Iosua e te feia no Gibeona

Ua ite te tahi atu mau nunaa no Kanaana i tei tupu i Ieriko. Ua faaoti atura te mau arii o tera mau nunaa ia ohipa amui no te aro ia Iseraela. Tera râ, e opuaraa ê ta te feia no Gibeona. Ua tuu ratou i te ahu mutumutu e ua haere ratou ia Iosua ra ma te parau atu: ‘No ǒ mai matou i te hoê fenua atea roa. Ua faarooroo matou no nia ia Iehova e no nia i te mau mea atoa ta ˈna i rave no outou i Aiphiti e i Moabi. A euhe na e e ore outou e aro ia matou e e riro matou ei tavini na outou.’

Ua tiaturi Iosua i ta te feia no Gibeona i parau e ua farii oia i te faaauraa ia ore e aro ia ratou. Toru mahana i muri iho, ua ite Iosua e e ere to ratou fenua i te mea atea. No Kanaana râ ratou. Ua ani atura Iosua i to Gibeona: ‘No te aha outou i haavare ai ia matou?’ Pahono atura ratou: ‘Ua riaria matou! Ua ite matou e te aro nei to outou Atua ra o Iehova no outou. Eiaha e haapohe ia matou.’ Ua tapea Iosua i ta ˈna i euhe e aita oia i haapohe ia ratou.

Aita i maoro, ua opua e pae arii no Kanaana e ta ratou nuu i te aro ia Gibeona. Ua haere Iosua e ta ˈna nuu e faaora ia Gibeona ma. Ua titauhia te po taatoa no te tapae i ǒ ratou. Ua haamata te aroraa i te mahana i muri iho, i te poipoi roa. Ua haamata to Kanaana i te horo haere. E i te mau vahi atoa i horo ê ai ratou, ua faatopa Iehova i te mau ofai pape paari rarahi i nia ia ratou. Ua ani atura Iosua ia Iehova ia mau te mahana. No te aha oia i ani ai ia Iehova ia na reira inaha aita roa ˈtu te mahana i mau aˈenei? No te mea ua tiaturi rahi Iosua ia Iehova. Ua mau te mahana tae roa ˈtu i te taime i haapohe ai to Iseraela i te mau arii no Kanaana e ta ratou nuu. Hoê ïa mahana taatoa i te maoro.