32 ELISAIA
“E Iehova, a faaaraara na i to ˈna mata”
TEI nia te oire o Dotana tei aua-maitai-hia i te hoê aivi i ropu i te hoê peho i Iseraela. I te hoê poipoi, te tia ra te tahi tavini i rapaeau, e te ite ra oia i te hoê ohipa riaria mau! Te haere mai ra te nuu puai no Suria, te mau puaahorofenua e pereoo tamaˈi i te po. Teie nei te haaati ra ratou i te oire. Te imi ra ratou i te hoê taata, o Elisaia te peropheta. Ua mǎtaˈu roa te tavini e ua horo oia e parau i te peropheta, e ati pohe te tiai mai ra ia ˈna.
E ere a tahi ra Elisaia i faaruru ai i te mau tupuraa atâta. Tau matahiti na mua ˈtu, ua tono Iehova i te peropheta Elia no te faaineine ia Elisaia ei mono no ˈna. Ua faaruru raua i te ino o te arii Ahaba, ta ˈna vahine o Iezebela e ta raua tamaiti o Ahazia. I muri iho, ua fa mai te tahi pereoo auahi e te mau puaahorofenua auahi no te faataa ê ia Elia ia Elisaia. Ua ravehia Elia no te haere i te raˈi. Aita Elisaia i ite faahou i to ˈna hoa, tera râ, ua tamau o ˈna i te rave i te ohipa ta Elia i haapii ia ˈna. E ua aratai Elisaia i te mau peropheta a Iehova no te faaore i te haamoriraa a Baala i Iseraela.—Arii 2, 2:15.
Ua horoa Iehova ia Elisaia i te mana no te faatupu e rave rahi semeio. Tau taime na mua ˈtu, ua faaora te peropheta ia Naamana hoê raatira faehau, e tavini atoa na Bene-hada te arii no Suria. Tera râ, aita teie arii i faaite i te mauruuru e ua tamau o ˈna i te aro ia Iseraela. Ua haafifi noa Iehova ia Bene-hada ma te faaite ia Elisaia ihea o ˈna e aro ai. Ua riri roa te arii no Suria e ua ani oia i ta ˈna mau tavini na vai i faaite i ta ˈna mau opuaraa. Ua parau te hoê tavini, na Elisaia te peropheta a Iehova “e faaite ra i te arii o Iseraela i te mau mea ta oe e parau ra, i roto atoa i to oe piha.” I to Bene-hada taaraa tei Dotana o Elisaia, ua tono o ˈna i to ˈna mau taata no te haru i te peropheta.
E au ra e aita e hororaa to Elisaia e ta ˈna tavini e o raua anaˈe, ua taa râ i te peropheta i ta te tavini i ore i ite
O te tavini a Elisaia tei ite na mua i te nuu no Suria. Ua horo oia i te peropheta, ma te tuô: “Auê hoi e to ˈu fatu e! Eaha ta tatou e rave?” Ua taa ia Elisaia ua riaria roa te tavini, ua tamǎrû râ oia ia ˈna: “Eiaha e mǎtaˈu!” E ua faahiti o ˈna i teie mau parau faahiahia: “Mea rahi aˈe i to tatou nei pae i to ratou.” Peneiaˈe ua hiˈo te tavini i te peropheta ma te maere. E nafea raua e rahi aˈe i te hoê nuu rahi? Ua pure ïa Elisaia ia Iehova: “E Iehova, a faaaraara na i to ˈna mata, ia ite o ˈna.”
Ua pahono oioi Iehova ia ˈna. Ua tauturu o ˈna i te tavini ia ite i te nuu melahi a Iehova e haaati ra ia ratou. Mea rahi aˈe te mau melahi i teie nuu. Te parau ra te Bibilia: “Ati aˈe ia Elisaia, ua î te tuhaa fenua mouˈa i te puaahorofenua e te pereoo tamaˈi auahi.”
Aita te nuu no Suria i ite i te nuu melahi a Iehova. Te faafatata ra ratou i te oire no te haru ia Elisaia. Ua ani ïa Elisaia ia Iehova ia haapo i to ratou mata. Aita te mata o taua mau faehau ra o Suria i po, e au ra e ua tapea Iehova ia ratou ia ore ia taa i te ohipa e tupu ra. Aita ˈtu e ravea, ua aratai Elisaia ia ratou. Ua afai o ˈna ia ratou i Samaria, 16 kilometera te atea, e ua ani oia ia Iehova ia ite faahou ratou. I to Iehova na reiraraa, ua taa ia ratou teihea ratou, i ropu i te oire pu no Iseraela. Ua hinaaro te arii no Iseraela e haapohe ia ratou. Ma te hamani maitai râ, ua faaue Elisaia ia faatamaa e ia faahoˈihia te pǔpǔ eiâ a to Suria i ǒ ratou. Te na ô ra te hopearaa o te aamu: “E aita te mau pǔpǔ eiâ a to Suria i haere faahou mai i te fenua o Iseraela.”
Ua taa i te peropheta te vai ra te nuu melahi i reira. Ua haapii o ˈna i te roaraa o ta ˈna taviniraa ia Iehova, aita te mau melahi i atea roa, e hinaaro noa ratou e tauturu i te mau tavini taiva ore a te Atua. Ma te ite i te reira ua itoitohia Elisaia, e e itoito-atoa-hia tatou i teie mahana.
A taio i te aamu Bibilia:
A aparau:
Mea nafea to Elisaia faaiteraa i te itoito?
A faahohonu atu â
1. Eaha te faaite ra ua ineine, faaoti papu e ua mauruuru Elisaia i to Iehova maitiraa ia ˈna ei peropheta? (Arii 1, 19:19-21; it “Elisaia” No 1 par. 1) A
Hohoˈa A
Hohoˈa A
2. No te aha Elisaia i ani ai “e piti tuhaa” o te varua o Elia? (Arii 2, 2:9; w03 1/11 31)
3. No te aha tatou e manaˈo ai aita Iehova i haapo iho â i te mata a to Suria? (it “Haapo i te mata” par. 6)
4. A faataa i te mau ohipa ta Elisaia i rave ei peropheta. (it “Elisaia” No 1 par. 26-27)
A feruri i te mau haapiiraa
E nafea tatou e ite ai aita te mau melahi i atea roa ia tatou no te horoa mai i te itoito? B
Hohoˈa B
E nafea te mau matahiapo e tatou atoa ia pee i te hiˈoraa o Elisaia i to ˈna faaitoitoraa i ta ˈna tavini?
I roto i teihea tuhaa e nehenehe ai oe e pee i te itoito o Elisaia i roto i to oe oraraa?
A huti mai i te haapiiraa
Eaha ta teie aamu e haapii mai no nia ia Iehova?
E nafea teie aamu e tuati ai i te opuaraa a Iehova?
Eaha ta ˈu e hinaaro e ani ia Elisaia i te tia-faahou-raa?
A haapii hau atu â
Nafea te mau taeae e hopoia apî ta ratou e haapii ai i te hiˈoraa o Elisaia?
A hiˈopoa hau atu â haapiiraa no nia i te oraraa o Elisaia.