Teie anei ta te Atua i opua?
A TAIO na i te tahi vea. A hiˈo na i te afata teata, aore ra a faaroo na i te radio. Mea rahi roa te parau o te ohipa ino, te tamaˈi, e te ohipa totoaraa! A feruri na i to outou iho mau ahoaho. Peneiaˈe te ahoaho roa nei outou no te maˈi aore ra ua pohe tei herehia. E tuea paha to outou manaˈo e to te taata maitai ra o Ioba, tei parau e “te î ra” oia “i te ati.”—Ioba 10:15, Te Bibilia Moˈa V.C.J.S. (1976)
A ui na ia outou iho:
Teie anei ta te Atua i opua no ˈu e no te toea o te huitaata?
Ihea e itea ˈi ia ˈu te tauturu no te faaruru i to ˈu mau fifi?
Te vai ra anei te tahi tiaturiraa e e tupu te hau i te fenua nei ia tae i te hoê mahana?
Te pahono ra te Bibilia ma te au i tera mau uiraa.
TE HAAPII RA TE BIBILIA E E FAATUPU TE ATUA I TEIE MAU TAUIRAA I TE FENUA NEI.
“Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui.”—Apokalupo 21:4
“Ei reira te pirioi e ouˈauˈa noa ˈi mai te aili.”—Isaia 35:6
“Ei reira e faaaraarahia ˈi te mata o te matapo ra.”—Isaia 35:5
“E [haere mai] te feia atoa i roto i te apoo ra . . . i rapae.”—Ioane 5:28, 29
“E ore hoi to reira e parau e, Ua paruparu vau i te maˈi.”—Isaia 33:24
“E riro hoi e maa sitona tei te fenua.”—Salamo 72:16
A HAAFAUFAA I TE MAU HAAPIIRAA BIBILIA
Eiaha e ru i te hiˈo i te mau mea i vauvauhia i to na mua ˈtu mau api ei moemoeâ noa. Ua fafau te Atua i te faatupu i tera mau mea, e te faataa ra te Bibilia e nafea oia.
E ere râ tera anaˈe ta te Bibilia e rave. E ravea atoa te reira e fanaˈo ai outou i te hoê oraraa oaoa mau i teie nei atoa. A feruri na maa taime i to outou iho mau tapitapi e ahoaho, mai te ereraa i te moni, te fifi utuafare, te maˈi, aore ra te pohe o te hoê taata here. E nehenehe te Bibilia e tauturu ia outou ia faaruru i te mau fifi i teie mahana, e e tamǎrû ia outou ma te pahono i teie mau uiraa:
No te aha tatou e mauiui ai?
E nafea tatou e nehenehe ai e faaruru i te mau tapitapi o te oraraa?
E nafea to tatou oraraa utuafare e oaoa ˈtu â ˈi?
Eaha te tupu i nia ia tatou ia pohe tatou?
E farerei faahou anei tatou i to tatou feia here i pohe?
E nafea tatou e papu ai e e faatupu te Atua i ta ˈna mau parau fafau no a muri aˈe?
A taio ai outou i teie buka, te faaite ra ïa outou e e hinaaro outou e ite eaha ta te Bibilia e haapii ra. E tauturu teie buka ia outou. E uiraa to te mau paratarafa. E mau mirioni tei au i te aparau i te Bibilia e te mau Ite no Iehova ma te mau uiraa e te mau pahonoraa. Te tiaturi nei matou e e au atoa outou. Ia haamaitai te Atua ia outou a fanaˈo ai outou i teie nei i te haamaitairaa faahiahia e te oaoa e ite i ta te Bibilia e haapii mau ra!