Eaha te haapii mai i te hiˈoraa o to Gibeona?

1-2. No te aha tatou e hiˈopoa ˈi i te aamu o to Gibeona?

TEI te matahiti 1473 tatou hou te tau o Iesu. Ua upootia te nunaa Iseraela i nia i te mau oire o Ieriko e Ai, e ua haru ratou i te Fenua tǎpǔhia. Tupu atura te hoê ohipa manaˈo-ore-hia. Ua tae mai te tahi feia ratere ia ratou ra. Te na ô ra teie mau taata e na te fenua atea mai ratou i te haereraa mai. E te hinaaro nei ratou e faaau i te hau e te nunaa o te Atua.

² O vai teie mau taata? To Gibeona ïa. Teie te taime matamua e faahitihia ˈi ratou i roto i te Bibilia, e e faahiti-faahou-hia ratou i muri mai. Te faaite ra te Bibilia te vai ra te hoê taairaa piri i rotopu ia ratou e te ati Iseraela. No reira, e hiˈo mai tatou eaha ta tatou e haapii mai i to ratou hiˈoraa, e to Iehova huru i nia i teie nunaa.

A FAATUPU I TE FAAROO E TE HAEHAA

3. (1) O vai to Gibeona? (2) No te aha ratou i hinaaro ai e faaau i te hau e te ati Iseraela?

³ I to te ati Iseraela haamataraa i te haru i te fenua Kanaana, te ora ra to Gibeona i te oire o Gibeona. E ati Hevi ratou, hoê ïa o na hitu nunaa no Kanaana. “Mea rahi aˈe [ratou] e mea puai aˈe” i te ati Iseraela. (Deut. 7:1) Te auraa ïa, e nunaa puai mau teie. (Ios. 10:2) Tera râ, taa ê atu i te mau nunaa no Kanaana, ua taa i to Gibeona eita Iseraela e û ia ratou. Ua ite maitai ratou na Iehova e aro ra no to ˈna nunaa. E ua fafau o ˈna i te patu i teie mau nunaa i rapae ia Kanaana. (Exo. 34:11; Ios. 9:24) No reira, i to te ati Iseraela upootiaraa i nia i to Ieriko e Ai, tono atura to Gibeona i te tahi o to ratou mau taataa i Gilagala no te farerei ia Iosua e no te faaau i te hau.

4. (1) Ia au i te Iosua 9:8-13, eaha ta to Gibeona i parau i te ati Iseraela? (A hiˈo atoa i te hohoˈa.) (2) Iteraahia ua haavare ratou, eaha tei tupu?

⁴ A taio i te Iosua 9:8-13. Ua parau to Gibeona ia Iosua e na te fenua atea roa mai ratou i te haereraa mai. Ua faaroo ratou maoti Iehova i upootia ˈi te nunaa Iseraela i nia ia Aiphiti e te mau arii ati Amori Sihona raua Oga. Aita râ ratou i faahiti i tei tupu no Ieriko e no Ai. Mea nafea ïa ratou i te iteraa i te reira, inaha hoi na te “fenua atea roa” mai ratou i te haereraa mai? Ua vare iho â te mau raatira Iseraela i ta ratou i faatia ˈtu. Faaau atura ratou i te hau e to Gibeona ma te ore e ani i to Iehova manaˈo. (Ios. 9:14, 15) I muri mai, itehia ˈtura ua haavare to Gibeona. Ua tapea noa râ te ati Iseraela i ta ratou i faaau, no te mea ‘ua horeo ratou i to Gibeona i te ora o Iehova.’ (Ios. 9:16-19) E ua horoahia na ratou te tahi mau ohipa rii ia haapao, “ei ohi vahie e ei tii pape na te amuiraa e no te fata a Iehova.”—Ios. 9:27.

5. Mea nafea to Gibeona faatupuraa i te faaroo ia Iehova?

⁵ Ua purara te parau e ua faaau to Gibeona i te hau e te nunaa Iseraela. Riri atura na arii e pae ati Amori, e ua tahoê ratou no te aro i to Gibeona. Ua ani to Gibeona ia Iosua i te tauturu. (Ios. 10:3-7) E ua na reira iho â Iosua, e ua haamaitai Iehova i teie opuaraa ta ˈna. Mea nafea ïa? Ua faatopa Iehova i te ofai pape paari i nia i te mau faehau ati Amori, e ua tapea o ˈna i te mahana ia upootia roa mai Iseraela. (Ios. 10:9-14) Ua faatupu ïa to Gibeona i te faaroo ia Iehova. Inaha, ua faaau ratou i te hau e te ati Iseraela e ua ani ratou ia Iosua i te tauturu. Te auraa ïa, ua tiaturi iho â ratou e tapea Iehova i ta ˈna i fafau e e mana to ˈna no te faaora ia ratou.

6. Eaha ta tatou e haapii mai no nia i to Iehova huru i nia i to Gibeona?

⁶ Eaha ta teie aamu e haapii mai no nia ia Iehova? E Atua haehaa Iehova e te aroha hamani maitai. Ua faaue hoi o ˈna i to ˈna nunaa ia “tiahi . . . pauroa te taata o taua fenua ra,” to Gibeona atoa ïa. (Num. 33:51, 52) Noa ˈtu râ, ua turu o ˈna i ta to ˈna nunaa i faaau i to Gibeona. E ua faaite o ˈna i to ˈna aroha hamani maitai, inaha aita o ˈna i haamou i teie nunaa mai ta ˈna i opua na. Hau atu, ua tauturu oia i te ati Iseraela ia tapea i ta ratou i faaau e ua faaora semeio o ˈna i to Gibeona.—Ios. 9:26; 11:19.

7. E nafea tatou ia pee i te faaroo e te haehaa o to Gibeona? (A hiˈo atoa i te hohoˈa.)

⁷ E nafea ia pee i te hiˈoraa o to Gibeona? Ma te faatupu i te faaroo puai ia Iehova. Mea rahi aˈe ta tatou i ite no nia ia Iehova ia faaauhia i to Gibeona. Mea rahi atu â ïa to tatou tiaturi ia ˈna. (Sal. 40:4, 5) E pee tatou i to ratou haehaa ia farii tatou e rave i te mau ohipa rii e anihia mai. (Ios. 9:23, 27) Te haamanaˈo ra Luke, hoê taeae apî, i te haehaa o te hoê taeae o te Betela. E rave rahi hopoia ta teie taeae i roto i ta Iehova faanahonahoraa. Noa ˈtu râ, i te hoê taime, ua tavini o ˈna ei rima tauturu no te haapao i te vahi paturaa o te Piha a te Basileia i te po. Te na ô ra Luke: “Eita e navai ia parau tatou e taata haehaa tatou. Ua taa ia ˈu e itehia to oe haehaa na roto i te ohipa ta oe e rave nei aore ra eita e hinaaro e rave.” No reira, e faaite anaˈe i to tatou faaroo ia Iehova i te mau mahana atoa ma te turui i nia ia ˈna i roto i te fifi, e ma te rave i te mau ohipa atoa e anihia mai noa ˈtu mea haihai.

A VAIIHO NA IEHOVA E FAAAFARO I TE MAU OHIPA TANO ORE

8. Eaha te ohipa ino ta Saula i rave i nia i to Gibeona?

⁸ Tau senekele i muri mai, ua faahiti-faahou-hia to Gibeona i te tau o te arii Saula. Te faataa ra te Bibilia “no to ˈna . . . itoito rahi no te nunaa o Iseraela e o Iuda,” ua opua Saula e haapohe roa i to Gibeona.b Te mea peapea, ua pohe e rave rahi o ratou. (Sam. 2, 21:2, 5, 6) Mea huru rahi tera! Inaha, na roto i teie ohipa ino, ua mutu te faaauraa no te hau i rotopu ia Iseraela e to Gibeona.

9. Afea teie fifi i te faaafaroraahia?

⁹ Aita teie ati i faaafaro-oioi-hia tae roa i te tau o te arii Davida. I te hoê taime, ua tupu te oˈe e toru matahiti te maoro. Ani atura Davida ia Iehova eaha te tumu i tupu ai teie ati. Faaite maira Iehova ia ˈna ua opua Saula e to ˈna utuafare e taparahi pohe i to Gibeona tau matahiti na mua ˈtu.—Sam. 2, 21:1.

10. Ia au i te Samuela 2, 21:3-6, na te aha e faaite ra mea faatura to Gibeona i te Ture a te Atua?

¹⁰ A taio i te Samuela 2, 21:3-6. Ua farerei Davida i to Gibeona no te ani eaha ta ˈna e nehenehe e rave no ratou. Ua ani anei ratou i te moni? Ua tahoo anei ratou, inaha aita Davida i faaafaro oioi i teie fifi? Aita. Ua pahono ratou: “Eita matou e ani i te ario e te auro.” Ua tano iho â ratou. Inaha ia au i te Ture, eita e nehenehe e farii i te hoo no te ora o te hoê taparahi taata. (Num. 35:30, 31) Ua ite atoa ratou eita ta ratou e nehenehe e haapohe i te tahi atu taata. Faaue atura ïa Davida ia haapohehia e hitu tane no roto mai i te utuafare o Saula. E au ra e ua apiti atoa ratou i te taparahiraa taata i nia i to Gibeona. I muri iho, topa maira te ûa, e mau atura te oˈe. Tapao faaite ïa ua haamaitai Iehova i teie faaotiraa e ua faaafarohia teie fifi.—Sam. 2, 21:9, 10, 14.

11. Eaha ta tatou e haapii mai no nia ia Iehova?

¹¹ Eaha ta teie aamu e haapii mai no nia ia Iehova? Te haapapu ra teie tupuraa e Atua parau-tia Iehova. (Sal. 37:28) Eita o ˈna e au ia rave-ino-hia te tahi noa ˈˈe taata. Te vai ra o te hiˈo ino nei i te tahi mau taata, no te mea no te tahi atu fenua ratou aore ra mea taa ê ratou. I te taime ta ˈna i faataa, e faaafaro Iehova i te mau ohipa tano ore atoa ta ta ˈna mau tavini i faaruru. Te taa atoa ra ia tatou e hinaaro Iehova ia tapea tatou i ta tatou parau, mai ta ˈna i titau i te ati Iseraela. Ua hinaaro oia ia faatura ratou i ta ratou i faaau i to Gibeona.—A hiˈo atoa i te Amosa 1:9.

12. E nafea tatou ia pee i te hiˈoraa o to Gibeona ia haamauiuihia tatou?

¹² E nafea ia pee i te hiˈoraa o to Gibeona? Ia haamauiuihia tatou na te hoê taeae aore ra tuahine, e tiai anaˈe na Iehova e faaafaro i teie fifi. Ia na reira tatou, te faaite ra ïa tatou i to tatou tiaturi ia ˈna. A hiˈo na ia tuahine Laura French. Ua riro mai o ˈna ei mero no te utuafare o te Betela i Kanada i 1926. Ahuru matahiti i muri mai, ua pari-haavare-hia o ˈna i te amuimui i te hoê pǔpǔ apotata. Tuuhia ˈtura o ˈna i rapae i te Betela. Ua aha teie tuahine? Noa ˈtu to ˈna mauiui, aita o ˈna i inoino aore ra i amuamu. Ua haa râ o ˈna ma te itoito rahi i roto i te taviniraa pionie e maha matahiti. E i 1940, anihia ˈtura o ˈna ia hoˈi mai i te Betela e ua tavini o ˈna ia Iehova i ǒ hau atu e 50 matahiti tae roa ˈtu i to ˈna poheraa. Mai ia tuahine French, e noaa atoa ia tatou ia faaoromai i te hoê ohipa tano ore ma te rave i te mea maitai, a tiai noa ˈi i te mahana e faaafaro ai Iehova i teie fifi.—Isa. 26:3, 4.

A TURU NOA I TE HAAMORIRAA MAU

13. O vai te mau “Netinimi,” e eaha ta ratou i rave i te hopea o na 70 matahiti?

¹³ E faahiti-faahou-hia to Gibeona e 500 matahiti i muri aˈe i te tau o te arii Davida. I 537 hou te tau o Iesu, i te hopea o na 70 matahiti hopoi-ê-raahia te ati Iuda i Babulonia, ua hoˈi te pǔpǔ matamua i Ierusalema na muri i te tavana ra o Zerubabela. (Ezr. 2:1, 2, 58) I 468, ua hoˈi ïa te tahi atu pǔpǔ i Ierusalema na muri ia Ezera te papai parau. (Ezr. 7:1-7) I roto i na pǔpǔ e piti, te vai atoa ra te mau “Netinimi.” (A hiˈo i te nota o te Ezera 2:58 e 7:7.) O vai ratou? “E tavini o te hiero e ere i te ati Iseraela.” E au ra e no roto mai te rahiraa o ratou i te nunaa no Gibeona.—A hiˈo i te taˈo “Netinimi” i roto i te Titionare o te mau taˈo Bibilia.

14. Mea nafea to Gibeona faaiteraa i to ratou taiva ore ia Iehova? (Paraleipomeno 1, 9:2 e te nota)

¹⁴ A taio i te Paraleipomeno 1, 9:2 e te nota. E faahitihia “te mau tavini o te hiero” i rotopu i na taata matamua tei hoˈi i Iseraela. Mea faufaa roa teie manaˈo, no te aha? No te mea e ere pauroa te ati Iuda tei hoˈi i Ierusalema. E rave rahi o ratou e oraraa fanaˈo to ratou i Babulonia. Aita ratou i hinaaro e rave i te mau haapaeraa no te hoˈi i to ratou fenua e no te patu faahou i reira. Area râ te tahi mau taata tei hopoi-ê-hia, tae noa ˈtu te tahi mau huaai o to Gibeona, ua hinaaro ratou ia haamau-faahou-hia te haamoriraa mau e ia patu-faahou-hia te hiero. Ua ineine ratou i te rave i te mau haapaeraa atoa e titauhia. Taa ê atu i te ati Iuda, aita to ratou e fenua i Iseraela. Noa ˈtu râ, ua hoˈi ratou e ua tavini faahou i te hiero. E ua apiti ratou i te tataîraa i te mau patu o te oire.—Neh. 3:26.

15. Eaha ta teie aamu e haapii mai no nia ia Iehova?

¹⁵ Eaha ta teie aamu e haapii mai no nia ia Iehova? Mea here na Iehova ta ˈna mau tavini taiva ore e mea aupuru o ˈna ia ratou. I to Iehova faaoraraa i to Gibeona i te tau o Iosua, ua tamau noa o ˈna i te haamaitai ia ratou. I to Babulonia haamouraa ia Ierusalema i 607, ua faaora Iehova i to Gibeona. E i to ratou hoˈiraa ˈtu i Iseraela, ua tamau Iehova i te faaohipa i to ratou huaai no te tavini i roto i te hiero. Te vai ra o te ora ra i pihai iho i te hiero. (Ezr. 2:70; Neh. 11:21) E aita ratou i faaaufauhia i te tute, te ô titauhia aore ra te tute ratere.—Ezr. 7:24.

16. E nafea tatou ia pee i te itoito rahi o to Gibeona?

¹⁶ E nafea ia pee i te hiˈoraa o to Gibeona? E hinaaro atoa tatou e turu i te haamoriraa mau. Ua ineine tatou i te rave i te mau haapaeraa no te tavini ia Iehova no to tatou here ia ˈna. A hiˈo na ia Alwin, hoê taeae no Philipino. E ohipa aufau-maitai-hia ta ˈna. Ua hinaaro râ o ˈna e rave hau atu â no Iehova e aita o ˈna i haamarirau. Ia tere mai te tiaau haaati i roto i ta ˈna amuiraa, e rave o ˈna i te mahana faafaaearaa no te turu i te hebedoma taa ê. Mea au roa na ˈna e apiti atu â i roto i te pororaa. Taeraa râ i te hoê taime, ua pure o ˈna ia Iehova e faaoti ihora o ˈna e vaiiho i ta ˈna ohipa e imi atu ai i te tahi atu ia nehenehe oia e tavini ei pionie tamau. Ua titauhia te tahi mau haapaeraa i te pae materia, ua naea râ ta ˈna fa. Riro atoa atura ta ˈna vahine ei pionie tamau. E ua tauturu raua e 21 taata ia haapii i te parau mau. Eita e ore ua haamaitai Iehova i ta raua mau tutavaraa. Ia papu atoa ia tatou mea faufaa no Iehova te mau haapaeraa ta tatou e rave nei no te tavini atu â ia ˈna. E ua fafau o ˈna i te aupuru ia tatou.—Mat. 6:33.

17. Eaha ta tatou i haapii mai i roto i teie tumu parau?

¹⁷ Te faaite mai ra te aamu o to Gibeona i to Iehova huru faahiahia mau. E Atua haehaa o ˈna, aroha hamani maitai, parau-tia e te taiva ore. E haamaitai noa o ˈna i ta ˈna mau tavini taiva ore. Mea rahi ta tatou i haapii mai i roto i teie tumu parau. Mai to Gibeona, e haapuai anaˈe i to tatou faaroo ia Iehova. E turui anaˈe i nia ia ˈna i te taime fifi. Maoti te faaroo, e vai haehaa noa tatou a farii atu ai i te mau hopoia atoa i roto i ta ˈna faanahonahoraa. Ia faaruru tatou i te ohipa tano ore, e tiai tatou e na Iehova e faaafaro i te reira i te taime ta ˈna i faaoti. Hau atu, e turu noa tatou i te haamoriraa mau ma te itoito rahi. Ia na reira tatou, te pee ra tatou i te hiˈoraa o to Gibeona.