Te parau mau no nia i te Metua, te Tamaiti e te varua moˈa

IA AU i te feia e tiaturi ra i te haapiiraa o te Toru tahi, e toru ihotaata te Atua—te Metua, te Tamaiti e te Varua Maitai. Te parauhia ra e e faito teie na ihotaata e toru, hoê â puai e aita e haamataraa to ratou. No reira, ia au i te haapiiraa o te Toru tahi, e Atua te Metua, e Atua te Tamaiti e e Atua te Varua Maitai, hoê noa râ Atua.

Te faˈi nei e rave rahi o te tiaturi ra i te Toru tahi e eita e haere ia ratou ia tatara i teie haapiiraa. I to ratou râ manaˈo, e haapiiraa Bibilia tera. E tano ia tapao e aita roa ˈtu te taˈo “Toru tahi” e vai ra i roto i te Bibilia. Teie râ, te vai ra anei te manaˈo o te hoê Toru tahi i reira? No te pahono i teie uiraa, e hiˈo mai tatou i te hoê irava ta te taata e faahiti pinepine no te paturu i te Toru tahi.

“O TE ATUA HOI TE LOGO”

Te na ô ra te Ioane 1:1 e: “I vai na te Logo i te matamua ra, i te Atua ra hoi te Logo, e o te Atua hoi te Logo.” I muri aˈe i roto i taua noa pene ra, te faaite maitai ra te aposetolo Ioane e o Iesu “te Logo.” (Ioane 1:14) I te mea râ e te parauhia ra e e Atua te Logo, te na ô ra vetahi e e tuhaa te Tamaiti e te Metua no te hoê â Atua.

A haamanaˈo e i papaihia na teie irava Bibilia i te matamua ra na roto i te reo Heleni. I muri aˈe, ua hurihia te papai Heleni na roto i te tahi atu â mau reo. Aita râ te tahi feia huri Bibilia i faaohipa i te parau ra “o te Atua hoi te Logo.” No te aha? Ia au i to ratou ite i te reo Heleni o te Bibilia, ua manaˈo ratou e mea maitai ia taui i te huriraa o taua parau ra. E nafea? Teie ïa te tahi mau hiˈoraa: “E huru atua na te Logo.” (A New Translation of the Bible) “E atua na te Logo.” (The New Testament in an Improved Version) “I te Atua ra te Logo e hoê â to raua natura.” (The Translator’s New Testament) Te Logo, ia au i teie mau huriraa, e ere ïa o te Atua iho.a No to ˈna râ tiaraa teitei i rotopu i te mau mea ora a Iehova, “e atua” ïa te Logo ia parauhia. Te auraa o te taˈo “atua” i ǒ nei, “tei puai” ïa.

TE TAHI ATU Â HAAMARAMARAMARAA

Aita te rahiraa o te taata i ite i te reo Heleni o te Bibilia. E nafea ïa outou e nehenehe ai e ite i te auraa mau o te parau a te aposetolo Ioane? A feruri na i teie hiˈoraa: Te faataa ra te hoê orometua haapii i te hoê tumu parau i ta ˈna mau piahi. I muri iho, e taa ê te manaˈo o te mau piahi no nia i ta ratou i taa. E nafea ïa te mau piahi? E nehenehe ratou e ani i te tahi atu â haamaramaramaraa i te orometua haapii. Papu maitai, na roto i te iteraa i te tahi atu â tupuraa e taa maitai atu â ˈi ia ratou te tumu parau. Oia atoa, no te taa i te auraa o te Ioane 1:1, e nehenehe outou e imi i roto i te Evanelia a Ioane i te tahi atu â haamaramaramaraa no nia i to Iesu tiaraa. Na roto i te iteraa i te tahi atu â tupuraa e huti mai ai outou i te faaotiraa tano.

A hiˈo na i ta Ioane e papai atoa i roto i te pene 1, irava 18: “Aore e taata i ite i te Atua [Mana hope].” Teie râ, ua ite mata te taata ia Iesu, te Tamaiti, te na ô ra hoi Ioane e: “I riro mai nei te Logo [Iesu] ei taata e ua tiahapa mai i ǒ tatou nei (e ua ite matou i to ˈna hanahana).” (Ioane 1:14) E nafea ïa te Tamaiti e nehenehe ai e riro ei tuhaa no te Atua Mana hope? Te parau atoa ra Ioane e “i te Atua ra” te Logo. E nafea ïa e nehenehe ai e parau e i te hoê taata ra te tahi atu taata e o ˈna atoa taua taata ra? Hau atu â, mai tei papaihia i roto i te Ioane 17:3, te faataa ê maitai ra Iesu ia ˈna i to ˈna Metua i te raˈi. Te parau ra oia no nia i to ˈna Metua “te Atua mau” hoê ra. E i te pae hopea o ta ˈna Evanelia, te haapoto ra Ioane mai teie e: “O teie râ tei papaihia, ia faaroo outou e, o Iesu te Mesia te Tamaiti a te Atua.” (Ioane 20:31) A tapao na e te parauhia ra Iesu, te Tamaiti a te Atua, eiaha râ te Atua. Te faaite ra teie haamaramaramaraa hau i roto i te Evanelia a Ioane, e nafea ia taa i te Ioane 1:1. E “atua” te Logo i roto i te auraa e e tiaraa teitei to ˈna eiaha râ mai to te Atua Mana hope ra.

HAAPAPU I TE MAU HAAMARAMARAMARAA

A rave faahou na i te hiˈoraa o te orometua haapii e te mau piahi. A feruri na e te feaa râ vetahi, i muri aˈe atoa i te faarooraa i te tatararaa hau a te orometua haapii. E nafea ïa ratou? E nehenehe ratou e ani i te haamaramaramaraa hau i te tahi atu orometua haapii. Mai te peu e e haapapu te piti o te orometua i te tatararaa a te orometua matamua, eita paha te rahiraa o te mau piahi e feaa faahou. Oia atoa, ia ore e papu maitai ia outou ta te taata papai Bibilia ra o Ioane i parau mau â no nia i te taairaa i rotopu ia Iesu e te Atua Mana hope, e nehenehe outou e imi i te haamaramaramaraa hau a te tahi atu taata papai Bibilia. A hiˈo na eaha ta Mataio i papai. No nia i te hopea o teie nei ao, te faahiti ra oia i ta Iesu i parau: “Area te reira mahana e te reira hora, e ore roa te hoê e ite, e ore hoi te mau melahi o te raˈi; maori râ o tau Metua anaˈe ra.” (Mataio 24:36) E nafea teie mau parau e haapapu ai e e ere Iesu i te Atua Mana hope?

Te parau ra Iesu e mea ite aˈe te Metua i te Tamaiti. Ahiri e tuhaa Iesu no te Atua Mana hope, e ite ïa o ˈna i te hoê â mea e to ˈna Metua. No reira ˈtura, eita te Tamaiti e te Metua e faito. E parau râ paha vetahi e: ‘E piti natura to Iesu. I ǒ nei, te paraparau ra oia mai te hoê taata.’ Ahiri te reira iho â, e nafea ïa i te varua maitai, aore ra varua moˈa? Ahiri e tuhaa te reira no te hoê â Atua ei Metua, no te aha ïa Iesu i ore ai e parau e ua ite te varua moˈa i ta te Metua i ite?

A haapii noa ˈi outou i te Bibilia, e ite outou e rave rahi atu â irava Bibilia o tei taaihia i teie tumu parau. Te haapapu ra te reira i te parau mau no nia i te Metua, te Tamaiti e te varua moˈa.—Salamo 90:2; Ohipa 7:55; Kolosa 1:15.