Ua faahiahia roa te hoê vahine katolika ia ˈna
Ua puta te huira o te hoê vahine marite Ite no Iehova i te tahi vahi. Ua haere atura ïa oia e patoto i te opani o te hoê fare fatata roa mai. Ua farii maira te hoê vahine e faaea na i reira ia tomo mai oia i roto i te fare no te taniuniu i te taata tataˈi huira. Ua hapono atura taua vahine kerisetiano nei i muri aˈe i te hoê parau haamauruururaa e ua hapono atoa ˈtu hoi oia i te hoê buka oia hoi E nehenehe oe e ora e a muri noa ˈtu i roto i te paradaiso i nia i te fenua nei. Inaha, teie te tahi tuhaa o te rata i faataehia mai ia ˈna ra:
“Eita vau e haavare ia oe. E katolika vau. E i te mau taime atoa te hoê taata e haere mai ai i to ˈu uputa e e Pare Tiairaa ta ˈna aore ra te tahi atu vea, e tamata na vau i te ore e farii atu. E mai te peu e e manuïa ratou i te rave e ia farii vau, e faarue atu ïa vau i roto i te farii pehu. Ua aˈa hohonu roa te haapaoraa katolika i roto ia ˈu mai to ˈu â tamarii-rii-raa ra.
“Inaha, ua huti ta outou buka i to ˈu manaˈo no te mea te faahiti ra oia i te parau no te hoê paradaiso i roto i ta ˈna upoo parau e mea ohie roa atoa hoi ia taio. Te faaitoito ra te mau uiraa i raro mai i te api e ia taio iho â tatou e mea au roa na ˈu te mau hohoˈa. Mea au roa hoi na ˈu te api 11, no te mea e tamata na vau i te faatupu i o ˈu iho te hoê paradaiso no te mau manu e te mau animala. E lia ta ˈu, mau rabiti, mau tamias, mau écureuils, mau dindes oviri e te mau huru manu atoa. (...)
“E ohipa faahiahia mau ta outou i faatupu i te faataioraa outou te hoê buka a te tahi atu haapaoraa i te hoê vahine katolika. E manaˈo vau e eita roa ˈtu vau e taui i ta ˈu haapaoraa. Ua taio râ vau i teie buka, e te taio atoa ra ta ˈu tane i teie taime. Mauruuru â pai!”
E 256 api to roto i teie buka faahiahia mau ra; hoê â hoi to ˈna rarahi e teie nei vea e ua hau atu i te 150 hohoˈa e te rahiraa e mau hohoˈa peni ïa.
A faaite mai na ia ˈu nafea e nehenehe ai e noaa mai ia ˈu te buka ra E nehenehe oe e ora e a muri noa ˈtu i roto i te paradaiso i nia i te fenua nei.