Te faahapa ra anei te Bibilia ia ˈna iho?

“O TEI ORE e tia i te Atua ia haavare”, o ta te Bibilia ïa e parau ra (Hebera 6:18). Nafea hoi ta ˈna buka e nehenehe ai e î i te mau faahaparaa rahi mau e e parauhia ˈi e e Parau na te Atua? Eita hoi e nehenehe. No reira, no te aha ˈtura ïa taua mau faahaparaa ra?

Parau mau, i roto i te hoê buka tei papai-rima-hia e tei papai-faahou-hia e rave rahi senekele te maororaa e te tia hoi ia hurihia i roto i te mau reo matauhia i taua taime ra, ua ô mai iho â ïa, mai te nehenehe e manaˈohia, te tahi mau taa-ê-raa i te pae no te papai. Eita râ hoi te reira e navai no te parau e e ere te Bibilia taatoa i te mea faauruahia e eita atoa hoi e nehenehe e faahapa i to ˈna mana. Ia hiˈopoa-maite-hia taua mau faahaparaa ra, e itea mai ia tatou i te tahi faataaraa faahiahia mau. E pinepine roa i te itehia, e te feia e parau ra e te faahapa ra te Bibilia ia ˈna iho, aita ratou i faahohonu i taua tumu parau ra. E rave noa mai ratou i te manaˈo o te feia e ore roa ˈtu e tiaturi ra i te Bibilia aore ra o te ore roa ˈtu e hinaaro ra e na ˈna e aratai i to ratou oraraa. “O tei parau vave mai aitâ i faaitehia ˈtu, ua faaite oia e maamaa to ˈna, e au ia ˈna te vahavaha”, ta te Bibilia ïa e parau ra i roto i te Maseli 18:13.

Te parau-atoa-hia ra i te tahi taime e aita te manaˈo o te feia papai bibilia e tu ra i nia paha i te mau numera, i te faanahoraa i roto i te tau aore ra i nia i te tahi faahitiraa parau. Teie râ, e feruri anaˈe na: Mai te peu e e tia ia outou ia ani atu i te mau taata e rave rahi, ia faataa mai i te parau no nia i te hoê ohipa i tupu e o ta ratou i ite, hoê â anei ta ratou huru faatiaraa mai e hoê â anei te mau parau ta ratou e horoa mai? Mai te peu e mai te reira te huru, eita anei ïa outou e manaˈo e ua rave ratou e ia tano iho â to ratou manaˈo? Oia atoa, ua vaiiho te Atua i te feia papai i te Bibilia, ia papai ratou ia au i to ratou huru e ta ratou huru paraparau, ma te haapao e ia faataehia mai iho â to ˈna mau manaˈo e tae noa ˈtu hoi te mau ohipa faufaa roa i tupu, ma te tano maitai.

Ua nehenehe hoi te feia i faahiti na i te mau irava tahito, e atea rii noa ˈtu i te irava tumu ia au i te mau mea ta ratou e hinaaro ra aore ra te mau mea ta ratou e titau ra, ua faaherehere mai râ ratou i te manaˈo e te auraa matamua. Ua na reira atoa ratou no te haaputuputu i te mau ohipa i tupu na. E nehenehe hoi te hoê e pee maite i te tuatapaparaa o te anotau, area te tahi ra e tuu ïa oia i te mea i tupu ia au i te mau manaˈo ta ˈna e hinaaro ra e faaite. Mai te reira atoa, e faaore na te hoê taata papai vetahi mau parau ia au i ta ˈna huru hiˈoraa i te mau mea e mai te peu e e tia anei ia ˈna ia haapoto mai i ta ˈna huru faatiaraa. Ei hiˈoraa, ua faaite o Mataio i te parau o na matapo e piti tei faaorahia e Iesu, area o Mareko raua o Luka ra, ua faahiti noa ïa raua i te parau no te hoê matapo (Mataio 20:29-34; Mareko 10:46; Luka 18:35). Aita te faatiaraa parau a Mataio e faahapa ra i te mau faatiaraa parau a Mareko raua o Luka; ua haapao maitai râ o ˈna i te numera area o Mareko raua o Luka ra, ua haamau ïa raua i to raua manaˈo i nia i te hoê o na taata ta Iesu i paraparau atu.

E rave rahi atoa mau ravea i te pae no te numeraraa o te tau. E faaohipa na te nunaa ati iuda e piti na kalena: te kalena faaroo e te kalena tivila, aore ra faaapu. Eita taua na kalena nei e haamata i te hoê â taime o te matahiti. Ia faatia mai te feia papai hoê â ohipa i tupu i te tahi tau avae aore i te tahi tau mahana te taa-ê-raa, e riro paha ïa e no te mea ua faaohipa ratou i na kalena e piti nei. I te mea hoi e e varavara roa te feia papai buka i te pae hitia o te râ ma i te faaohipa i te mau tatuhaaraa, e taiohia ïa te mau tuhaa matahiti mai te mau matahiti taatoa. E ravehia te mau numera taatoa roa ˈˈe hoi. Ei hiˈoraa, o te reira hoi te itehia i roto i te pǎpǎ-tupuna-raa o te Genese pene 5.

E faatano anaˈe na i te mau “faahaparaa”

Teie râ, aita anei to roto i te Bibilia te tahi mau irava o te faahapa ra te tahi e te tahi? E tuatapapa anaˈe na vetahi mau hiˈoraa ta te feia faahapa i te Bibilia e horoa mai nei.

I roto i te Ioane 3:22, te taio ra tatou e ua “bapetizo” Iesu; i mua rii noa ˈtu, i roto i te Ioane 4:2, te parauhia ra e ‘aita Iesu iho i bapetizo’. Teie râ, mai ta te taatoaraa o te faatiaraa parau e haapapu maira, ua apee mai ta ˈna mau pǐpǐ ia ˈna, e na ratou e bapetizo ra ma to ˈna iˈoa e i raro aˈe i ta ˈna aratairaa. Mai te reira atoa hoi te huru no te hoê paoti ohipa e ta ˈna vahine papai parau ia parau mai raua toopiti atoa ra e hoê â rata ta raua i papai.

I muri iho, te faaite maira te irava o te Genese 2:2 e ua faaea ihora te Atua “i ta ˈna atoa ra mau ohipa”. Ei patoiraa ˈtu i te reira, te horoahia maira ïa te manaˈo o Iesu e vai ra i roto i te Ioane 5:17, ia ˈna i parau no nia i te Atua e “te ohipa noa nei â tau Metua”. I roto râ i te tupuraa matamua, te faaite maira te faatiaraa parau e e faahitihia ra te parau no nia i te mau mea i poietehia e te Atua, area i roto i te piti ra, no nia ïa i te ohipa o ta ˈna e tamau noa nei â i te rave no te aratai i te huitaata nei e no te aupuru atu ia ratou.

Mai te huru ra e e ite-atoa-hia te tahi faahaparaa i rotopu i te Exodo 34:7 e te Ezekiela 18:20. Te haapapu maira te irava matamua e e faatae mai te Atua i “te tahooraa i te hara a te feia metua i nia i te tamarii, e i nia atoa i te tamarii a taua mau tamarii ra”; te parau ra râ te piti o te irava e “e ore e tuuhia te hara a te metua i nia i te tamaiti”. No te aha ïa e nehenehe ai e manaˈo e te faahapa ra taua na irava nei te tahi e te tahi? No te mea ïa ua ravehia raua i rapaeau mai i te taatoaraa o te parau. A tuatapapa na i te reira, e ite ïa outou iho e ia parau te Atua e e faatae mai oia i te faautuaraa eiaha noa i nia i te mau metua tane, i nia atoa râ i ta ratou mau tamarii e ta ratou mau mootua, te parau ra ïa oia i te parau no nia i te mau ohipa e roohia i nia i te mau ati Iseraela ia au i to ratou tiaraa nunaa ia hara noa ˈtu ratou e ia hopoi-tîtî-hia ratou. I te tahi aˈe pae, ia parau oia e e ore e tuuhia te hara a te metua tane i nia i te tamaiti, te parau ra ïa oia no nia i te hopoia a te taata tataitahi.

E ite-faahou-hia te tahi mau taa-ê-raa i rotopu i te mau faatiaraa parau no nia i te fanauraa o Iesu i papaihia i roto i te Mataio 1:18-25 e i roto i te Luka 1:26-38. E mau faahaparaa mau anei te reira?

Ua taio aˈenei anei outou e piti faatiaraa parau i papaihia no nia i te hoê taata tuiroo? Mai te peu e e, ua tapao mai anei outou e mea taa ê te tahi e te tahi ma te ore hoi e faahapa ra te tahi e te tahi? E pinepine roa, tei te mau manaˈo iho ïa o te taata papai aore ra tei te mau parau ta ˈna i rave mai; aore ra, ta ˈna e manaˈo ra e mea faufaa ia faahiti, ta ˈna huru hiˈoraa i te mau mea e tae noa ˈtu hoi te taata no reira oia i papai atu ai i ta ˈna buka. No reira, mea taa ê iho â ïa te mau papai i faataehia ˈtu i te mau taata o te mau nunaa, i te mau papai i faataehia ˈtu i te feia taio ati iuda, o tei taa hoi e tei farii aˈena i te tahi mau ohipa i tupu.

O te tahi noa teie mau hiˈoraa no te mau tuhaa o te Bibilia oia hoi, ia ore ia tuatapapa-maite-hia, mai te huru ra ïa e te faahapa ra te tahi e te tahi. Ia hiˈopoa maite râ tatou i te reira, ma te haapao i te taatoaraa o te parau e faatiahia ra e ia au hoi i te huru hiˈoraa a te taata papai, e faaoti ïa tatou e e ere roa ˈtu te reira i te mau faahaparaa, o te tahi noa râ mau irava e titau ra e ia ravehia te tahi atu mau maimiraa. Eita hoi te rahiraa o te feia taio e rave i taua tutavaraa faufaa mau ra; mea ohie aˈe hoi na ratou ia parau e: “Te faahapa ra te Bibilia ia ˈna iho.”

E tia mau â oia ia tiaturihia

Ua vaiiho mai te varua moˈa o te Atua na te feia papai i te Bibilia, i te hoê tiamâraa rahi i roto i ta ratou huru papairaa (Ohipa 3:21). Mea na reira ˈtura ïa ratou i nehenehe ai e horoa mai i te hoê hohoˈa nehenehe mau no nia i te mau mea ta ratou i ite. Teie râ, i te mea hoi e mea taa ê to te tahi e to te tahi huru, e riro ïa te reira i te haafaufaa mai ia ratou e i te haapapu mai e mea mau te mau mea ta ratou i papai, i te mea hoi e eita ratou e nehenehe e parihia i te haavare aore ra e parihia e ua faaau maite ratou i ta ratou parau (Petero 2, 1:16-21). Noa ˈtu â ïa e ua faaohipa ratou i te tahi mau faaiteraa parau taa ê, hoê â tapao ta te feia papai e titau ra: te faaiteraa i te taata e nafea te Atua ra o Iehova ia faaoaoa ia ratou, e te faataaraa ˈtu ia ratou te ohipa te tia ia ratou ia rave ia farii mai oia ia ratou. — Maseli 2:3-6, 9.

E buka te Bibilia o te titau mai i to tatou feruriraa. Mea papu maitai hoi oia mai te tahi pae e tae atu i te tahi pae; aita roa ˈtu oia e faahapa ra ia ˈna iho. E tia mau â hoi ia tatou ia tiaturi i ta ˈna na buka 66, i ta ˈna na pene 1 189 e ta ˈna mau irava 31 173. E, e nehenehe mau â outou e tiaturi i te Bibilia!

[Tumu parau tarenihia i te api 6]

Ia ite noa ˈtu outou i te hoê “faahaparaa” i roto i te Bibilia, e riro paha e

◆ aita i papu maitai ia outou te tahi mau parau tumu aore ra te tahi mau peu tahito?

◆ aita outou i haapao maitai i te taatoaraa o te faatiaraa parau?

◆ aita outou e taa maitai ra i te huru hiˈoraa o te taata papai?

◆ te hinaaro ra outou e faatuati te tahi mau manaˈo faaroo hape e ta te Bibilia e hinaaro mau ra e parau?

◆ te faaohipa ra outou i te hoê Bibilia tahito e aita e tano maitai?

[Hohoˈa i te api 7]

Te parau ra o Mataio e ua faaora o Iesu e piti na matapo. Te faahiti noa ra hoi o Mareko raua o Luka i te parau no te hoê matapo. E faahaparaa anei te reira?