Te mǎtaˈu: mea ino noa anei?

E NEHENEHE oia e faaore roa i te oaoaraa e e faaere roa ia tatou i te mau tiaturiraa atoa. Ua faarirohia te reira ei raau taero i te pae no te feruriraa, e nehenehe e faaino i te feruriraa. Ua parau-atoa-hia e e rahi aˈe ta ˈna ino e faatupu i te maˈi ino roa ˈˈe. Oia mau, ua riro mau â te mǎtaˈu ei manaˈo puai mau. Teie râ, mea ino noa anei oia?

A feruri na e te tere ra outou na nia i te hoê purumu ta outou i ore roa ˈtu i matau. E a paiuma noa ˈtu ai i roto i te mouˈa, e rahi noa ˈtu â te mau tipuupuuraa. E haamata te mahana i te topa, e inaha, topa mai nei te hiona. E hee rii to outou pereoo e inaha, ite atura outou e no te teitei, ua hionahia ïa te purumu i teie nei.

Teie atura ïa te taime no te haapao maitai. E a tipuu noa ˈtu ai outou ma te haapao maitai i te mau tipuuraa atoa i topa mai maa hiona i nia iho, na ô atura ïa outou e fatata roa to outou pereoo i te topa i nia i taua purumu heehee ra e i roto i te peho i raro mai. Hau atu, aita roa ˈtu outou i ite eaha ˈtu â te tahi mau fifi e nehenehe e roohia mai i nia ia outou i roto i te pouri. A ô noa mai ai teie mau huru manaˈo i roto i to outou feruriraa, mǎrô roa aˈera ïa to outou vaha e haavitiviti noa ˈˈera ïa to outou mafatu i te tupai. To outou tino atoa ˈtura ïa teie e mǎtaˈu nei. Noa ˈtu eaha te mea ta outou e feruri na, i teie nei, ua ô roa mai te hoê manaˈo i roto ia outou: ia faaea noa outou i nia i te purumu e ia ape outou i te ati.

I te pae hopea, eita te purumu e haere faahou i te teiteiraa. Ua maramarama roa o ˈna i teie nei, e aita e huˈa hiona faahou. E tamǎrû rii noa outou ia outou, e e mâha roa ˈˈera ïa to outou riaria. Aita hoi e faufaa ia mǎtaˈu!

Aita e faufaa? Eita e tia ia parau mai te reira te huru. Mea tano mau â ia hepohepo tatou i taua mau huru taime ra. E riro te reira i te faatupu mai i roto ia tatou i te tahi ara-maitai-raa e te haapao maitai. E nehenehe te hoê mǎtaˈu e aratai ia tatou i te ora, e tapea ia tatou ia ore ia haa ma te faufaa ore, e, oia hoi, ia ore ia haafifi ia tatou. Eita ˈtura ïa taua manaˈo nei e faaino i te feruriraa e eita atoa hoi e riro ei raau taero no te feruriraa. I roto i te tahi mau tupuraa, e nehenehe te reira e riro ei mea maitai roa.

Te haamatara maira te Bibilia e piti huru mǎtaˈu: mai te peu e e riro te mǎtaˈu matamua ei raau taero no te feruriraa, area te piti ra, e mǎtaˈu tano mau ïa e e aratai hoi i te ora, e mea faufaa atoa no te ora. Eaha ïa taua mau huru mǎtaˈu ra? Hau atu, nafea ia haapii i te faatupu i te hoê o taua mǎtaˈu ra ma te ape i te tahi? Na te tumu parau ïa i mua nei e pahono mai i taua mau uiraa ra.