Ua faatapuni Rahaba i na mata huna e piti

I haere na mata huna no Iseraela i te oire o Ieriko, ua noho raua i te fare o te hoê vahine, o Rahaba to ˈna iˈoa. Ua ite te arii o Ieriko i te reira e ua tono oia i te mau faehau i te fare o Rahaba. Ua faatapuni Rahaba i na mata huna e piti i nia iho i to ˈna fare e ua parau oia i te mau faehau e ua haere raua i te tahi atu vahi. Ua parau oia i na mata huna e piti: ‘E tauturu vau ia orua no te mea ua ite au e tei ia outou ra Iehova e e haru iho â outou i te fenua. A haapapu mai na e e faaora outou i to ˈu utuafare.’

Ua parau na mata huna ia Rahaba: ‘Te haapapu nei mâua e eita hoê aˈe taata o te vai i roto i to oe fare e haapohehia.’ Ua na ô raua: ‘A taamu i te hoê taura uteute i te haamaramarama o te fare e e ora mai to oe utuafare.’

Ua vaiiho Rahaba i na mata huna ia faaohipa i te taura i te haamaramarama no te haere ê. Ua haere raua na te mau mouˈa e ua tapuni raua i ǒ e toru mahana i te maoro hou a hoi ai ia Iosua ra. I muri iho, ua haere to Iseraela na roto i te anavai Ioridana e ua faaineine ratou ia ratou no te haru i te fenua. O Ieriko te oire matamua ta ratou i haru. Ua parau Iehova ia ratou ia haaati i te oire hoê taime i te mahana taitahi e e ono mahana i te maoro. I te hituraa o te mahana, ua haaati ratou i te oire e hitu taime. Faataˈi atura te mau tahuˈa i ta ratou pu e tuô atura te mau faehau ma te puai. Ua parari atura te mau patu o te oire! Tei nia i te patu hoi to Rahaba fare. Aita râ te reira i parari. Ua faaorahia Rahaba e to ˈna utuafare no te mea ua tiaturi oia ia Iehova.