Te parau mau no nia i te Atua

Mai te aha te tino o te Atua?

“E Varua te Atua.”—Ioane 4:24.

TA TE BIBILIA E PARAU RA

Ia au i te Bibilia, e Varua te Atua. (Korinetia 2, 3:17) Mea teitei roa ïa oia ia tatou. Te na ô ra te Timoteo 1, 1:17, o ˈna “te Arii hau mure ore e te pohe ore, e te itea ore ia hiˈo.” Te parau-atoa-hia ra: “Aita e taata i hiˈo i te Atua.”—Ioane 1, 4:12.

No te hau ê o te Atua Poiete e ore ai tatou e nehenehe e ite mai te aha mau na to ˈna hohoˈa. Te na ô ra te Isaia 40:18: “O vai ta outou e faafaito i te Atua? eaha ta outou hohoˈa ia faaau ia ˈna?” Mea faahiahia aˈe iho â te Manahope i te mau raˈi.—Isaia 40:22, 26.

Te vai ra râ te ite e te paraparau roa ˈtu i te Atua. No te aha e nehenehe ai? No te mea e varua atoa ratou e ora ra i te raˈi. (Te mau arii 1, 22:21; Hebera 1:7) No te mau melahi, ua parau Iesu Mesia: “E tia ïa [ratou] i te hiˈoraa ˈtu i te mata o tau Metua i te ao.”—Mataio 18:10.

Tei te mau vahi atoa anei te Atua?

“E na ô outou ia pure: E to matou Metua i te ao.”—Mataio 6:9.

TA TE BIBILIA E PARAU RA

Aita te Bibilia e haapii ra e tei te mau vahi atoa te Atua i te mau taime atoa. Te faaite ra râ ta Iesu i parau i roto i te Mataio 6:9 e 18:10 e mea mau te Atua. E “Metua” oia e ora ra i te raˈi, to ˈna “parahiraa mau.”—Te mau arii 1, 8:43.

Hou a pohe ai, ua na ô Iesu: “Te faarue nei au i teie nei ao, e te hoˈi faahou nei au i te Metua.” (Ioane 16:28) I muri aˈe i to ˈna poheraa e tia-faahou-raa ei varua, ua reva ˈtura te Mesia i “te raˈi . . . ia faaite oia ia ˈna iho i mua i te aro o te Atua.”—Hebera 9:24.

Mea faufaa anei tei faaitehia ˈtu na? E. I te mea e te vai mau ra te Atua, e nehenehe tatou e matau e e haafatata ˈtu ia ˈna. (Iakobo 4:8) A ite ai i te parau mau no nia i te Atua e ore ai tatou e farii i te haapiiraa hape, mai te haamoriraa i te mau hohoˈa e tii. Te na ô ra te Ioane 1, 5:21: “E au mau tamarii ra, e ara ia outou i te mau idolo.”

Eaha te auraa e ua hamanihia te taata ma to te Atua huru?

“Hamani ihora hoi te Atua i te taata ma to ˈna ihora huru, i hamani oia ia ˈna ma te hohoˈa o te Atua ra; i hamani oia ia raua, o te tane e te vahine.”—Genese 1:27.

TA TE BIBILIA E PARAU RA

Ei taata, e nehenehe tatou e faatupu i te mau huru maitatai o te Atua mai te here, te parau-tia e te paari. No reira te Bibilia e na ô ai: “Ei pee outou i te Atua mai te tamarii herehia ra; ei haerea aroha to outou.”—Ephesia 5:1, 2.

Ua hamani atoa te Atua ia tatou ma te tiamâraa e maiti i te mea maitai i te mea ino e ia faaite i te here i nia ia vetahi ê ma te ravea rau. (Korinetia 1, 13:4-7) E nehenehe ta tatou e feruri e e hamani, e ite i te mea nehenehe e ia faahiahia i te mau mea maere e haaati maira. Hau roa ˈtu â, e hinaaro iho â tatou e haapii no nia i te Atua Poiete e to ˈna hinaaro.—Luka 11:28.

E faufaahia anei ia ite i te parau mau? Rahi atu â tatou i te haapii no nia i te Atua e i te pee i to ˈna huru, rahi atu â tatou i te ora ia au i to ˈna hinaaro. E mauruuru mau e e hau roa ïa tatou a oaoa ˈtu â ai. (Isaia 48:17, 18) Ua ite iho â te Atua e te vai ra to ˈna mau huru maitatai i roto i te aau o te taata. Na te reira e faatae mai ai i te feia haavare ore ia ˈna a haere atu ai ratou na te eˈa o te ora mure ore.—Ioane 6:44; 17:3.