E faaite anaˈe i to tatou mauruuru
1 Noa ˈtu e te ora nei tatou i “te mau taime ati rahi faaruru atâ,” e rave rahi tumu e mauruuru ai tatou ia Iehova. (Tim. 2, 3:1, MN) Te matamua roa, o te ô faufaa roa ïa o ta ˈna Tamaiti no to tatou maitai. (Ioa. 3:16) Hau atu â, a ere ai te feia o te haapaoraa hape i te maa pae varua, te oaoa nei tatou i te rahi o te maa pae varua. (Isa. 65:13) E melo tatou o te hoê fetii taeae e tuahine nunaa rau e e fanaˈoraa taa ê ta tatou e apiti i te maraaraa o te haamoriraa mau. (Isa. 2:3, 4; 60:4-10, 22) E nafea ia faaite ia Iehova i to tatou mauruuru no te mau haamaitairaa ta ˈna e ninii rahi mai nei i nia ia tatou?—Kol. 3:15, 17.
2 Te hoê taviniraa oaoa ravehia ma to tatou aau atoa: No te mau ô materia, ua papai te aposetolo Paulo e: “O te taata horoa noa . . . ta te Atua e hinaaro.” (Kor. 2, 9:7) E tano atoa teie faaueraa tumu i ta tatou taviniraa i te Atua. E itehia to tatou mauruuru i roto i to tatou anaanatae no te parau mau, to tatou oaoa i te mau putuputuraa Kerisetiano, to tatou itoito rahi i roto i te taviniraa e to tatou ruraa e rave i te hinaaro o te Atua.—Sal. 107:21, 22; 119:14; 122:1; Roma 12:8, 11.
3 I roto i te Ture i horoahia ia Iseraela i tahito ra, te vai ra te tahi mau ô aita i haapapuhia te faito. E nehenehe ïa te taata haamori taitahi e faaite i to ˈna mauruuru ma te horoa ‘i tei tia ia ˈna ra, i te maitai a te Atua ra o Iehova’ tei noaa mai ia ˈna. (Deut. 16:16, 17) Hoê â atoa i teie mahana, e turai te mauruuru ia tatou ia haa rahi, ia au i to tatou tupuraa, i roto i te ohipa pororaa i te Basileia e te faariroraa i te taata ei pǐpǐ. E pinepine e mau taime maitatai te mau avaˈe Tiurai e Atete no te faaite i to tatou mauruuru. E faaohipa vetahi i te mau mahana faaearaa ohipa aore ra haapiiraa no te haamaraa i to ratou taime no te pororaa, i te tahi atoa taime no te rave i te taviniraa pionie tauturu. E nehenehe anei outou e faaaano i ta outou taviniraa i Tiurai e Atete?
4 Ia rahi te mauruuru: Te ravea faufaa roa e faaite ai tatou i to tatou mauruuru ia Iehova, o te pure ïa. (Tes. 1, 5:17, 18) Te faaitoito ra te Bibilia ia tatou ‘ia rahi te faaroo ma te haamaitai.’ (Kol. 2:7) Noa ˈtu e mea ohipa roa tatou aore ra mea hepohepo, e mea tia ia haamaitai noa tatou i roto i ta tatou mau pure o te mau mahana atoa. (Phil. 4:6) Ia “manii noa . . . i te rahi i te haamaitai [aore ra mauruuru] i te Atua” na roto anei i ta tatou taviniraa aore ra ta tatou mau pure.—Kor. 2, 9:12.