui a muri atu”, e fatu ïa ratou i te hoê tuhaa i nia i te fenua nei i raro aˈe i te Basileia o te Atua. — Isaia 9:6, 7.

11. Nafea te mau mamoe e haapapu e te turu ra ratou i te Basileia, e eaha te haamaitairaa e noaa mai ia ratou ia na reira ratou?

¹¹ Taa ê atu i te mau puaaniho taipe, te faaite tahaa nei te mau mamoe e te turu ra ratou i te Basileia. Nafea ïa te reira? Na roto ïa i te ohipa, eiaha noa na roto i te parau. I te mea hoi e eita te Arii e itehia i roto i te mau raˈi, eita ïa ta ratou e nehenehe e hamani maitai roa ˈtu ia ˈna no te faaite e te turu ra ratou i to ˈna Basileia. E hamani maitai ïa ratou i to ˈna mau taeae varua e ora nei â i nia i te fenua nei. E noa ˈtu â ïa e te ririhia ra ratou, te arohia ra ratou e te hamani-ino-hia ra e te mau puaaniho, te parau maira te Arii ia ratou e ‘te haamaitaihia ra ratou e to ˈna Metua’.

12. O vai ma ta te mau mamoe e farii e o te riro hoi ei haamaitairaa no ratou, e eaha te manaˈo i manaˈohia na e te mau melo o te toea no nia i taua tumu parau nei?

¹² E oaoa roa te feia rahi roa o te mau mamoe e hamani maitai ra i te mau taeae varua o te Arii i te ora ˈtu e i te ite atu i te Mileniuma. I te tau i haapaohia ra, ratou e farii ai i te feia pohepohe i roto i te apoo ra (Ioane 5:28, 29; 11:23-25). I roto i taua feia pohe ra, te vai ra ïa te mau patereareha e te mau peropheta haapao maitai tei faaoromai e rave rahi mau mauiui no te faatiamâ i te mana hope o Iehova e “ia noaa ia ratou te ora faahou, te mea maitai roa ra”, o te riro paha i te tupu oioi (Hebera 11:35). I rotopu i taua mau tane e taua mau vahine faaroo e faatia-faahou-hia mai, tei faahitihia hoi vetahi pae i roto i te Hebera pene 11, eita e ore te vai atoa ra o Ioane Bapetizo (Mataio 11:11). Ua manaˈo te tahi mau melo o te toea faatavaihia e ora ˈtu i te ati rahi e e farii i taua mau taata haapao maitai ra, tei pohe na mua ˈˈe i te Penetekose o te matahiti 33 ra, ia faatia-faahou-hia mai ratou. E noaa anei i vetahi mau kerisetiano faatavaihia i taua haamaitairaa nei?

13. No te aha e ere i te mea titauhia ia ora noa mai â te toea faatavaihia i nia i te fenua nei no te farii i te feia e faatia-faahou-hia mai i nia i te fenua nei e no te haapao ia ratou?

¹³ E ere hoi i te mea titauhia. Mea rahi roa te mau taata e ora ˈtu i te ati rahi no roto mai i te feia rahi roa no te haapao i te feia e faatia-faahou-hia mai e no te faaite atu ia ratou i te parau no nia i te “fenua apî” e arataihia mai e te mau “raˈi apî” (Petero 2, 3:13.) Te faaineinehia nei hoi te feia rahi roa no taua ohipa ra. Te haapapu ra te mau tabula ohipa e e aita i taeahia i te 9 000 mau taeae varua o Iesu teie e ore nei â i nia i te fenua nei. Inaha hoi, mea iti roa ïa te feia o ratou e ora ˈtu no te haapao i te mau ohipa atoa i te pae no te faaineineraa e tupu na mua ˈˈe i te tia-faahou-raa o te taatoaraa (Ezekiela 39:8-16). E riro atura ïa te reira ei ravea no te feia rahi roa, e tamirionihia i te taio, no te faatupu i te hoê taviniraa maitai roa. Papu maitai, ua faataahia taua haamaitairaa nei na ˈna ra.

14. a) Te faaineinehia nei e rave rahi melo o te feia rahi roa no te aha, e no te aha e rave rahi o ratou e tia ˈi ia amo mai teie atu nei i te tahi mau hopoia? b) Eaha te mau ohipa o te fatata roa i te tupu, e eaha te ohipa e tiai maira i te mau mamoe ê atu?

¹⁴ E rave rahi mau melo o te feia rahi roa teie e fanaˈo nei i te hoê faaineineraa no te amo i te tahi mau hopoia i roto i te amuiraa e i roto atoa i te tuhaa no te porotarama paturaa ta te faanahonahoraa a te Atua e rave nei i roto i te ao taatoa nei. Ua riro mau â ei faaitoitoraa i te iteraa i te tahi atu mau taata tei paari i te pae varua no roto mai i te feia rahi roa ia amo i te mau hopoia rahi atu â i roto i te faanahonahoraa ta Iehova e aratai nei i nia i te fenua nei. Ua paari roa te mau melo o te toea faatavaihia e eita e nehenehe ta ratou e rave hau atu mai mutaa ihora. Te haapopou nei taua mau taeae o te Arii ra i te tauturu here mau a te mau matahiapo e a te mau tavini tauturu no roto mai i te mau mamoe ê atu e tei noaa hoi ia ratou i te mau huru pae varua e titauhia ra. Fatata roa Babulonia Rahi i te faaore-roa-hia i nia i te fenua nei. I reira, mai ta te Apokalupo 19:1-8 e haapapu maira, te faaipoiporaa o te Arenio e o ta ˈna vahine, oia hoi na melo 144 000 i roto i to ˈna taatoaraa, e tupu ai i roto i te mau raˈi. E tia mai te mau mamoe ê atu, te riro hoi ei fenua apî i raro aˈe i te faatereraa a te mau raˈi apî, no te Arii na roto i te faatupuraa i te hoê ohipa faahiahia mau, oia hoi te raveraa e ia riro te fenua taatoa nei ei paradaiso taatahia, ei arueraa ia Iehova. — Isaia 65:17; hiˈo Isaia 61:4-6.

15. Eaha te mau haamaitairaa ta te feia rahi roa e manaˈo ra e e noaa ia ratou i roto i te Mileniuma?

¹⁵ I roto i te Faatereraa hoê tausani matahiti a te Mesia, ia faatia-faahou-hia te feia i hoohia mai, e noaa i te mau melo o te feia rahi roa e ora ˈtu i te tahi mau haamaitairaa rahi mau. E riro mai hoi ratou i reira ei mau tamarii tamaroa e ei mau tamarii tamahine na te Arii. E nehenehe vetahi o taua mau tamarii tamaroa ra e tia mai i nia i te tiaraa tamaiti huiarii, mai te mau tamarii a te arii ra o Davida i riro ei mau tamaiti huiarii i haapaohia no te amo e rave rau mau hopoiaa. E te haamanaˈo maira te reira ia tatou i te Salamo 45, i papaihia ei faahanahanaraa i te “arii” i faatavaihia ra a Iehova.

16. I te parau mau, e tano te Salamo 45 ia vai, e nafea e nehenehe ai e haapapu i te reira?

¹⁶ No tei hea arii teie Salamo 45? Aita ˈtu ïa no Iesu Mesia! Ta te Hebera 1:9 ïa e haapapu maira, i reira hoi te faahitiraahia teie mau parau a te Salamo 45:7 e na ô ra e: “I hinaaro oe i te parau-tia, e te riaria ra oe i te ino; i faatahinu ai te Atua, to Atua ra, ia oe, i te monoˈi ra i te oaoa e hau ê atura i to mau hoa ra.” No Iesu mau atura ïa i faahanahanahia teie mau parau i papaihia i roto i te Salamo 45:16 e na ô ra e: “E monohia mai to mau metua ra i to tamarii, e na oe ïa e faaarii i te mau fenua atoa nei.”

17. Te anaanatae taa ê ra te Arii ra o Iesu Mesia i te aha e ia vai?

¹⁷ Ma te tano mau, mea anaanatae aˈe iho â ïa na Iesu i te oraraa e tiai maira ia ˈna ma to ˈna tiaraa Arii e faatere, i to ˈna ora i mutaa ihora i nia i te fenua nei. Papu maitai, aita i moehia ia ˈna taua oraraa i mutaa ihora, e oia hoi to ˈna mau tupuna taata e tano hoi ia ratou te parau tǎpǔ a Iehova e na ô ra e e haamaitai mai oia i te mau fetii atoa na roto i te arai o te Huaai a Aberahama. I teie nei râ, te anaanatae taa ê ra oia i te opuaraa i haapaohia e Tei haamau ia ˈna ei Arii, oia hoi te Atua ra o Iehova, no te tau i mua nei e fatata maira. E riro mau â te mau tamarii a Iesu i nia i te fenua nei, oia hoi ta ˈna mau tamarii e faaî nei i te mau huru titauhia no te amo i te mau toroa huiarii i raro aˈe i ta ˈna faatereraa, i te tapea i to ˈna feruriraa taatoa — hau atu i to ˈna mau tupuna i nia i te fenua nei.

18. Ia au i ta ratou faataaraa i te Salamo 45:16, mea nafea to vetahi mau tatararaa bibilia haapapuraa mai e mea faufaa aˈe na Iesu i ta ˈna tamaiti e haapaohia ei mau tamaiti huiarii i to ˈna iho mau tupuna i nia i te fenua nei?

¹⁸ Te haapapu maira e rave rahi mau tatararaa o te Bibilia e e mea faufaa rahi aˈe na Iesu i ta ˈna mau tamaiti huiarii i to ˈna iho mau tupuna. Mai teie te huru to vetahi o taua mau tatararaa ra huriraa i te Salamo 45:16: “E mono mai to mau tamarii i to mau tupuna, e e faariro oe ia ratou ei mau tamaiti huiarii na nia i te fenua taatoa nei.” (Irava 17, TOB). “E rave mai to mau tamaiti i te parahiraa o to mau tupuna, na oe e haapao ia ratou ei mau tamaiti huiarii na nia i te fenua atoa nei.” (Irava 17, Osty). “Maoti hoi to mau tupuna, ua fanau mai oe i te mau tamarii: e faariro oe ia ratou ei mau tamaiti huiarii na nia i te fenua taatoa nei.” — Septante.

19. Eaha te mau hopoia ta vetahi mau melo o te feia rahi roa e faatupu nei i roto i te amuiraa, e e nomino te Arii ra o Iesu Mesia ia ratou i nia paha i tei hea tiaraa i roto i te roaraa o ta ˈna Faatereraa hoê tausani matahiti?

¹⁹ Te oaoa rahi nei matou i te mea e te vai nei i rotopu ia matou te mau tamaiti huiarii no a muri aˈe. No roto ratou i te mau mamoe ê atu e faaroo i te reo o te Tiai mamoe maitai ra, o Iesu Mesia, mai te matahiti 1935 maira iho â ra, matahiti i reira te irava o te Apokalupo 7:9-17 i te faataaraahia mai i roto i te tairururaa a te mau Ite o Iehova i tupu i Washington. I teie nei mahana, e rave rahi tausani mau melo o taua feia rahi ra o te mau mamoe ê atu, e mau matahiapo anaˈe ïa ratou, aore ra tiaau, i roto hau atu i te 57 670 amuiraa a te mau Ite o Iehova i purara i roto e 212 fenua. Ia vai nahonaho noa ratou e te toea o te mau taeae varua o te Mesia e ora nei â i nia i te fenua nei, e nehenehe ïa taua mau taata ra e fariihia ei mau tamaiti na te Arii ra o Iesu Mesia i nia i te fenua nei, i roto i te roaraa o ta ˈna Faatereraa hoê tausani matahiti i nia i te fenua apî i tǎpǔhia maira (Petero 2, 3:13). Ia au i taua huru tiaraa no ratou ra, peneiaˈe ratou i te nominohia ei mau tamaiti huiarii i roto i te fenua apî.

20. a) Eaha ïa te huru o te Arii i nia i te feia ta ˈna e haapao ei tamaiti huiarii i nia i te fenua nei? b) O vai ma te mau taata ta te feia rahi roa e farii, eaha te ohipa ta ratou e nehenehe e rave?

²⁰ Ma te oaoa mau hoi te Arii ra o Iesu Mesia, e farii ai i taua mau tamaiti huiarii i nomino-apî-hia, mai ta ˈna e farii nei i te hiˈopoaraa e ravehia nei e te mau mamoe ê atu haapao maitai i nia i te amuiraa a te mau Ite o Iehova. E noaa i te taatoaraa o te feia rahi roa o te mau mamoe ê atu — te mau vahine e tae noa ˈtu i te mau tane — i te haamaitairaa faahiahia mau, oia hoi te fariiraa i te taatoaraa o te feia pohe e faaroo i te reo o Iesu e o te faatia-faahou-hia mai e o te noaa hoi ia ratou te ora mure ore i roto i te huru taata tia roa i nia i te hoê fenua viivii ore e faarirohia ei paradaiso i roto i te ao taatoa nei (Ioane 5:28, 29). I roto i taua mau taata ra e faatia-faahou-hia mai e o te noaa hoi te hoê tiaraa teitei, te vai ra ïa te mau tupuna o Iesu Mesia i hoo-faahou-hia mai, te mau taata faaroo o tei ineine i te haapapu i to ratou ati-maite-raa i te Atua ra o Iehova e tae roa ˈtu i te poheraa ma te tiaturi e e noaa ia ratou i “te ora faahou, te mea maitai roa ra”. (Hebera 11:35.) Teie râ, ia faateiteihia ratou i nia i te huru taata tia roa i roto i te Faatereraa hoê tausani matahiti a to ratou Arii e Hoo atoa hoi o Iesu Mesia, e riro mai ïa te reira ei omuaraa. Ia vai nahonaho noa ratou ma te aueue ore i raro aˈe i te faatereraa a te Atua ra o Iehova i roto i te tamataraa hopea e farereihia e te huitaata nei i riro faahou mai ei huitaata tia roa ia hope te Mileniuma, i reira ïa ratou e haapapu ai e e tia mau â ratou ia ora e a muri noa ˈtu i roto i te Paradaiso e ia riro ei tuhaa no te faanahonahoraa a Iehova i roto i te ao taatoa nei, i nia i te fenua nei. — Mataio 25:31-46; Apokalupo 20:1 e tae atu i te 21:1.

[Nota i raro i te api]

Eaha ïa ta outou e pahono mai?

◻ Eaha te tau ta Iehova i haapao no te haamaitai mai i te huitaata atoa nei?

◻ Eaha te mau auraa te tia mau â ia tatou ia atuatu i rotopu ia tatou iho no te ora ˈtu i te ati rahi ra?

◻ Eaha te auraa no te mau mamoe ‘ia parahi i te basileia i haapaohia no ratou mai te hamaniraa mai o te fenua nei ra’?

◻ I roto i te Mileniuma, eaha paha te mau haamaitairaa e noaa ˈtu i te feia rahi roa?