No te aha e faaite ai i to ˈna mauruuru?
A HIˈO NA i te api matamua o teie nei vea. Eita e ore i te faahaamanaˈo mai ia tatou e e rave rahi mau mea nehenehe mau teie e taa ê nei i te iroiro e te veve e itehia nei i te mau vahi atoa.
Mea au anei na outou i te mau mea nehenehe? A manaˈo i te anuanua e itehia i muri aˈe i te ûa rahi e te hau mau e te nehenehe o to ˈna mau peni. A manaˈonaˈo na i te hoê faataheraa pape nehenehe mau aore ra i te mau animala e hauti e to ratou mau fanauˈa. A manaˈonaˈo na i te hoê aua tiare nehenehe mau aore ra i te auhune rahi sitona. E rave rahi mau taata tei matau i te ite i teie mau mea. E outou, nafea hoi ta outou huru hiˈoraa i teie mau mea?
Te mau mea ta tatou e manaˈo ra e e ere i te mea apî
Inaha, rahi noa ˈtu â tatou i te tamata i te hoê mea, rahi noa atoa ˈtu oia i te riro ei mea tahito e rahi noa atoa tatou i te faariro i te reira ei mea matauhia. O taua huru nei hoi te ite-pinepine-hia ra i teie senekele e 20, i teie senekele i reira te mau mea e tere oioi ai. Mai mutaa iho mai râ, aita te mau taata tia ore e rave nei i te taime no te faaea i nia i te mau haamaitairaa ta ratou e fanaˈo nei, e e feruri nei i te mau tumu ratou e faaite ai i to ratou aau mehara.
I te tahi aˈe pae, ua faaite pinepine te papai salamo ra o Davida, tei faauruahia e te Atua i to ˈna mauruuru na roto i te tahi mau himene. Ua riro te mau parau i muri nei, no roto i te mau himene ta ˈna i faatae atu i te Atua ei faaiteraa faahiahia no to ˈna mauruuru:
“Ia hiˈo vau i te mau raˈi i te ohipa a to rima,
Te marama e te mau fetia ta oe i faaau ra,
Eaha te taata nei i manaˈo mai ai ia oe ia ˈna?
E ta te taata nei tamaiti i haapao mai ai oe ia ˈna?
“Ua faariro oe ia ˈna ei tavana i te mau ohipa a to rima,
E ua tuuhia e oe te mau mea atoa nei i raro aˈe i tana avae:
Te mau mamoe e te mau nǎnǎ puaatoro atoa,
E te mau puaa atoa o te aru ra;
Te mau manu o te reva; e te iˈa o te tai,
Tei na te eˈa moana i te haere ra!
E to matou Atua, e Iehova! ua teitei to oe iˈoa e ati noa ˈˈe te mau fenua atoa nei!” — Salamo 8:3, 4, 6-9.
E nehenehe te aau mehara e tiahi i te peapea
Ua tauturu te mauruuru o te papai salamo i te mau mea nehenehe ra ia ˈna ia tiahi i to ˈna peapea, ia ite oia i te mau ohipa au ore mau aore ra i te mau huru tupuraa fifi mau. E nehenehe atoa e riro mai te reira te huru no outou. Nafea hoi outou e nehenehe ai e tapae? Na roto ïa i te faaitoitoraa i te faaite i to outou mauruuru rahi i te mau mea au mau e rave rahi e haaati ra ia tatou. E rahi atu â ïa outou i te oaoa e e rahi atu â atoa hoi to outou mau fetii aore ra mau hoa i te oaoa.
No reira, no te aha ïa outou e ore ai e vaiiho i te mau mea faahiahia mau e te maitatai atoa hoi ta outou e ite i te mau mahana atoa, ia faatupu mai i roto ia outou i te hoê manaˈo mauruuru rahi i to outou Poiete? E hiˈopoa anaˈe na i teie nei i te tahi atu mau tumu tatou e faaite ai i to tatou mauruuru.