E Taata mau anei te Atua?

“INAHA, te vai ra te hoê Atua”, o te parau ïa e taiohia i roto i te Daily Express no te 14 no atete 1981. Te faaite ra taua vea nei i te manaˈo o e piti na aivanaa tuiroo roa. Ua manaˈo hoi raua mai teie huru i muri aˈe i to raua iteraa e eita roa ˈtu e nehenehe e haapapuhia e mea tupu noa mai te ora. Teie râ, eaha ta taua na taata faaroo apî nei e hinaaro ra e parau na roto i te parau ra “Atua”? Teie ta te vea i faahitihia ˈtu na e parau ra: “Te Atua, i to raua manaˈo, o te ao nei ïa.”

Mai te peu e te tiaturi ra outou i ta Atua, mea nafea ïa ta outou iho huru hiˈoraa ia ˈna? Te manaˈo atoa ra anei outou e e maramarama rahi oia eita e nehenehe e faataa, te hoê puai papu-ore-hia e itehia i te mau vahi atoa, “E mea noa”? Aore ra te ite ra outou ia ˈna mai te hoê Taata e nehenehe e taahia e te maramarama atoa hoi?

Mea fifi roa na te tahi pae ia manaˈo e e Taata te Atua. E riro atoa paha ratou i te manaˈo e ia na reirahia i te parau no ˈna, e tuu-roa-hia ïa oia i nia i te tiaraa taata rii nei, e manaˈohia mai ta te mau tamarii e faahohoˈa ra i te Poiete, oia hoi mai te hoê ruau, huruhuru taa uouo roa roa, tei ahu i te hoê ahu e taupoo e te parahi ra i nia i te hoê ata; aore ra, mai te hoê ruau paetaeta maitai e te puai hoi e tere haere noa na roto i te aore, ta Michel-Ange i peni i nia i te aroaro o te fare pure katolika no Sixtine.

Parau mau, ia faaroo tatou i te parau ra “taata” e oioi paha ïa tatou i te manaˈo i te hoê taata mai ia tatou nei. Te faataa ra te titionare ra Le Grand Robert de la langue française, i te parau ra “taata” na roto i te parau ra “no roto mai i te huitaata nei”. Teie râ, te horoa atoa ra oia i teie faataaraa: ‘taata te vai ra to ˈna haava manaˈo, te tamau ra i te feruri, e i te pae no te mau ture morare, o te nehenehe e faataa i te maitai e te ino.’ E nehenehe atura ïa tatou e manaˈo e e Taata te Atua, ma te ore roa ˈtu e horoa no ˈna i te hohoˈa o te hoê taata.

E riro paha ïa vetahi pae i te parau e: ‘Eaha hoi te taa-ê-raa, ia faarirohia te Atua mai te hoê puai papu-ore-hia ia faataa aore ra mai te hoê Taata?’ Inaha hoi, mai te peu e e puai noa te Atua, “E mea noa”, e ere anei ïa te auraa e e te ora taata nei mai te hoê noa ïa matini? E “taipe” noa ïa te taata, e tuhaa iti i roto i te hoê matini rahi roa. Teie râ, mai te peu e e Taata maramarama te Atua, e ere anei ïa mea faufaa aˈe te oraraa? I te parau mau, te horoa mai nei te reira na tatou i te tiaturiraa e e nehenehe ta tatou e atuatu i te mau auraa maitai e te Atua, eiaha te mau auraa i rotopu e piti na “taipe”, i rotopu râ e piti na taata.

Ma te papu maitai, mea hinaarohia ˈˈe ia atuatu i te mau auraa e te Atua iho, taata e taata. Teie râ, na mua ˈˈe, nafea tatou e nehenehe ai e ite e e Taata mau te Atua? E mai te peu e e Taata oia, nafea ïa tatou e nehenehe ai e taai i te mau auraa e o ˈna? E hiˈopoa anaˈe na eaha ta te Bibilia e nehenehe e haapii mai no nia i taua tumu parau ra.