Faaineinehia mai teie atu nei no na matahiti hoê tausani i mua nei
“E riro râ ratou (...) [ei arii] ia ˈna ra e ia hoê tausani i te matahiti.” — APOKALUPO 20:6.
1. Eaha ïa te huru e itehia i nia i te fenua nei i roto i te tausani matahiti i mua nei?
EAHA? Te hinaaro ra anei tatou e parau e i roto hau atu i te tausani matahiti, e vai noa mai â te taata i nia i te fenua nei? E, te reira! E hau atu, e mau taata tia anaˈe ratou i te pae tino, i te pae no te here e i te pae feruriraa — mai te tane matamua e te vahine matamua i te omuaraa o te oraraa taata i nia i te fenua nei. Oia mau, i roto i te hoê tausani matahiti, e riro te taata ia au i te hohoˈa e te huru o te Atua, o tei faahoˈi mai ia ratou i nia i te huru tia roa (Genese 1:26-30). E fanaˈo roa ratou i te ora i roto i te hoê “ô i Edene”, te hoê paradaiso au mau, i nia i te hoê fenua i tamâhia eita hoi i î roa i te taata (Genese 2:15). E itehia taua mau mea atoa ra ei faatupuraa i te opuaraa matamua a te Atua no te fenua e no te feia e parahi i nia iho. E riro taua tupuraa faahiahia mau ra i te faatiamâ i te Atua, i te haapapu ra e e tapea mau oia i ta ˈna parau tǎpǔ i horoa ma te here oia hoi e haamaitai mai oia i te huitaata atoa nei, noa ˈtu eaha te huru patoiraa e farereihia.
2. Fatata 19 senekele i teie nei, nafea te mau ati Iseraela i te neheneheraa e manaˈo e eaha te huru o te huitaata ia faahoˈihia mai ratou i nia i te huru taata tia roa?
2 Na taua tupuraa oaoa mau ra e faatia noa i te opuaraa a te Atua i te Faatereraa hoê tausani matahiti ta te Atua e faaohipa mai na roto i te arai a ta ˈna Tamaiti i faahanahanahia, tei parahi mai e 33 matahiti e te afa i nia i te fenua nei ma to ˈna tiaraa taata tia i te reira hau atu i te 19 senekele i teie nei. No nia i to ˈna huru i taua tau ra, teie ta tatou e taio: “I riro mai nei te Logo ei taata e ua tiahapa mai ǒ tatou nei, (e ua ite matou i to ˈna hanahana, mai te hanahana e au i te Tamaiti fanau tahi a te Metua ra,) ua î i te maitai e te parau mau.” (Ioane 1:14). Ia ratou i hiˈo atu ia Iesu Mesia, ua ite atura ïa te mau ati Iseraela e mai te aha te huru te hoê taata tia (Luka 3:23, 38). Oia mau, 19 senekele i teie nei, ua nehenehe vetahi pae e taa e eaha ra te auraa te parau no te huitaata nei e faahoˈi-faahou-hia mai i nia i te huru taata tia i roto i te Paradaiso i mua nei i nia i te fenua nei.
3, 4. a) E hia maororaa o Iehova e faatere mai ai na roto i te arai o Iesu Mesia e na melo 144 000? b) Eaha te parau e faaohipahia no te faataa mai i taua tau ra, e ua faaohipahia te reira i roto i tei hea mau upoo parau o te mau buka i neneihia e te Taiete Watch Tower?
3 Mai tei faaite-atea-hia mai, hoê tausani matahiti te maororaa te Basileia ta Iehova i horoa mai i roto i te rima o Iesu Mesia e o ta ˈna mau pǐpǐ 144 000 i faahanahanahia. No nia i taua Faatereraa hoê tausani matahiti ra, ua papai aˈera te aposetolo Ioane i roto i to ˈna ruauraa e: “E ua ite au i vetahi ê mau terono ra, e te feia i parahi i nia ihora, e ua horoahia te mana haava ia ratou; e ua hiˈo atura vau i te feia i tâpûhia to ratou upoo no ta ratou faaiteraa i te parau ia Iesu, e no te parau a te Atua ra, o tei ore ïa i haamori i te puaa e to ˈna ra hohoˈa, e aore hoi i farii i ta ˈna tapao i nia i to ratou rae, e i roto i to ratou rima; parahi ihora ratou i ǒ te Mesia ra ma te hau atoa, e hoê aˈera tausani i te matahiti.” — Apokalupo 20:4-6.
4 E parauhia taua area hoê tausani matahiti ra te Faatereraa hoê tausani matahiti a te Mesia, aore ra te Mileniuma. E parauhia hoi te feia e farii e e haapii nei i taua haapiiraa bibilia ra te mau taata turu i te mileniuma, no roto mai hoi taua parau ra i te parau heleni ra oia hoi te auraa “tausani”. E tia ia tapaohia e i te omuaraa ra, te parau no nia i te Tuatapaparaa i te mau Papai (mau buka i neneihia i mutaa ihora e te Watch Tower Bible and Tract Society) e parauhia na ïa Te haamataraa o te Mileniuma. E i mutaa ihora e faaohipa na te Taatiraa a te Feia tuatapapa Bibilia o te ao nei i te hoê buka himene, oia hoi te upoo parau Mau himene no te haamataraa te Mileniuma.
5. Eaha ïa te huru o Satani e te mau demoni i roto i te Faatereraa hoê tausani matahiti a te Mesia?
5 E ere te parau ra “tausani matahiti” i faaohipahia i roto i te Apokalupo 20:4 i te hoê parau taipe, to ˈna râ auraa hoê tausani matahiti. I roto i taua Mileniuma ra, e tuuhia ïa te Diabolo ra o Satani e ta ˈna mau nuu demoni i roto i te abuso, no te mea na mua noa ˈˈe e faahiti ai i te parau no te Faatereraa hoê tausani matahiti a te Mesia, ua na ô aˈera te aposetolo Ioane e: “Ite atura vau i te hoê melahi i te pouraa mai mai te raˈi mai, e tei ia ˈna te taviri o te abuso ra, e e fifi rahi auri tei tana rima. Ua haru ihora oia i te teni ra, i taua ophi tahito ra, oia hoi te diabolo ra, o Satani, ua ruuruu ihora ia ˈna e ia hoê tausani i te matahiti. Ua huri atura ia ˈna i raro i te abuso ra, ua opani atura i te opani ia ˈna, tuu ihora i te tapao i nia ihora, ia ore oia ia haavare faahou i te mau fenua, e ia hope roa taua na matahiti hoê tausani ra: e i muri aˈe i te reira; ia tuu-iti-noa hia ˈˈe oia e tia ˈi.” — Apokalupo 20:1-3.
6. a) I tei hea taio mahana to te mau katolika haamauraa i te hopea o te Faatereraa hoê tausani matahiti a te Mesia? b) Mai te peu e mea tano ta ratou faataaraa parau, a hia ˈtura ïa maororaa te taime poto roa i reira Satani e faaorahia mai ai mai roto mai i te abuso?
6 Ua parau vetahi mau katolika e ua hope te Faatereraa hoê tausani matahiti a Iesu Mesia i te matahiti 1799 ra a haru ai te mau nuu farani ia Roma, a faatahuri ai te pâpa i faatere na i reira e a hopoi ai ia ˈna i Farani ei mau auri, i reira to ˈna poheraa. Ua parau te mau upoo faatere haapaoraa katolika e ua tatarahia mai o Satani e ta ˈna mau demoni i taua tau ra mai roto mai i “te Abuso”, e ua haavare faahou ratou i te taata “[maa taime iti poto noa]”. (Apokalupo 20:1-3.) Mai te peu e mea tano taua huru faataaraa parau ra, e tia iho â ïa ia faaoti e te parau ra “[maa taime iti poto noa]”, ua 190 matahiti atura ïa i teie nei, e mai te huru ra hoi e aita to ˈna hopea e fatata maira.
7. Eaha ta te Bibilia e parau ra no nia i te Faatereraa hoê tausani matahiti a Iesu Mesia?
7 Ia au râ hoi i te mau Papai, to muâ te Faatereraa hoê tausani matahiti mau a Iesu Mesia. Te haapapu maira hoi te tupuraa o te mau parau tohu bibilia i to tatou nei tau e te fatata roa maira. I roto i te maororaa o te Mileniuma mau, e huri-mau-hia o Satani e ta ˈna mau demoni i roto i te abuso, a faatere noa ˈi o Iesu Mesia e to ˈna mau taata aiˈa 144 000 i nia i te huitaata atoa nei ma te ore te faanahonahoraa a te Diabolo e patoi mai ia ratou. Ia au i te faufaa ta Iehova i faaau i to ˈna “taua” ia Aberahama, e noaa i te mau taata atoa e hoohia mai i te hoê haamaitairaa mure ore. E horoa-na-mua-hia taua haamaitairaa ra na te “feia rahi roa”, e o ratou te ora mai i te ati rahi i reira te amuiraa iino e mou roa ˈi, e i muri iho i te mau miria feia pohe i hoohia mai i “te toto o te Arenio”, o Iesu Mesia (Iakobo 2:21-23; Apokalupo 7:1-17; Genese 12:3; 22:15-18; Mataio 24:21, 22). Ia noaa ia ratou i taua haamaitairaa ra, e faatiahia mai ïa ratou, e tatarahia mai mai roto mai i te taoto o te pohe e e faatiahia mai mai roto mai i te apoo no te ora i nia i te fenua nei. — Ioane 5:28, 29.
Te hoê faanahonahoraa kerisetiano
8. Eaha te faanahonahoraa ta te buka ra Te poieteraa apî e faataa ra, e eaha ra hoi te ohipa i te pae no te faanahonahoraa ta ˈna e ore e faaite ra?
8 Ei faatupuraa i te opuaraa a te Atua, ua fa mai te hoê faanahonahoraa apî te tahi tau senekele na mua ˈˈe i taua mau haamaitairaa ra. No nia i taua faanahonahoraa ra, teie ta tatou e taio: “Tei roto anaˈe te taata i te Mesia ra, ua riro ïa ei taata apî.” “Ia Iesu Mesia nei hoi, aore o te peritome, e aore atoa o te peritome ore e faufaa, ei taata apî râ [poieteraa apî, Crampon 1905].” (Korinetia 2, 5:17; Galatia 6:15). Mai te matahiti 1904 maira, ua tuu te buka ra La nouvelle création i te tapao i nia i taua faanahonaho apî ra i fa mai i te senekele I (Tuatapaparaa i te mau Papai, tuhaa VI, haapiiraa V, oia hoi te upoo parau “Te faanahonahoraa o te mau mea apî”). No te auraa ta ˈna i horoa na no te parau ra hopea o te mau tau o te mau Etene [mau nunaa], hopea e tae mai i te matahiti 1914 ra, aita taua buka ra i faaite atea mai i te parau no nia i te ohipa faahiahia mau i te pae no te faanahonahoraa e tupu ia ore te mau faahopearaa iino o te tamaˈi rahi matamua o te aamu taata nei. — Luka 21:24.
9. Ua itoito faahou mai te toea o te poieteraa apî no tei hea ohipa?
9 Ua oaoa roa te mau melo o te toea o te poieteraa apî, i te pae varua, i te mea e ua ora mai ratou e tae roa ˈtu i te hopea o te Tamaˈi rahi Matamua, i te matahiti 1918, e i te mea e ua ora noa mai â ratou i nia i te fenua nei i te matahiti matamua i muri aˈe i te tamaˈi, i te matahiti 1919. Aita râ hoi te mau huru tupuraa i faaitehia mai no te Mileniuma i haamauhia. Papu maitai, mea rahi â te ohipa a te poieteraa apî i nia i te fenua nei hou ratou e ite ai i te tupuraa o ta ratou tiaturiraa e ora i nia i te raˈi, oia hoi te apitiraa ˈtu ia Iesu Mesia i roto i te Mileniuma. E tia ˈtura ïa i te mau melo o te toea ia faaitoito-faahou-hia ratou e ia faanaho-faahou-hia ratou. E ua na reira mau hoi ratou ma te faaroo papu maitai e te hinaaro hohonu e rave i te ohipa faahiahia roa e matara ra i mua ia ratou.
10. Eaha te mau uiraa i uihia no nia i te mau milioni feia e ora nei o te tomo atu i roto i te amuiraa apî o te mau mea?
10 Ua taa i te toea faatavaihia e e ora ˈtu te mau taata i te hopea ino mau o te amuiraa iino e vai nei no te ora ˈtu i raro aˈe i te Faatereraa hoê tausani matahiti a Iesu Mesia i nia i te fenua nei. Ua taa papu ia ˈna i muri aˈe i te oreroraa parau huiraatira oia hoi “E rave rahi milioni taata e ora nei i teie mahana o te ore roa ˈtu e pohe” i vauvauhia i Los Angeles, i California (Etats-Unis), i te tau tamaˈi, i te matahiti 1918 ra. E tia anei i taua milioni taata ra e ora ˈtu i Aramagedo ia fanahohia (Apokalupo 16:14-16)? Hou aˈe ratou e ô atu ai i roto i te Mileniuma no te riro atu ei “fenua apî”, e faaô anei ïa ratou ia ratou i roto i te ohipa pororaa i te Basileia i pihai iho i te toea (Petero 2, 3:13)? E pahono mai te mau ohipa e tupu i muri aˈe i te tamaˈi i taua mau uiraa nei.
11. a) Eaha te tia ia rave i nia i te mau mamoe ê atu i te mea hoi e e riro mai ratou ei hoê anaˈe nǎnǎ e te toea? b) No te aha, i te mea e mea taa ê te tiaturiraa o te mau mamoe ê atu, e ore e riro ei tumu amahamaharaa i rotopu ia ratou e te toea faatavaihia?
11 Ua tano maitai atura ïa teie mau parau a te Tiai mamoe maitai ra o Iesu Mesia e na ô ra e: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” (Ioane 10:16). Mai te peu e e tia i te toea faatavaihia ia faanahohia no te ohipa e tia ia ˈna ia faatupu i muri aˈe i te tamaˈi, mai te matahiti 1919 ra, e mai te peu e i muri iho e riro mai te mau mamoe ê atu ei hoê anaˈe nǎnǎ e te toea i roto hoê â aua, eaha ˈtura ïa te tia ia faaoti? Teie ïa, e tia atoa i taua mau mamoe ê atu ra ia faanahohia e taua toea ra! I te mea e mea taa ê te tiaturiraa o te mau mamoe ê atu, oia hoi te oraraa i roto i te hoê paradaiso au mau i nia i te fenua nei, e ere roa ˈtu ïa te reira te hoê tumu amahamaharaa i rotopu ia ratou e te toea. E pee paatoa hoi ratou i te Tiai hoê ra, e aita roa ˈtu e faataa-ê-raa i rotopu i na pǔpǔ e piti e tae roa ˈtu i te taime e faahanahanahia ˈi te toea faatavaihia i roto i te Basileia.
12. a) Eaha te mea faufaa rahi roa ˈˈe i te ora iho o te huitaata nei? b) Afea ra e no te aha te pororaa i te parau no nia i te Basileia i te riroraa mai ei ohipa faufaa roa?
12 Ua riro te faaoreraahia te taata i te hara e te pohe, te hopea o te faatereraa o te ao a Satani e te faahoˈi-faahou-raahia mai te huitaata faaroo i roto i te Paradaiso i haamau-faahou-hia i nia i te fenua taatoa nei, ei mau tuhaa faahiahia anaˈe no te opuaraa ta te Atua i faatupu ma te here. Teie râ, te vai ra te tahi ohipa faufaa rahi roa ˈtu â no te ao nei. Eaha ïa taua ohipa ra? Te faatiamâraa ïa te faatereraa mana hope a te Atua ra o Iehova i roto i te ao nei e te haamoˈaraa i to ˈna iˈoa. I te matahiti 1922 ra, i te piti o te tairururaa a te Taatiraa a te Feia haapii i te Bibilia i roto i te ao taatoa nei i Cedar Point, i roto i te Ohio (Etats-Unis), ua haapapuhia e o te taime tano te reira no te poro i te Basileia o Iehova e arataihia mai e te Arii e faatere ra, o Iesu Mesia. I te mea hoi e, ua hope te tau o te mau Etene i te matahiti 1914 ra, ua tae atura ïa te taime no te faatupu i teie mau parau tohu a Iesu e na ô ra e: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14). Ua haamauhia te Basileia e faatiamâ i te faatereraa mana hope a Iehova i roto i te ao taatoa nei e o te faaraa i to ˈna iˈoa moˈa, i roto i te mau raˈi i te matahiti 1914 ra, e te faatere ra hoi Iesu Mesia i rotopu i to ˈna mau enemi. E parau apî maitai faahiahia mau te reira te tia ia porohia na roto i te mau ravea atoa e vai ra no te faaite i te Arii e to ˈna Basileia.
13. Ua haapao o Iehova i te aha ia nehenehe te ohipa pororaa i te Basileia e tupu mai, e no te aha?
13 Te faanaho nei Iehova i te mau mea i roto i te ao nei, inaha o ˈna hoi te Teitei, te Atua teitei roa ˈˈe. Ua haapao aˈera hoi oia i reira e ia faanaho-maitai-hia te ohipa pororaa i to ˈna Basileia i roto i te ao taatoa nei hou aˈe te amuiraa nei e mou roa ˈi. Ua haaputuputuhia ˈtura ïa te mau melo o te toea faatavaihia, i ora mai, ei faanahoraa i roto i te ao nei no te faatupu i To ˈna hinaaro. E tia ïa ia ratou ia poro i te ao nei e, i te mea hoi e ua aro mai o Satani i te faatereraa mana hope o Iehova i roto i te ao nei, e tia ïa te parau mau e te tiamâ o taua faatereraa ra ia faatiahia e a muri noa ˈtu.
Te hoê faanahonahoraa i haamauhia na mua ˈˈe i te Mileniuma
14. a) Na mua ˈˈe i te tau kerisetiano, eaha te faanahonahoraa tei riro mai ei tuhaa no te faanahonahoraa a Iehova i nia i te fenua nei? b) Mea nafea to Davida haapapuraa e e taata faanaho faahiahia mau â oia?
14 I roto i na senekele 15 na mua ˈˈe i te tau kerisetiano, e faanahonahoraa itehia ta te Atua ra o Iehova i nia i te fenua nei. Ua faaohipa oia i te peropheta ra ia Mose ei arai no ˈna no te faanaho i te nunaa Iseraela i muri aˈe i to ˈna faaoraraahia mai mai Aiphiti mai, hau emepera matamua i roto i te ao taatoa nei o te aamu bibilia. I raro aˈe i te Ture a Mose, ua riro maira o Iseraela ei tuhaa itehia o te faanahonahoraa a Iehova i roto i te ao nei. Ua tia maira te hoê taata faanaho faahiahia mau i roto i te nunaa maitihia a te Atua: te arii e te tiai mamoe atoa ra o Davida: o ta tatou hoi e nehenehe e taio no nia ia ˈna e: “Ua tufa pǔpǔ ihora Davida ia ratou [te mau ati Levi e tavini na i roto i te vahi moˈa o Iehova], haapao atura i te mau tamarii a Levi ra; o Geresona, e o Kohata, e o Merari.” “Tufa-kelero-hia ihora ratou [te mau tahuˈa], te tahi e te tahi; te mau tavana no te vahi moˈa, e te mau tavana ra no te fare o te Atua, no te mau tamarii ïa a Eleazara, e no te mau tamarii atoa a Itamara ra.” — Paraleipomeno 1, 23:3, 6; 24:1, 5.
15. a) Mea nafea to te mau ati Iseraela haereraa mai i rapae au ia Aiphiti? b) O vai atu â te mau taata i opua atoa e faarue ia Aiphiti, e ua faaea noa mai anei ratou i pihai iho i te mau ati Iseraela?
15 Tau senekele na mua ˈˈe i te tau o Davida, a haere mai ai te mau ati Iseraela i rapae au i Aiphiti, aita ratou i haere mai ma te nane noa. Aita, ua haere mai ratou ma te nahonaho maitai, ei faaiteraa i te ohipa maitai i te pae no te faanahonahoraa e faatupuhia na e to ratou arai, e Mose. Ua na muri maira te hoê tiaa rahi taata e ere i te ati Iseraela ia ratou, ma te maiti i te apiti mai i roto i te mau ohipa e farereihia na e te nunaa a te Atua e faatupu na i te mau semeio, oia hoi o Iehova, te Atua tei hau aˈe i te puai i te mau Atua atoa no Aiphiti. Noa ˈtu te mau fifi e rave rahi, tau taime i muri iho, tei pihai iho noâ taua “taata ěê e rave rahi” ra tei farii maitai to ratou aau i te mau ati Iseraela, te nunaa maitihia a Iehova, ia ratou i roto i te medebara huru ê mau ra no Sinai (Exodo 12:37-51; Numera 11:4). Ua tomo atura hoi taua mau taata ěê e rave rahi ra i te Fenua i tǎpǔhia mai i pihai iho i te mau ati Iseraela i raro aˈe i te aratairaa a Iosua, te mono a Mose, inaha ua faaue maira te Atua e ia ravehia te tahi mau faanahoraa no taua mau taata ěê ra.
16. a) Te faahohoˈa ra taua feia ěê e rave rahi ra ia vai? b) Eaha te tia i te mau melo o te feia rahi roa e ora ˈtu i te hopea o te amuiraa nei ia rave?
16 Te faahohoˈa ra hoi taua mau taata ěê e rave rahi ra no roto mai ia Aiphiti i raro aˈe i te faatereraa a te mau pharao i te feia rahi roa e haaputuputuhia i te senekele XX. E ere to ˈna mau melo i te mau Iseraela i te pae varua, o te mau mamoe ê atu ra a te Tiai mamoe maitai o Iesu Mesia. I pihai iho i te toea faatavaihia, te oaoa nei ratou i te mea e ua faaorahia mai ratou mai roto mai ia Aiphiti no teie nei tau, oia hoi te amuiraa o te mau mea nei i roto i te ao taatoa nei e o te Pharao Rahi ra, te Diabolo ra o Satani hoi te atua. (Ioane 10:16; Korinetia 2, 4:4; Apokalupo 7:9). Eaha ˈtura râ ïa te tia ia ratou ia rave no te ora ˈtu i te haamouraa rahi o te ao tahito a Satani e no te tomo atu i roto i te ao apî i tǎpǔhia mai, i raro aˈe i te aratairaa a te Iosua Rahi ra o Iesu Mesia (Petero 2, 3:13)? E tia ia ratou ia tamau â i te faatura i te mau faanahoraa i ravehia i te pae no te faanahonahoraa e te pu o te faanahonahoraa ite-mata-hia a Iehova, oia hoi e te toea faatavaihia.
17. I roto i te hoê ao nahonaho ore, te aha nei te mau melo o te feia rahi roa, e te oaoa aˈena nei ratou i te aha?
17 Mai te ropuraa mai â o te mau matahiti 30, ua faaôhia mai te feia rahi roa o te mau mamoe ê atu i roto i te nǎnǎ hoê roa i faanahohia i raro aˈe i te aratairaa a te Tiai mamoe hoê i faahanahanahia ra, oia hoi a te arii e faatere ra o Iesu Mesia. I roto i te hoê ao e rahi noa ˈtura i te vai i roto i te huenane, noa ˈtu e te vai ra te pu a te Hau amui, te turu nei te mau melo o taua feia rahi roa ra ma to ratou mafatu atoa i te toea faatavaihia ma te faaite i te mana autahoê o te varua moˈa o Iehova. Ua opua maite ratou e faaea nahonaho noa e te toea faatavaihia e te tiai nei ratou ma te oaoa e ia horoahia mai na ratou i te tahi mau ohipa taa ê i nia i te fenua nei i roto i te Faatereraa hoê tausani matahiti a Iesu Mesia.
Eaha to outou manaˈo?
◻ Eaha ta te mau Papai e haapapu maira no nia i te Faatereraa hoê tausani matahiti a Iesu Mesia?
◻ Eaha te mea faufaa roa ˈtu â i te ora iho o te huitaata nei?
◻ Na mua ˈˈe i te tau kerisetiano, eaha te faanahonahoraa i riro mai ei tuhaa a te faanahonahoraa a Iehova i roto i te ao nei i nia i te fenua nei?
◻ Eaha te tia i te feia i faahohoˈahia e te feia ěê e rave rahi no te ora ˈtu e no te ite atu i te faatereraa hoê tausani matahiti, ia rave?