Haapiiraa 14

Te faanahoraahia te mau Ite no Iehova

Afea te mau Ite no Iehova no teie nei tau i te haamataraa mai? (1)

Mea nafea te mau putuputuraa a te mau Ite no Iehova ia faaterehia? (2)

Nafea te mau haamâuˈaraa e aufauhia ˈi? (3)

Na vai e rave i te upoo i roto i te amuiraa tataitahi? (4)

Eaha te mau tairururaa e faatupuhia nei i te mau matahiti atoa? (5)

Eaha te ohipa e ravehia ra i ta ratou pu rahi e i roto i te mau amaa? (6)

1. Ua haamata mai te mau Ite no Iehova no teie nei tau i te mau matahiti 1870 ra. I te omuaraa, ua piihia ratou te Feia Haapii Bibilia. Tera râ, i te matahiti 1931, ua rave mai ratou i te iˈoa niuhia i nia i te mau Papai ra, te mau Ite no Iehova. (Isaia 43:10) Mai te haamataraa haihai roa, ua maraa te faanahonahoraa e ua naeahia i te mau mirioni Ite, o te poro nei i roto hau atu i te 230 fenua.

2. Te putuputu nei te rahiraa o te mau amuiraa a te mau Ite no Iehova e toru taime i te hebedoma. Te titau-manihini-hia ˈtu nei oe ia haere atoa mai. (Hebera 10:24, 25) O te Bibilia te niu o te haapiiraa e horoahia. E haamatahia e e faaotihia te mau putuputuraa na roto i te pure. E himene-atoa-hia ‘te mau sire a te varua’ putapû mau i te rahiraa o te mau putuputuraa. (Ephesia 5:18, 19) Mea tamoni ore te tomoraa, e aita e ohiraa moni.—Mataio 10:8.

3. Te putuputu nei te rahiraa o te mau amuiraa i roto i te hoê Piha no te Basileia. Mea pinepine e mau fare hamaniraa ohie teie, i patuhia e te mau Ite aufau-ore-hia. Eita oe e ite i te mau idolo, te mau satauro, aore ra te mau mea mai te reira te huru, i roto i te hoê Piha no te Basileia. Te aufauhia nei te mau haamâuˈaraa na roto i te mau ô. Ia hinaaro te hoê taata e horoa i te ô, te vai ra ïa te hoê afata ô.—Korinetia 2, 9:7.

4. I roto i te amuiraa tataitahi, te vai ra te mau matahiapo, aore ra tiaau. Na ratou e rave nei i te upoo i te pae no te haapiiraa i roto i te amuiraa. (Timoteo 1, 3:1-7; 5:17) Te tauturuhia nei ratou e te mau tavini tauturu. (Timoteo 1, 3:8-10, 12, 13) Aita teie mau taata i faateiteihia i nia i te toea o te amuiraa. (Korinetia 2, 1:24) Aita ratou i mairihia i te mau tiaraa iˈoa taa ê. (Mataio 23:8-10) Aita to ratou ahu i taa ê atu i to vetahi pae. Eita ratou e aufauhia no ta ratou ohipa. Te haapao nei te mau matahiapo ma te aau tae i te mau hiaai o te amuiraa i te pae varua. Te pûpû atoa nei ratou i te tamahanahanaraa e te aratairaa i te mau tau fifi.—Iakobo 5:14-16; Petero 1, 5:2, 3.

5. Te faatupu atoa nei te mau Ite no Iehova i te mau tairururaa rarahi i te mau matahiti atoa. I taua mau taime ra, e rave rahi amuiraa te ruru mai no te hoê porotarama haapiiraa bibilia taa ê. E tuhaa matauhia te bapetizoraa o te mau pǐpǐ apî i roto i te porotarama tairururaa tataitahi.—Mataio 3:13-17; 28:19, 20.

6. Tei New York (Hau Amui no Marite) te pu rahi a te mau Ite no Iehova. Tei reira atoa te Tino Aratai, te hoê pǔpǔ e tahoê ra i te mau matahiapo aravihi no te haapao i te amuiraa na te ao atoa nei. Te vai atoa ra hau atu i te 100 amaa na te ao nei. I teie mau vahi, te tauturu nei te mau rave ohipa aufau-ore-hia i te pae no te neneiraa e te haponoraa i te mau pueraa papai bibilia. E horoa-atoa-hia te aratairaa no te faanahoraa i te ohipa pororaa. No te aha oe e ore ai e faanaho ia oe no te haere e mataitai i te amaa o to oe fenua?