E faahanahana te paradaiso e haamau-faahou-hia, i te Atua
“E (...) faaunauna vau i tau taahiraa avae.” — ISAIA 60:13.
1, 2. a) Na roto i te arai o ta ˈna peropheta ia Isaia, eaha ta te Atua i faaite atea mai no nia i te fenua nei? b) Eaha ta tatou e ite ia hiˈo tatou hoê tausani matahiti maororaa o te oraraa o te taata i mua nei?
TE FAARIRO nei Iehova i te fenua, ta ˈna i poiete, mai te hoê palaneta i reira oia e tuu ai i to ˈna avae, ei taahiraa avae taipe no ˈna. Na roto i te vaha o ta ˈna peropheta ia Isaia, ua faaite maira oia e ‘e faaunauna oia i to ˈna taahiraa avae’. (Isaia 60:13.) Maoti te Bibilia, buka i faauruahia mai e te Atua, mai ta tatou e nehenehe e hiˈo i roto i te hoê hiˈo fenua puai roa, hoê tausani matahiti oraraa o te taata. E hohoˈa faahiahia mau ïa to mua i to tatou mata: te fenua nehenehe mau maoti te aupuru a te Taata atuatu rahi roa ˈˈe o te ao nei. Ua haamau-faahou-hia te Paradaiso mai tera hopea fenua e tae atu i te tahi hopea fenua ei oaoaraa no te huitaata nei.
2 Oia mau, ta te Atua teitei, tei tuu i te taata i te haamataraa ra i roto i te hoê paradaiso, e titau ra i te oaoa rahi roa ˈˈe ïa no te huitaata nei. Auê ïa Poiete aroha mau e! Aita roa ˈtu tatou e faarahi ra i te parau ia na ô tatou no ˈna e: “E aroha te Atua.” (Ioane 1, 4:8, 16). I roto i te paradaiso e haamau-faahou-hia, e ora amui te mau tane e te mau vahine paari e te tia roa, mai te mau taeae e te mau tuahine e here te tahi e te tahi (Isaia 9:6). Ma te faaitoitohia e te aroha, te pûpû nei ratou i te hoê auraro tia roa i te Poiete hanahana o te raˈi e te fenua, te Atua ra o Iehova.
3, 4. a) Eaha te vahi e tuea ˈi te raˈi e te fenua? b) Eaha ïa te huru o te mau melahi ia haamau-faahou-hia te Paradaiso i nia i te fenua nei?
3 Tau tausani matahiti i teie nei, i roto i te hoê faataaraa parau i faauruahia mai e te Atua no nia i te vahi i reira oia e arii ai, ua horoa maira te Atua i teie nei parau puai mau i to ˈna nunaa maitihia i te na ôraa e: “Te mau raˈi tau terono, e te fenua nei tau taahiraa avae.” (Isaia 66:1). E tia mau ïa te hanahana rahi o to ˈna “taahiraa avae”, oia hoi te Paradaiso i nia i te fenua nei, e au maite i te hanahana o to ˈna terono i roto i te mau reva itea-ore-hia ra.
4 I te tau a poietehia ˈi te fenua, te hiˈo noa maira te mau melahi e tavini na i pihai iho i te terono o te Atua i roto i te mau reva i nia i te raˈi i taua palaneta ra. Eita e ore ratou i te oaoa rahi i te hiˈo-noa-raa i to ˈna hanahana! Nafea hoi ratou e ore ai i nehenehe e himene i te mau himene oaoa? (Hiˈo Zephania 3:17; Salamo 100:2.) Ua faaurua maira te Poiete i oaoa roa hoi, i te hoê o ta ˈna mau tavini ia papai oia i teie nei faataaraa parau tano maitai no nia i te ohipa i tupu i nia i te raˈi: “A fatu atoa ˈi te mau fetia poipoi i te himene, e ua pii noa te mau tamarii atoa a te Atua i te oaoa.” (Ioba 38:7). E pii te mau melahi a te Atua i te mau pii oaoa puai roa ˈtu â, ei faahanahanaraa i te Atua, ia haamau-faahou-hia i te Paradaiso.
5. Eaha te mau manaˈo hohonu o te faatupu mai i roto ia tatou i te faariroraa ei mea mau te opuaraa a te Atua no nia i te fenua nei?
5 Mea oaoa mau â ia taio tatou i roto i te mau Papairaa Moˈa i faauruahia mai e te Atua e, i te omuaraa ra iho, te opuaraa a te Atua ra o Iehova ia riro ïa te fenua nei ei paradaiso. Mea tano iho â ïa ia manaˈo tatou e e faatupu te hoê Atua tei ia ˈna tera hanahana e tera hanahana, e aita hoi to ˈna mana hope e haparaa, i ta ˈna opuaraa no nia i te fenua nei i nia i taua faito ra o te faaoaoa hoi e o te faahanahana ia ˈna. Ia faateniteni-mau-hia oia! — Salamo 150:1, 2; Isaia 45:18; Apokalupo 21:3-5.
E turu te feia e faatia-faahou-hia mai mai te pohe mai i te haamau-faahou-raahia i te Paradaiso
6. O vai ma te mau taata i nia i te fenua nei i muri aˈe ia Aramagedo?
6 E nehenehe e parauhia e mea iti roa te feia e ora mai mai Aramagedo mai, eita râ hoi o to ratou huaai anaˈe te feia e faaea noa i nia i te fenua nei. E ‘faaunauna atoa [Iehova] i to ˈna taahiraa avae’ na roto i te faatia-faahou-raa mai i te feia i roto i te apoo ra e e noaa ˈtu ai ia ratou i te mau haamaitairaa o te tusia taraehara o te Mesia. Area taua mau taata e faatia-faahou-hia maira, e noaa ïa ia ratou i te haamaitairaa na roto i te apitiraa mai i roto i te ohipa faahiahia mau, oia hoi te faariroraa i te fenua taatoa nei ei paradaiso nehenehe mau aita e faaauraa. — Ohipa 24:15.
7. Eaha te mau parau a Iesu te feia e ora ˈtu i Aramagedo e tapea mai i roto i to ratou feruriraa?
7 E mau noa i roto i te feruriraa o te feia e ora mai mai roto mai ia Aramagedo teie mau parau putapû mau ta te Fatu ra o Iesu Mesia i faahiti i te hoê mahana i te na ôraa mai oia e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” (Ioane 5:28, 29). Auê ïa taime faahiahia mau e, ia haamata te feia pohe i roto i to ratou apoo, i te faaroo i te reo o te Tamaiti a te Atua! Hoê â titauraa ta ˈna e titau atu ia ratou mai ta ˈna i titau ia Lazaro, o tei tuuhia ˈtu hoi te tino i roto i te hoê apoo i Betania e tei na ô atu e: “E Lazaro, a haere mai i rapae.” — Ioane 11:43.
8, 9. O vai ma te feia matamua e faatia-faahou-hia mai no te hoê oraraa apî i nia i te fenua nei? Eaha ïa te oaoa e itehia i te feia e ora ˈtu i Aramagedo i reira?
8 I roto i te roaraa o te tausani matahiti faatereraa a Iesu Mesia, e na nia i Ta ˈna faaueraa, o vai mau na ïa te feia matamua e faatiahia mai no te hoê oraraa apî i nia i te fenua nei? Mea tano iho â ia manaˈo e o te mau “mamoe ê atu” tei pohe i roto i te mau mahana hopea o te amuiraa o te mau mea nei. O ratou tei faatia-oioi-hia (Ioane 10:16). Papu maitai, eita ratou e fifi i te faaau ia ratou i te ao apî. — Hiˈo Mataio 25:34; Ioane 6:53, 54.
9 E oaoa rahi roa te feia e ora mai mai Aramagedo mai ia ite ratou i te mau “mamoe ê atu” tei pohe i roto i te ui na mua ˈtu i te “ati rahi”, ia tia faahou mai. (Mataio 24:21.) Eita ratou e fifi i te ite atu e o vai mau na ratou, i te farii atu ia ratou, e i te tamau â i pihai iho ia ratou i te tavini i te Atua Teitei ra i roto i te autahoê.
10. Mai te peu e e ora ˈtu outou i Aramagedo, e riro ïa outou ei ite no te aha?
10 Mai te peu e e ora ˈtu outou i Aramagedo, e riro paha ïa outou ei ite no te tia-faahou-raa te melo matamua o to outou utuafare fetii. E nehenehe anei ïa to outou manaˈo e taa ê i te manaˈo o te mau metua o tei oaoa roa a faahoˈi atu ai te Fatu ra o Iesu i ta ratou tamahine 12 matahiti i muri aˈe i to ˈna faaora-faahou-raa mai ia ˈna? “Maere roa ˈtura ratou.” (Mareko 5:42). Ma te papu maitai, e oaoa rahi roa outou ia faatia-faahou-hia mai te feia i roto ia Hade e i roto i te tai (Apokalupo 20:13). Oia mau, e mahana hanahana mau â te reira, e te fatata roa maira hoi!
“[E mau tamaiti huiarii] i te mau fenua atoa nei”
11, 12. a) Eaha ta te Salamo 45:16 e haapapu ra? b) I rotopu i tei hea mau taata te Arii ra o Iesu Mesia e nehenehe ai e maiti i te feia ta ˈna e haapao ei “[tamaiti huiarii] i te mau fenua atoa nei”?
11 Na roto i te faaohiparaa i to ˈna mana no te faatia faahou mai i te feia pohe ta ˈna i pûpû i to ˈna oraraa taata tia ei tusia taraehara, e nehenehe o Iesu e rave e ia tupu te Salamo 45:16. Te faahiti ra hoi taua salamo nei i te parau tohu i nia i te Arii ra o Iesu Mesia i te na ôraa e: “E monohia mai to mau metua ra i to tamarii, e na oe ïa e faaarii i te mau fenua atoa nei.” Te haapapu ra teie salamo e e riro o Iesu Mesia ei metua tane no nia i te raˈi na te mau tamarii no te fenua nei e e haamau oia ia vetahi i rotopu ia ratou ei “[tamarii huiarii] i te mau fenua atoa nei”. Ma to ˈna tiaraa “tamaiti na Davida” e tamaiti matahiapo na te paretenia no Iudea ra o Maria, e mau tupuna anaˈe ïa to Iesu e aratai tia ˈtu i te metua matamua ra o Adamu. — Luka 3:23-38.
12 Te hinaaro anei te Salamo 45:16 e parau e te feia e riro ei tupuna mau no Iesu, e riro mai ïa ratou ei mau tamarii na ˈna ia faatia faahou mai oia ia ratou? E. Te hinaaro atoa ra anei taua irava nei e parau e, i te mea hoi e e huaai oia na ratou, e faatupu anei te Arii ra o Iesu i te tahi ohipa taa ê no ratou e o ratou anaˈe ta ˈna e haamau ei “[mau tamaiti huiarii] i te mau fenua atoa nei” i riro mai ei paradaiso? Eita; mai te peu e e tupu te parau tohu mai te reira te huru, e numera taotia anaˈe ïa to te mau “[tamaiti huiarii]” i te fenua atoa nei. Hau atu, aita te mau tupuna o Iesu i riro ei feia faahiahia roa e nehenehe atu ai ratou e tia i nia i te hoê tiaraa maitai roa i nia i te fenua nei i roto i te roaraa o ta ˈna Faatereraa hoê tausani matahiti. Hau atu i to ˈna mau tupuna i nia i te fenua nei, e haamau te Arii ra o Iesu Mesia ei mau “[tamaiti huiarii]” e rave rahi mau taata — mau taata aravihi i rotopu i te feia e ora ˈtu i Aramagedo e te mau “mamoe ê atu” e faatia-faahou-hia mai, e tae noa ˈtu i te mau taata faaroo o te tau na mua ˈˈe i te kerisetianoraa. I rotopu i taua mau taata atoa ra, e maiti oia i te feia e nehenehe mau â e tia i nia i te hoê tiaraa huiarii e i nia atoa i te tiaraa mono no ˈna i nia i te fenua nei.
13, 14. O vai ma te feia e faatia-faahou-hia mai ta te mau taata e ora ˈtu i Aramagedo e nehenehe e ite mata roa ˈtu?
13 E manaˈo anaˈe na i taua mau taata ra e tiai ra ia faatia-faahou-hia mai ratou i raro aˈe i ta Basileia mesia. E tupu mau anei? Teie o Abela, te taata matamua i hamani-ino-hia, e o Enoha, tei haere noa e te Atua mau ra. Teie atoa o Noa, tei hamani i te araka, tae noa ˈtu o Aberahama, o Isaaka e o Iakoba, te mau tupuna o te nunaa Iseraela. Teie o Mose (no te opu tahuˈa o Levi), e o Davida, ta ˈna i faaau atu i te faufaa mure ore no te Basileia. E tera ˈtu o Isaia, Ieremia, Ezekiela, Daniela e te tahi atu â mau peropheta hebera tei papai i te mau buka o te Bibilia, e te hopea o ratou o Malaki ïa. E inaha, teie o Ioane Bapetizo, tae noa ˈtu o Iosepha, te metua tane faaamu o Iesu.
14 I te hoê mahana, ua na ô atura Iesu i te mau ati Iuda e: “[E] hiˈo outou ia Aberahama, e ia Isaaka, e ia Iakoba, e te mau peropheta atoa tei roto i te basileia o te Atua, e hoparahia outou iho i rapae au”. (Luka 13:28). E ite mata roa ˈtu, e e riro hoi ei haamaitairaa no ratou, te “feia rahi roa” o te feia e ora ˈtu i nia i te fenua nei i “te tamaˈi i taua mahana rahi o te Atua Puai hope ra” ia “Aberahama, e ia Isaaka, e ia Iakoba, e te mau peropheta atoa” ia faatia-faahou-hia mai i roto i te Paradaiso i nia i te fenua nei e ia faatupu i te hoê taviniraa huiarii i raro aˈe i te Basileia o te Atua e faaterehia mai e te “Metua no te ui a muri atu”, o Iesu Mesia. — Apokalupo 7:9, 14; 16:14; Isaia 9:6.
15. Eaha te faufaa eita e nehenehe e faaau e tiai maira i te feia e ora ˈtu i Aramagedo?
15 Auê mau ïa outou i te putapû e ia ora ˈtu outou i te hopea o te amuiraa ino e vai nei e ia faaite atu outou i to outou manaˈo ia Noa e i to ˈna mau fetii, na “taata toovau” i ora mai i roto i te haamouraahia te ao matamua i roto i te diluvi rahi ra i te matahiti 2370 hou to tatou nei tau! I roto i te roaraa o te tau, aita ˈtu taata i ora i taua mau ohipa nei maoti ra o outou e, oia hoi, te ore roa ˈtu e nehenehe e riro ei Ite no te Atua ra o Iehova ma te hoê huru faahiahia mau e ma te hoê huru otahi roa. — Petero 1, 3:20; Mareko 13:19; Petero 2, 3:5-7.
Eita e moehia te taata rave hara i tatarahapa ra
16, 17. a) Ia haamanaˈo anaˈe o Iesu i te taata rave hara i tatarahapa, eaha ïa te haamaitairaa e noaa i te feia e ora ˈtu i Aramagedo e i te tahi atu mau taata e ora noa ra i reira? b) Eaha te tiaturihia ra no nia i te taata rave hara tei faatia-faahou-hia mai?
16 Papu maitai e te tere maitai ra te haamauraahia te Paradaiso i nia i te fenua nei, ia faatia-faahou-hia mai te taata rave hara tei rihia i nia i te hoê pou i pihaiiho ia Iesu, i Keranio, e tei farii i te parau mau o te papai i tuuhia i nia ˈˈe i To ˈna upoo, i te na ôraa ˈtu e: “E te Fatu, e haamanaˈo mai oe ia ˈu ia tae oe i to oe ra basileia.” (Luka 23:42). E nehenehe atura ïa te feia e ora ˈtu i Aramagedo e te tahi atu mau taata i vai oraora i reira, e e riro hoi ei haamaitairaa na ratou, e farii taua taata ra ia faatiahia mai oia mai roto mai i te feia pohe. E haapii atu ratou ia ˈna te mau mea atoa no nia i te Arii e faaohipa mai i reira i ta ˈna faatereraa, oia hoi Iesu Mesia, ta ˈna i faaite mai i to ˈna here hohonu i te 14 no Nisana o te matahiti 33 ra.
17 Papu mau, e haamanaˈo te Fatu ra o Iesu Mesia i taua taata rave hara i tatarahapa ra i roto i te roaraa o Ta ˈna Faatereraa hoê tausani matahiti. Eita e ore taua taata ra i te faaite mai i to ˈna aau mehara i nia i te Arii e faatere ra, oia hoi o Iesu Mesia, maoti oia i faatia-faahou-hia mai ai, i roto i te oreraa e taiva i te Mana hope o te ao nei, te Atua ra o Iehova. E riro paha ïa ia tae i reira oia i te ora e a muri noa ˈtu i roto i te ao apî, i roto i te Paradaiso, e te toea o te huitaata faaroo ma te tiaraa taata tia roa.
Te oraraa i roto i te ô i Edene i faahoˈi-faahou-hia mai i nia i te fenua atoa nei
18. E ora te taata i roto i tei hea mau huru tupuraa, i roto i te Paradaiso e haamau-faahou-hia?
18 I roto i te Paradaiso i faahoˈi-faahou-hia mai, e mau hoa anaˈe te mau taata atoa. I roto roa ia ˈna iho, e riro te taata tataitahi ei melo no te fetii i roto i te ao taatoa nei. E taa te tahi e te tahi eaha to te tahi e to te tahi hinaaro. Hoê â reo ta ratou e parau, papu maitai te reo matamua ta te huitaata atoa nei i parau i roto i to ˈna mau matahiti matamua 1 800 maororaa — mai te poieteraahia o Adamu, i te matahiti 4026 hou to tatou nei tau, i te tau o Pelega (2269 e tae atu i te 2030 hou to tatou nei tau), inaha “tei to ˈna ra anotau te ootiraahia [te amahamaharaa] te fenua nei” (Genese 10:25; 11:1.) E oaoa roa taua mau taata atoa ra i te ora, e te farii popou ra ratou i te mau mahana apî atoa mai te hoê mahana hau atu no to ratou oraraa. Eita ratou e haapue noa i te mau huru hapepa i roto i te roaraa o te tau. Eita, e faaapî noa râ to ratou mau puai i te pae tino e eita to ratou tino e ino. — Hiˈo Ioba 33:25.
19. Eaha te roohia i nia i te feia huma i mutaa ihora?
19 E a hiˈo na! Te haere ra hoi te feia pirioi i mutaa ihora, e, te ouˈa nei ratou i te oaoa. Te feia aita to ratou e rima e aita to ratou e avae faahou, teie e ite faahou nei taua mau melo ra na roto i te tahi semeio. Te ite nei te matapo, te faaroo nei te taria turi, te paraparau nei e te himene nei hoi te vava ma te oaoa (hiˈo Isaia 35:5, 6). Aita e tino e aita e hohoˈa mata hairiiri faahou. E tano maitai te huru o te tane i te huru o te vahine (Genese 2:18). E faahanahana te huru o te taata tia roa i te Atua ra o Iehova, tei poiete i te tino taata maitai roa.
20. Eaha te itehia no nia i te puai o te natura, te maa, te animala, e nafea te fenua e faaohipahia ˈi?
20 E riro te fenua taatoa nei ei vahi nehenehe mau. Eita e faaroo-faahou-hia te mau parau apî no nia i te paura, i te vai pue, i te mau ua puai aore te mau mataˈi rorofai, e te mau vero rarahi mai tera poro fenua e tera poro fenua mai (hiˈo Mareko 4:37-41). E vai maite te mau puai atoa o te natura nei i roto i te hoê huru aifaito maitai roa e riro ai te fenua taatoa nei ei vahi faafaaearaa au mau. E maa anaˈe to te mau vahi atoa, inaha e faahotu rahi mai hoi te fenua nei i te maa (Salamo 72:16). I te mau vahi atoa te hau e te ino ore, no te taata e no te animala, ia au maite i teie parau a Iehova e na ô ra e: “E ore ratou e hauti, e ore e rave ino, i to ˈu atoa nei mouˈa moˈa.” (Isaia 11:9; hiˈo atoa i te mau irava 6 e tae atu i te 8). E na reira hoi te fenua nei faarirohia ˈi ei vahi au mau, i reira te mau taata e haamori ai e e tavini ai i te Atua ra o Iehova, i te Poiete e te Fatu o te fenua nei. Na ˈna teie palaneta, na ˈna hoi i poiete. Mea tano iho â ïa e ia faaohipahia oia ia au i te hoê huru e au mai ai oia e e faahanahana ia ˈna. — Hiˈo Isaia 35:1, 2, 6, 7.
21. Nafea te feia i hoo-faahou-hia mai e faariro i te mau mea atoa ta ratou e ite atu i nia i te fenua, e eaha te pehe e faaroohia i reira?
21 I nia i te fenua nei, e mau mea apî anaˈe e te au hoi no te huitaata i hoo-faahou-hia mai tei ore aˈenei i ora i roto i te ô i Edene ra, te Paradaiso i reira te oraraa taata i te haamataraa i roto i te hoê huru tia e te faahiahia mau (Apokalupo 21:5). I reira hoi te hoê pehe nehenehe mau, te oto upaupa e te oto o te reo, e faaroohia ˈi, ei faahanahanaraa ia Iehova. — Paraleipomeno 1, 23:4, 5; Salamo 150:3-6.
22. Eaha te mau manaˈo hohonu o te feia e ora ˈtu i roto i te Paradaiso?
22 Auê hoi te faahiahia ia ora i nia i te hoê fenua tei î i te taata oraora maitai, i nia i te hoê fenua eita e ite-faahou-hia te ruauraa e o te hara matamua hoi a Adamu te tumu! (Hiˈo Ioane 10:10.) Oia mau, o te hoê hoi fenua teie i reira te taata atoa nei e fariihia e te Atua ra o Iehova, e faaohipa ˈi i To ˈna hohoˈa e i To ˈna huru, mai te taata matamua ra o Adamu i to ˈna poieteraahia (Genese 1:26, 27). Eita te fenua nei e riro faahou ei mea faufau no te mau seraphi, te mau kerubi e te mau melahi oaoa mau. Ia fariu tia mai ratou, mai nia mai i te raˈi, i to ratou mata mǎrû i nia i te fenua nei no te hiˈopoa i teie nei palaneta nehenehe mau mai te paradaiso ra te huru, eita ratou e ore e nehenehe e arue e e haamauruuru i Ta ratou e nehenehe e ite roa ˈtu, oia hoi ia Iehova, te Mana hope o te ao nei. — Mataio 18:10.
Te hoê oraraa oaoa e aita e hopearaa a muri aˈe
23. Eaha ta te feia e parahi atu i roto i te paradaiso i nia i te fenua nei e faaroo paha no nia i te mau kerisetiano faatavaihia, e eaha ïa to ratou mau manaˈo hohonu?
23 E riro paha, e mea papu hoi, ia tae i te hoê taime e faaitehia mai te iˈoa o te mau kerisetiano atoa i faatavaihia e tei pahono i ‘to ratou titauraahia mai e to ratou maitiraahia’ no te apiti atu i roto i te Basileia o te mau raˈi e tei fanaˈo i te tia-faahou-raa i nia i te raˈi, i te fetii taata i roto i te Paradaiso i nia i te fenua nei (Petero 2, 1:10; Salamo 87:5, 6). Inaha, e ite atu ïa te taatoaraa e no te aha na 144 000 pǐpǐ a Iesu Mesia i faatavaihia e i fanauhia e te varua e ore ai e itehia i roto i te Paradaiso i nia i te fenua nei. E oaoa roa te taata tataitahi e e putapû atoa te aau no ratou e ia ratou atoa.
24. a) Eaha ta Iehova e faatupu no to ˈna “taahiraa avae” ia tae i taua tau ra? b) Nafea tatou e ite ai e aita e hopearaa to te ao apî, e eaha te himene no nia i te mau ohipa e tupu a muri aˈe i reira?
24 E ora hoi te taatoaraa o te mau taata e ati maite atu ia Iehova, te Mana hope mau o te ao taatoa nei ma te oaoa e a muri noa ˈtu. E riro te Paradaiso i nia i te fenua nei tei î roa i te taata ei vahi e tano maitai ei “taahiraa avae” i reira te Atua e nehenehe ai e tuu i to ˈna avae, ei faaauraa parau. Oia mau, e faahanahana o Iehova ‘i to ˈna taahiraa avae’, e e riro te taatoaraa o te taata i te auraro ia ˈna ma te aueue ore (Mataio 5:34, 35; Ohipa 7:49). Eita roa ˈtu te ao apî e mou, inaha “e te tupuraa o to ˈna mana i te rahi e to ˈna hau, aore ïa e hopea”. (Isaia 9:7.) I reira te himene no nia i te mau parau e tupu a muri aˈe i himenehia e te mau melahi i te fanauraahia o Iesu, i Bete-lehema i Iudea, i te matahiti 2 hou to tatou nei tau e tupu ai, e na ô ra hoi e: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei.” — Luka 2:13, 14.
25. a) Mea faufaa roa na te mau melo o te “feia rahi roa” o te mau “mamoe ê atu” i te aha? b) Eaha ïa to tatou hinaaro mau?
25 Mea faufaa roa na te mau melo o te “feia rahi roa” o te mau “mamoe ê atu” a te Tiai maitai ra i te parau tǎpǔ oaoa mau no nia i te hoê Paradaiso e faahoˈi-faahou-hia mai. Ua noaa hoi ia ratou i te haamaitairaa oia hoi te tahoêraa mai i te faanahonahoraa a te Atua e te apitiraa mai ma te itoito i roto i te ohipa i faaite-atea-hia mai e te Fatu o Iesu Mesia, te pororaa i te parau apî maitai no nia i te Basileia na te ao taatoa nei, ei faaiteraa hopea (Mataio 24:14; Mareko 13:10). Tatou e te mau Ite o Iehova, te hinaaro mau nei tatou e ore e taiva e a muri noa ˈtu, ma te faahanahana e ma te turu maite i te Mana hope o teie nei ao, oia hoi te Atua ra o Iehova, i raro aˈe i te mana arii o ta ˈna Tamaiti otahi, o Iesu Mesia. “Haleluia!” — Apokalupo 19:1, 3, 4, 6; Maseli 10:9.
Eaha ta outou e pahono mai?
◻ Eaha te parau tohu ta Iehova i tǎpǔ no te fenua, to ˈna taahiraa avae taipe?
◻ O vai te apiti atu i te haamau-faahou-raahia i te Paradaiso?
◻ I roto i tei hea mau taata te Arii ra o Iesu Mesia e maiti ai i te feia ta ˈna e haapao ei “[tamaiti huiarii] no te mau fenua atoa nei”?
◻ O vai ma ta tatou e nehenehe e farerei ma te oaoa mau hoi ia tae i te tia-faahou-raa?
◻ Eaha te oraraa e tiai maira i te feia e tamau â i te ati maite atu ia Iehova?