Eaha te Betela?

E “Fare o te Atua” te auraa o te taˈo Betela i roto i te reo Hebera. (Genese 28:17, 19) E tano maitai tera iˈoa no te mau fare ta te mau Ite no Iehova i haamau i te ao nei no te aratai e te turu i te ohipa pororaa. Tei te pu rahi i Marite te Tino aratai e tiaau nei i te ohipa a te mau amaa i e rave rahi fenua. E parauhia te feia e tavini ra i tera mau vahi, te utuafare o te Betela i reira hoi ratou e noho ai, e ohipa ˈi, e tamaa ˈi e e haapii amui ai i te Bibilia ma te tahoê.—Salamo 133:1.

E vahi otahi e tavini ai te utuafare o te Betela. I te mau Betela atoa, te vai ra te mau tane e vahine Kerisetiano o te rave nei ma te itoito rahi i te hinaaro o te Atua e te mau ohipa tei taaihia i te Faatereraa arii ma te taime taatoa. (Mataio 6:33) Eita ratou e aufauhia, e vahi taotoraa râ to ratou, e maa e e moni iti ta ratou no ta ratou mau haamâuˈaraa. Mea faataahia te ohipa a te taatoaraa, piha ohipa, tunuraa maa, vahi tamaaraa, neneiraa, hamaniraa i te buka, tamâraa, puˈaraa ahu, atuaturaa e te vai ra ˈtu â.

E vahi ohiparaa e turu nei i te pororaa i te Faatereraa arii. Te fa matamua roa a te mau Betela atoa, ia ite ïa e rave rahi taata i te pue parau mau Bibilia. A hiˈo na i teie buka rairai. Ua papaihia te reira i raro aˈe i te tiaauraa a te Tino aratai, ua faahaerehia na roto i te roro uira i na hanere tiahapa pǔpǔ taata huri i te ao nei, ua neneihia e te tahi mau Betela maoti ta ratou mau matini mea vita i te nenei, a haponohia ˈtu ai i na amuiraa tei hau atu i te 110 000. I roto i teie mau tuhaa atoa, te turu rahi nei te mau utuafare o te Betela i te pororaa i te parau apî oaoa. E ohipa ru hoi teie.—Mareko 13:10.

• O vai te tavini ra i te Betela, e eaha ta ratou e fanaˈo?

• Teihea ohipa ru e turuhia nei e te mau Betela atoa?