Haapiiraa 13
Nafea oe e ite ai i te haapaoraa mau?
E farii anei te Atua i te mau haapaoraa atoa, aore ra hoê anaˈe? (1)
No te aha e mea rahi te haapaoraa e faahua kerisetiano nei? (2)
Nafea oe e ite ai e o vai te mau kerisetiano mau? (3-7)
1. Ua haamata Iesu hoê anaˈe haapaoraa kerisetiano mau. No reira i teie mahana, e tia ia itehia hoê anaˈe tino, aore ra pǔpǔ, feia haamori mau i te Atua ra o Iehova. (Ioane 4:23, 24; Ephesia 4:4, 5) Te haapii nei te Bibilia e, mea iti roa te feia e haere ra na nia i te eˈa apǐapǐ e aratai tia ˈtu i te ora.—Mataio 7:13, 14.
2. Ua tohu te Bibilia e, i muri aˈe i te poheraa o te mau aposetolo, e ô mǎrû noa mai te mau haapiiraa hape e te mau peu kerisetiano ore i roto i te amuiraa kerisetiano. E ume vetahi mau taata i te feia faaroo ia apee mai ia ratou ei monoraa i te Mesia. (Mataio 7:15, 21-23; Ohipa 20:29, 30) No reira tatou e ite ai e rave rahi haapaoraa taa ê o te faahua kerisetiano nei. Nafea tatou e ite ai e o vai te mau kerisetiano mau?
3. Te tapao faahiahia roa ˈˈe o te mau kerisetiano mau, o to ratou ïa here mau i te tahi e te tahi. (Ioane 13:34, 35) Eita ratou e haapiihia ia manaˈo e mea hau aˈe ratou i te feia nunaa ê aore ra iri ê. Eita atoa ratou e haapiihia ia hiˈo ino i te feia no te mau fenua ěê. (Ohipa 10:34, 35) Eita ratou e faaô i roto i te tamaˈi. E faariro te mau kerisetiano mau i te tahi e te tahi ei mau taeae e mau tuahine.—Ioane 1, 4:20, 21.
4. Te tahi atu tapao o te haapaoraa mau, oia hoi e faatura hohonu to to ˈna mau melo i te Bibilia. Te farii nei ratou i te Bibilia mai te Parau a te Atua e te tiaturi nei ratou i ta ˈna parau. (Ioane 17:17; Timoteo 2, 3:16, 17) Te haafaufaa nei ratou i te Parau a te Atua i nia ˈˈe i te mau manaˈo aore ra te mau peu a te taata. (Mataio 15:1-3, 7-9) Te tutava nei ratou i te ora ia au i te Bibilia i roto i to ratou oraraa i te mau mahana atoa. Eita ïa ratou e poro i te hoê mea e e rave i te tahi atu mea.—Tito 1:15, 16.
5. E tia atoa i te haapaoraa mau ia faahanahana i te iˈoa o te Atua. (Mataio 6:9) Ua faaite Iesu i te iˈoa o te Atua, o Iehova, ia vetahi ê. E tia i te mau kerisetiano mau ia na reira atoa. (Ioane 17:6, 26; Roma 10:13, 14) O vai te feia ta oe e ite nei o te faaite haere ra i te iˈoa o te Atua?
6. E tia i te mau kerisetiano mau ia poro i te Basileia o te Atua. O ta Iesu ïa i rave. Aita oia i faaea i te paraparau no nia i te Basileia. (Luka 8:1) Ua faaue oia i ta ˈna mau pǐpǐ ia poro i teie atoa poroi e ati noa ˈˈe teie fenua. (Mataio 24:14; 28:19, 20) Te tiaturi nei te mau kerisetiano mau e, na te Basileia o te Atua anaˈe e hopoi mai i te hau e te ino ore mau i nia i teie fenua.—Salamo 146:3-5.
7. E ere te mau pǐpǐ a Iesu no teie nei ao. (Ioane 17:16) Eita ratou e faaô i roto i te mau ohipa politita e te mau aimârôraa totiale a teie nei ao. E ape ratou i te haerea, te mau peu, e te mau huru raveraa iino i matauhia i roto i teie nei ao. (Iakobo 1:27; 4:4) Ua ite anei oe e o vai te pǔpǔ faaroo i to oe vahi tei nia ia ratou teie mau tapao o te kerisetianoraa mau?
[Hohoˈa i te mau api 26, 27]
E here te mau kerisetiano mau i te tahi e te tahi, e faatura ratou i te Bibilia, e e poro ratou i te Basileia o te Atua