Eaha te hinaaro o te Atua no tatou?

I ROTO i te vea, te afata teata e te radio, e ite e e faaroo oe te tupu ra e rave rahi ohipa iino, te tamaˈi e te ohipa totoaraa. Peneiaˈe, te mauiui atoa ra oe no te maˈi aore ra no te mea ua pohe tei herehia.

Te faaroo ra te tahi utuafare i te radio

A uiui na:

Tera anei ta te Atua e hinaaro no ˈu e no to ˈu utuafare?
Ihea vau e fanaˈo ai i te tauturu no te faaruru i te fifi?
E tupu anei te hau i te hoê mahana?

Te horoa ra te Bibilia i te pahonoraa papu i teie mau uiraa.

TE HAAPII RA TE BIBILIA E FAATUPU TE ATUA I TE MAU OHIPA FAAHIAHIA I NIA I TE FENUA.

Eita te taata e mauiui, e ruau e e pohe faahou.—Apokalupo 21:4
“Ei reira te pirioi e ouˈauˈa noa ˈi mai te aili.”—Isaia 35:6
“Ei reira e faaaraarahia ˈi te mata o te matapo.”—Isaia 35:5
E tia faahou mai tei pohe.—Ioane 5:28, 29
Eita te taata e maˈihia.—Isaia 33:24
E fanaˈo te taata atoa i nia i te fenua i te maa.—Salamo 72:16

IA FAUFAAHIA OE I TA TE BIBILIA E HAAPII MAI

Te haapii ra te tahi Ite no Iehova i te Bibilia i te hoê taata

Mea ohie ia manaˈo e moemoeâ noa ta oe i taio i te mau api na mua ˈtu. Ua fafau râ te Atua fatata roa oia i te faatupu i tera mau tauiraa i nia i te fenua. Te faataa atoa ra te Bibilia e nafea o ˈna e faatupu ai i te reira.

E ere râ tera anaˈe, te faaite atoa ra hoi te Bibilia eaha te tia ia ite no te oaoa mau i teie nei â. A feruri na no te mau mea o ta oe e haapeapea ra. Mai te moni paha, te mau hinaaro o to oe utuafare, te maˈi aore ra no te mea ua pohe tei herehia. E nehenehe te Bibilia e tauturu atu ia faaruru i tera mau fifi e e tamahanahanahia oe na roto i ta ˈna mau pahonoraa i te mau uiraa mai teie:

No te aha tatou e mauiui ai?
E nafea tatou ia faaruru i te fifi?
Eaha te rave ia oaoa to tatou utuafare?
Eaha te tupu ia pohe tatou?
I te hoê mahana, e farerei faahou anei tatou i te feia herehia o tei pohe?
E nafea ia papu e faatupu iho â te Atua i te mau mea atoa ta ˈna i fafau?

I te mea te taio ra oe i teie buka, e tapao faaite ïa te hinaaro ra oe e ite i ta te Bibilia e haapii mai. E tauturu te mau uiraa e paratarafa o teie buka ia taa ˈtu â i te Bibilia. E mirioni taata o tei oaoa i te aparau i nia i te Bibilia na muri i te mau Ite no Iehova. Te tiaturi nei matou e na reira atoa oe! Ia haamaitai atu te Atua a hiˈopoa noa ˈi oe eaha ta te Bibilia e haapii mai!