E nafea ia tauturu i te feia e oto ra?

“MAI te peu e te vai ra te tahi ohipa ta ˈu e nehenehe e rave, a faaite mai.” O te mau parau teie ta te rahiraa o tatou e faahiti atu i te tahi taata no pohe noa ˈtura te hoê hoa aore ra fetii. Papu maitai, te hinaaro mau ra tatou e na reira e e rave mau â tatou i te tahi ohipa no te tauturu atu. Tera râ, e parau mai iho â anei te taata i roto i te ati: “Hinaaro vau ia rave oe i te tahi ohipa no te tauturu mai ia ˈu?” Eita roa ˈtu. E titauhia na tatou iho e feruri eaha te tauturu e te tamahanahana ˈtu i te feia e oto ra.

Teie te hoê parau paari a te Bibilia: “Mai te lemoni auro i roto i te vairaa ario ra, o te parau ïa parauhia i te taime mau ra.” (Maseli 15:23; 25:11) E titauhia te paari no te ite eaha te parau e te ore e parau, eaha te rave e te ore e rave. Teie te tahi mau manaˈo tauturu no roto mai i te mau Papai no te feia i roto i te ati.

Eaha te rave?

A faaroo: Te na ô ra te Iakobo 1:19: “Ia ineine te taata atoa i te faaroo e tia ˈi.” Te tahi tauturu faufaa roa ˈˈe no te feia e oto ra, o te faarooraa ïa ia ratou. E hinaaro paha vetahi e paraparau no nia i te fetii, no nia i te ati aore ra i te maˈi i pohe ai o ˈna, e no nia i to ratou mau manaˈo hohonu. No reira a ani atu: “E hinaaro anei oe ia paraparau tâua?” A vaiiho e na ratou e faaoti. Ma te haamanaˈo i te poheraa o to ˈna metua tane, teie ta te hoê taata i parau: “Ua riro mau â ei tauturu no ˈu i te aniraahia mai eaha te ohipa i tupu e to ratou faaroo-maite-raa ia ˈu.” A faaroo maitai atu ïa ma te faaoromai e te hamani maitai. Eiaha e manaˈo e e tia ia horoa ˈtu i te mau pahonoraa aore ra ravea. A vaiiho ia ratou ia haamahora i to ratou aau.

A tamahanahana: A faahiti i te hoê manaˈo papu e te maitai. Peneiaˈe ma te haapapu atu ua rave ratou i ta ratou i nehenehe. A faaite e tupu mai iho â te oto, te riri, te manaˈo faahapa, e te tahi atu manaˈo horuhoru. A faahiti i te tahi mau taata o tei faaoromai noa ˈtu ua pohe tei herehia. Te faataa râ te Maseli 14:24, “e ora hoi to te ivi” i “te parau maitai.”—Tesalonia 1, 5:11, 14.

A faaherehere i te taime no ratou: Ia vata oe i te mau mahana matamua, i te mau avaˈe atoa râ i muri aˈe ia hoˈi te rahiraa i ta ratou mau ohipa o te mau mahana atoa. Ma te na reira, e riro oe ei hoa mau, te taata o te tia atu i te tau “e ati ai ra.” (Maseli 17:17) Te parau ra o Teresea, ua pohe ta ˈna tamarii i roto i te hoê ati purumu: “Mea rahi ta to mâua mau hoa i faanaho ia ore mâua e faaea rahi roa i te fare mâua anaˈe. Ua tauturu mai te reira eiaha ia moˈemoˈe faahou.” I te mau matahiti i muri aˈe, e nehenehe te mau taio mahana mai te mahana faaipoiporaa e poheraa, e riro ei taime hepohepo no te feia e toe mai. No te aha e ore ai e tapao i te reira i nia i te tarena, e ia fatata mai taua mau mahana ra, ia vata oe no te turu atu ma te hamani maitai?

Na outou iho e feruri eaha te rave: Te vai ra anei te tahi mau mea te tia ia hoo mai? E hinaarohia anei te hoê taata no te haapao i te tamarii? E hinaaro anei te hoa e te fetii i te vahi nohoraa? No te rohirohi, e pinepine te feia e oto ra i te ore e taa faahou eaha ta ratou e ta vetahi ê e nehenehe e rave. No reira, ia ite oe e te hinaaro-mau-hia ra te tauturu, eiaha e tiai ia anihia mai, a haa. (Korinetia 1, 10:24; a hiˈo atoa i te Ioane 1, 3:17, 18.) Te haamanaˈo ra te hoê vahine ua pohe ta ˈna tane: “E rave rahi tei parau mai, ‘Mai te peu e ohipa ta oe e hinaaro ia rave au, a faaite mai.’ Te vai ra râ te tahi hoa o tei ore i na reira. Ua haere noa mai o ˈna i roto i te piha taotoraa, ua tataratara i te mau tapoˈi roˈi e ua puˈa i te mau ahu repo o ta ˈu tane. Area te tahi atu hoa, ua rave ïa i te hoê patete, ua faaî i te pape e ua tamâ haere i te tauihaa e te tahua tei viivii i te pihaˈe o ta ˈu tane. Tau hebedoma i muri aˈe, ua haere mai hoê o te mau matahiapo o te amuiraa e to ˈna ahu ohipa e ta ˈna mau tauihaa e ua parau mai ra, ‘Ua ite au te vai ra te tahi mea te tia ia tataîhia.’ Auê au i te mauruuru ia ˈna i te haereraa mai e tataî i te farero o te opani e te mori!”—A hiˈo atoa i te Iakobo 1:27.

A farii maitai: Te haamanaˈo mai ra te Bibilia: “Eiaha e haamoˈe i te farii maitai.” (Hebera 13:2) E tia iho â râ ia na reira no te feia e oto ra. Eiaha e parau noa, “A haere noa mai i te taime ta oe e hinaaro!” A horoa ˈtu râ i te mahana e te hora. Ia ore ratou e farii, eiaha e taora oioi i te tauera. E titauhia paha te tahi atu mau faaitoitoraa î i te here. Peneiaˈe, aita ratou i farii i te titau-manihini-raa no te mea eita ratou e hinaaro e taˈi i mua i te taata. Aore ra, te manaˈo ra e ere tera te taime tano no te tamaa e te hoa. A haamanaˈo na i te farii maitai o Ludia i faahitihia i roto i te Bibilia. Teie ta Luka i parau i te huru titau-manihini-raa a Ludia: “Onoono maira o ˈna ia matou.”—Ohipa 16:15.

A faaite i te faaoromai: Eiaha e huru ê i te mau parau a te feia e oto ra. Peneiaˈe, te vai ra te riri e te manaˈo faahapa i roto ia ratou. Mai te peu e te faahoˈi ra ratou i to ratou riri i nia ia oe, a faaite i te paari e te faaoromai ma te ore e riri atoa ˈtu. Te na ô ra hoi te Bibilia: “Ia ahu mai outou i te here rahi, te aumihi, te hamani maitai, te haehaa, te mǎrû e te faaoromai.”—Kolosa 3:12, 13.

A papai i te hoê rata: E pinepine te taata i te haafaufaa ore i te puai o te rata papaihia i muri aˈe i te poheraa o te tahi. Ua faufaa-mau-hia Cindy i te reira a pohe ai to ˈna metua vahine i te mariri ai taata. Te na ô ra oia: “E rata maitai mau ta te tahi hoa i papai mai. Te vahi maitai, e nehenehe au e taio faahou i te reira i muri aˈe.” E nehenehe e faaitoito na roto i “te hoê rata poto” noa, no roto roa mai râ te reira i te aau. (Hebera 13:22) E nehenehe e faatia i te tahi tupuraa oaoa ta oe i fanaˈo na e te fetii i pohe e mea nafea oia i te riroraa ei hoa here no oe.

A pure e o ratou: Mea faufaa roa ia pure e te feia e oto ra. Te na ô ra te Bibilia: “Te pure taparuparuraa a te hoê taata parau-tia, mea puai mau â.” (Iakobo 5:16) Ma te faaroo ia oe ia pure no ratou, e tamǎrû paha te reira i to ratou aau faahapa.—A hiˈo atoa i te Iakobo 5:13-15.

Eaha te ore e rave?

Eiaha e ape ia ratou noa ˈtu aita oe i ite eaha te parau atu: E na ô paha tatou i te manaˈo, ‘Te hinaaro ra ratou e faaea o ratou anaˈe.’ E na reira paha tatou no te ore e parau e e rave i te hoê ohipa tano ore. Tera râ, e moˈemoˈe e e oto atu â te feia i roto i te ati ia ape atu te mau hoa, fetii e hoa faaroo. A haamanaˈo e te mea faufaa aˈe i tera taime, o te mau parau e te mau ohipa î i te hamani maitai ïa. (Ephesia 4:32) Ei pihai iho oe ia ratou no te faaitoito atu. (A hiˈo atoa i te Ohipa 28:15.) Ma te haamanaˈo i te mahana i pohe ai ta ˈna tamahine, te na ô ra Teresea: “I roto noa hoê hora, ua î roa te vahi fariiraa taata o te fare maˈi i to mâua mau hoa e ua tae pauroa mai te mau matahiapo e ta ratou vahine. Area te tahi atu mau vahine o tei haere mai, te vai noa ra â te mau faaofirifiri rouru i nia i to ratou upoo e vetahi tei roto noa ra ïa i to ratou ahu ohipa. Ua faarue ratou i te ohipa no te haere mai. Mea rahi tei faaite aita ratou i ite eaha te parau, e ere râ tera te mea faufaa, ua tae roa mai hoi ratou.”

Eiaha e parau atu ia faaea i te oto: E hinaaro paha tatou e parau atu, “Oti râ, eiaha e taˈi faahou.” Mea maitai aˈe râ ia vaiiho ia ratou ia taˈi. Ma te haamanaˈo i te poheraa o ta ˈna tane, te na ô ra Katherine: “I to ˈu manaˈo, mea faufaa roa ia vaiiho i te feia e oto ra ia taˈi.” Eiaha e parau atu i te huru e tia ia ratou ia faaite. Eiaha atoa e tapea ia oe i te taˈi i mua ia ratou. Te faaitoito mai ra hoi te Bibilia: “A taˈi e te feia e taˈi ra.”—Roma 12:15.

Eiaha e faaoti no ratou i teihea taime e faarue ai i te ahu e te tauihaa a tei pohe: E manaˈo paha tatou mea maitai aˈe ia faarue oioi i te mau tauihaa ia faaea ratou i te oto. E titauhia râ paha te taime ia faaea te feia e oto ra i te manaˈonaˈo i tei pohe. A haamanaˈo na ia Iakoba o tei tiaturi ua pohe ta ˈna tamaiti ra o Iosepha i te hoê animara taehae. I te faaiteraahia ˈtu te ahu o Iosepha o tei î i te toto, teie te huru o Iakoba: “Oto ihora i ta ˈna tamaiti e rave rahi te mahana. Ua tamata ihora ta ˈna mau tamarii tamaroa, e te mau tamahine, i te haamahanahana ia ˈna; aita aˈera râ i tia ia ˈna ia haamahanahanahia.”—Genese 37:31-35.

Eiaha e parau atu, ‘E noaa â ta oe tamarii’: Te faaite ra te tahi metua vahine i to ˈna huru i te poheraa ta ˈna aiû: “Ua inoino roa vau i te mau taata o tei parau mai, ‘E noaa â ta oe tamarii.’” E manaˈo maitai paha to ratou, e riro râ tera mau parau mai “te ˈoˈe patiatia” no te metua. (Maseli 12:18) Mea taa ê te mau tamarii atoa, eita roa ïa te hoê e nehenehe e monohia.

Eiaha e taiâ i te faahiti i te parau no nia i tei pohe: Te haamanaˈo ra te tahi metua vahine: “Mea rahi o tei faaea i te faahiti i ta ˈu tamaiti o Jimmy e i to ˈna iˈoa. Ua mauiui roa vau i te na reiraraa ratou.” Eiaha ïa e taui taue i te parau ia faahitihia te iˈoa o tei pohe. A ani i te feia e oto ra e hinaaro anei ratou e paraparau no nia i te taata herehia o tei pohe. (A hiˈo atoa i te Ioba 1:18, 19 e te 10:1.) Mea au roa na vetahi ia faahiti te mau hoa i te mau huru maitatai o te feia i pohe.—A hiˈo atoa i te Ohipa 9:36-39.

Eiaha e ru noa i te parau, ‘Mea maitai aˈe no ˈna ia pohe’: Te na ô ra te Bibilia: “Ei parau mahanahana ta outou i te feia e hepohepo ra.” (Tesalonia 1, 5:14) E ere râ te mau parau maitai atoa no nia i tei pohe i te parau tamahanahana. Teie ta te tahi vahine apî e haamanaˈo ra i te poheraa to ˈna metua vahine: “Ua parau mai vetahi, ‘Aita o ˈna e mauiui faahou ra!’ aore ra, ‘Ua mâha to ˈna rohirohi i teie nei!’ E ere râ tera ta ˈu i hinaaro e faaroo.” Ia na reira tatou i te parau, e manaˈo te feia i roto i te ati eita e tia ia ratou ia oto aore ra e ere tei pohe i te mea faufaa roa. E moˈemoˈe roa râ ratou, ua faarue mai hoi tei herehia e ratou.

Eiaha e parau atu, ‘Te taa ra ia ˈu i to oe mauiui’: Tera iho â anei? Ua faaruru aˈenei oe i te hoê â tupuraa? E ia pahono noa ˈtu oe e, ia taa ia oe mea taa ê te huru o te tahi e te tahi i mua i te pohe o tei herehia. (A hiˈo atoa i te Oto o Ieremia 1:12.) Ia au i te tupuraa, mea maitai aˈe paha ia faatia eaha tei tauturu ia oe. Ua tamǎrûhia te hoê metua vahine ua haapohehia ta ˈna tamahine i te faatiaraa a te tahi atu mama ua pohe atoa ta ˈna tamahine. Teie ta tera metua vahine i parau: “Aita tera mama i haamata ma te parau, ‘Te taa ra ia ˈu i to oe mauiui.’ Ua faaite noa mai râ mai te aha to ˈna huru i muri aˈe e ua ani mai ia na reira atoa vau.”

E titauhia te aumihi, te ite e te here ia hinaaro oe e tauturu i te feia e oto ra. Eiaha e tiai na ratou e haere mai ia oe. Eiaha atoa e parau noa ˈtu, “Mai te peu e ohipa ta ˈu e nehenehe e rave, a faaite mai.” Na oe iho râ e hiˈo e e ite eaha te rave, i muri iho, a haa.

E titauhia ia pahono i te mau uiraa mai teie: Eaha ta te Bibilia e parau ra no nia i te tia-faahou-raa? Eaha te auraa no oe e no tei herehia e oe? Eaha te faaite ra e tiaturiraa papu te tia-faahou-raa?