Tuhaa 11
Te faaineinehia ra te niu o te ao apî i teie nei iho â
1, 2. Ia au i te parau tohu bibilia, eaha te ohipa e tupu ra i mua i to tatou nei mata?
TE MEA faahiahia atoa oia hoi te faaineinehia ra te niu o te ao apî i teie nei iho â, a haere noa ˈi te ao tahito a Satani i te inoraa. I mua i to tatou nei mata, te haaputuputu ra te Atua i te mau taata no te mau nunaa atoa e te faanaho ra oia ia ratou i roto i te niu o te hoê totaiete taata apî i nia i te fenua o te fatata roa i te mono mai i te ao amahamaha o teie nei tau. I roto i te Bibilia, i roto i te Petero 2, 3:13, te piihia ra teie totaiete apî “te fenua apî.”
2 Te faaite atoa ra te parau tohu a te Bibilia e: “E riro ia tae i te mau mahana hopea ra [te tau o ta tatou e ora nei] . . . , [e] rave rahi te taata e haere ma te parau e, E haere mai, e haere tatou i nia i te mouˈa o Iehova [ta ˈna haamoriraa mau], . . . e na ˈna e haapii mai i ta ˈna haapaoraa, e haere tatou na te eˈa ta ˈna e faaite maira.”—Isaia 2:2-3.
3. (a) Te tupu nei te parau tohu a Isaia i rotopu i teihea mau taata? (b) Mea nafea te buka hopea o te Bibilia ia faataa i te reira?
3 Te tupu ra teie parau tohu i teie nei i rotopu i te feia o te auraro nei i ‘te mau haerea a te Atua e o te haere nei na nia i to ˈna mau eˈa.’ Te faahiti ra te buka hopea o te Bibilia i teie totaiete taata e here ra i te hau na te ao atoa nei mai te “feia rahi roa . . . no te mau fenua atoa, e te mau opu atoa, e te mau nunaa atoa, e te mau reo atoa,” te hoê autaeaeraa mau na te ao nei o te tavini ra i te Atua ma te autahoê. Te na ô atoa ra te Bibilia e: “O te feia i haere mai mai roto mai i te ati rahi ra.” Oia hoi, e ora ˈtu ratou i te hopea o teie nei faanahoraa o te mau mea ino.—Apokalupo 7:9, 14; Mataio 24:3.
Te hoê autaeaeraa mau na te ao nei
4, 5. No te aha te autaeaeraa a te mau Ite no Iehova na te ao nei e nehenehe ai e tupu?
4 E mau mirioni Ite no Iehova o te tamata nei ma te aau rotahi i te ora ma te pee i te mau faaueraa a te Atua e ta ˈna ra mau eˈa. Ua mau papu to ratou tiaturiraa e ora e a muri noa ˈtu i roto i te ao apî a te Atua. Na roto i te aratairaa i to ratou oraraa i te mau mahana atoa ia au i te mau ture a te Atua, te faaite nei ratou ia ˈna i to ratou hinaaro e auraro i ta ˈna huru faatereraa i teie nei iho e i roto i te ao apî. I te mau vahi atoa, noa ˈtu eaha to ratou fenua aore ra to ratou nunaa, te auraro nei ratou i te hoê â mau ture—o tei faataahia e te Atua i roto i ta ˈna Parau. No reira ratou e riro ai ei autaeaeraa mau na te ao nei, te hoê totaiete o te ao apî a te Atua.—Isaia 54:13; Mataio 22:37, 38; Ioane 15:9, 14.
5 Aita te mau Ite no Iehova e manaˈo ra e mea na roto i to ratou iho puai to ratou riroraa mai ei autaeaeraa otahi roa na te ao nei. Ua ite ratou e ua noaa mai te reira na roto i te ohipa a te varua puai o te Atua i nia i te feia e auraro ra i ta ˈna mau ture. (Ohipa 5:29, 32; Galatia 5:22, 23) E ohipa teie na te Atua. Mai ta Iesu i parau, “o te mau mea e ore e tia i te taata nei, e tia i te Atua.” (Luka 18:27) Inaha, mai te peu e ua nehenehe te Atua e rave e ia vai tamau noa te ao taatoa nei, e nehenehe atoa ïa o ˈna e rave e ia vai tamau noa te totaiete o te ao apî.
6. No te aha te autaeaeraa a te mau Ite no Iehova e faaauhia ˈi i te hoê semeio no teie nei tau?
6 Te ite-ê-na-hia ra te huru faatereraa a te Atua i roto i te ao apî na roto i ta ˈna ohipa no te haamauraa i te niu o te ao apî i teie nei. Ua riro atoa te mea o ta ˈna i rave e ta ˈna mau Ite, i roto i te hoê auraa parau, ei semeio no teie nei tau. Eaha te tumu? No te mea ua tahoê oia i te mau Ite no Iehova i roto i te hoê autaeaeraa mau na te ao nei, o te ore roa e arepurepu na roto i te mau tataˈuraa o te faaamahamaha i te pae o te fenua, te nunaa, aore ra i te pae faaroo. Noa ˈtu e te vai ra te mau mirioni Ite e te ora nei ratou i roto hau atu i te 200 fenua, ua tahoêhia ratou paatoa na roto i te hoê taairaa o te ore roa ˈtu e motu. Ua riro mau â teie autaeaeraa na te ao nei, otahi roa i roto i te aamu taatoa, ei semeio no teie nei tau—ei ohipa na te Atua.—Isaia 43:10, 11, 21; Ohipa 10:34, 35; Galatia 3:28.
Te haapapuraa e o vai te nunaa o te Atua
7. Ua faaite Iesu e e itehia ta ˈna mau pǐpǐ mau na roto i teihea ravea?
7 Nafea ia haapapu roa ˈtu â e o vai te nunaa ta te Atua e faaohipa ra ei niu no ta ˈna ao apî? Navai hoi e faatupu ra i te mau parau a Iesu i roto i te Ioane 13:34, 35? Ua parau oia e: “E tuu atu vau i te parau apî na outou, E [here] outou ia outou iho, mai ia ˈu e [here atu] ia outou na, e [here] atoa hoi outou ia outou iho. O te mea teie e ite ai te taata atoa e, e pǐpǐ outou na ˈu, ia [here] outou ia outou iho.” Te tiaturi nei te mau Ite no Iehova i te mau parau a Iesu e te faaohipa atoa nei ratou i te reira. Mai ta te Atua e faaue maira, ‘te uˈana maite nei te here ia ratou ratou iho.’ (Petero 1, 4:8) ‘Te ahu nei ratou ia ratou iho i te here, no te mea e taai taahoêraa tia roa teie.’ (Kolosa 3:14) No reira, ua riro te here autaeae ei “tapiri” o te taati maite ra ia ratou na te ao atoa nei.
8. Mea nafea te Ioane 1, 3:10-12 e haapapu râ e o vai te nunaa o te Atua?
8 Te na ô atoa ra te Ioane 1, 3:10-12 e: “O te mea teie e itea ˈi te tamarii a te Atua, e te tamarii a te diabolo: o tei ore i rave i te parau-tia ra, e ere ïa i to te Atua; e ere atoa tei ore i aroha i tana taeae. Teie hoi te parau ta outou i faaroo, mai te matamua mai, ia [here] tatou ia tatou iho. Eiaha mai ia Kaina ra, no taua varua ino ra oia, e taparahi pohe roa ˈtura i to ˈna teina.” Ua riro ïa te nunaa o te Atua ei autaeaeraa na te ao atoa nei o te ore e faaohipa i te haavîraa puai.
Te tahi atu tapao haapapuraa
9, 10. (a) Na roto i teihea ohipa e itehia ˈi te mau tavini a te Atua i te mau mahana hopea? (b) Nafea te mau Ite no Iehova i te faatupuraa i te Mataio 24:14?
9 Te vai ra te tahi atu ravea no te faataa e o vai râ te mau tavini a te Atua. I roto i ta ˈna parau tohu no nia i te hopea o teie nei ao, ua faaite o Iesu e rave rahi mau tuhaa o te tapao i taua anotau ra ei mau mahana hopea. (A hiˈo i te Tuhaa 9.) Te faahitihia ra te hoê tapao faufaa o teie parau tohu i roto i ta ˈna mau parau ia au i te Mataio 24:14: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.”
10 Ua ite anei tatou i te tupuraa o teie parau tohu? E. Mai te haamataraa mai â o te mau mahana hopea i te matahiti 1914 ra, ua poro te mau Ite no Iehova i te parau apî maitai o te Basileia o te Atua na roto i te ao nei ia au i ta Iesu i faaue mai, oia hoi, ma te haere na te mau fare o te taata. (Mataio 10:7, 12; Ohipa 20:20) E mau mirioni Ite o te haere nei e farerei i te taata no te mau nunaa atoa no te paraparau ia ratou no nia i te ao apî. Mea na reira hoi te noaaraa mai ia outou i teie nei vea, no te mea i roto i te ohipa a te mau Ite no Iehova, te vai atoa ra te tuhaa no te neneiraa e te opereraa i te mau miria papai no nia i te Basileia o te Atua. Ua ite anei outou i te tahi atu mau taata o te poro ra i te Basileia o te Atua i tera fare e tera fare na te ao atoa nei? E te faaite ra hoi te Mareko 13:10 e e tia ia ravehia ‘na mua’ teie ohipa pororaa e te haapiiraa, hou te hopea e tae mai ai.
Te pahonoraa i te piti o te uiraa rahi
11. Eaha ˈtu â ta te mau Ite no Iehova e faatupu ra na roto i te auraroraa ˈtu i te faatereraa a te Atua?
11 Na roto i te auraroraa i te mau ture e te mau faaueraa tumu a te Atua, te faatupu nei te mau Ite no Iehova i te tahi atu ohipa. Te faaite nei ratou e ua haavare o Satani i to ˈna parauraa e eita te mau taata e nehenehe e tapea i to ratou taiva ore i te Atua i roto i te tamataraa, e te pahono nei ïa ratou i te piti o te uiraa rahi, e faahiti ra i te taiva ore o te taata. (Ioba 2:1-5) Na roto i te riroraa ei totaiete e mau mirioni taata no te mau nunaa atoa, te haapapu ra te mau Ite, ei pǔpǔ hoê, i to ratou taiva ore i te faatereraa a te Atua. Noa ˈtu to ratou tiaraa taata tia ore, te turu nei ratou i te pae o te Atua i roto i te uiraa no nia i te faatereraa arii na te ao nei, noa ˈtu te haafifiraa a Satani.
12. Na roto i to ratou faaroo, te pee ra te mau Ite ia vai?
12 I teie mahana, te amui atu nei teie mau mirioni Ite no Iehova i ta ratou parau haapapuraa i ta te pǔpǔ rahi o te tahi atu mau ite no te tau tahito o tei faaite i to ratou taiva ore i te Atua. Teie vetahi, o Abela, Noa, Ioba, Aberahama, Sara, Isaaka, Iakoba, Debora, Ruta, Davida, e o Daniela, e e rave rahi atu â. (Hebera, pene 11) Ua riro ratou, mai ta te Bibilia e parau ra, ei ‘nahoa rahi ite haapao maitai.’ (Hebera 12:1) Ua tapea teie mau ite, e vetahi atu â e tae noa ˈtu te mau pǐpǐ a Iesu, i to ratou taiva ore i te Atua. E ua horoa atoa mai o Iesu iho i te hiˈoraa hau roa ˈˈe i te maitai na roto i te tapearaa i to ˈna taiva ore ma te tia roa.
13. Eaha te mau parau a Iesu no nia ia Satani o tei riro ei parau mau?
13 Te faaite maira te reira e e parau mau ta Iesu i faaite no nia ia Satani i te mau raatira faaroo: “I tena na râ, te titau mai nei outou ia ˈu e taparahi, te taata i faaite atu ia outou i te parau mau i ta ˈu i ite i te Atua ra. . . . O te diabolo to outou na metua, i faatia ˈi â outou i te hinaaro o to outou metua ra: e taparahi taata oia mai te matamua mai â: aore oia i haapao i te parau mau, no te mea aore e parau mau i roto ia ˈna. Ia parau oia i te parau haavare ra, ua parau ïa i te parau au ia ˈna ihora, e haavare oia, e e metua hoi no te haavare.”—Ioane 8:40, 44.
Eaha ta outou e maiti?
14. Eaha te ohipa e tupu ra no te niu o te ao apî i teie nei?
14 Te haere noa ˈtura te niu o te ao apî e faaineinehia ra e te Atua i teie nei i roto i te totaiete a te mau Ite no Iehova na te ao nei, i te puairaa. I te mau matahiti atoa, e mau hanere tausani taata o te faaohipa nei i to ratou tiamâraa ia maiti, niuhia i nia i te ite papu, no te farii i te faatereraa a te Atua. Te riro nei ratou ei melo no te totaiete o te ao apî, te turu nei i te pae o te Atua i roto i te uiraa no te faatereraa arii na te ao nei, e te haapapu nei ratou e e haavare o Satani.
15. Eaha te ohipa faataa-ê-raa ta Iesu e rave ra i to tatou nei tau?
15 Na roto i te maitiraa i te faatereraa a te Atua, te fariihia nei ratou i te “rima atau” o te Mesia ia faataa ê oia i “te mamoe” e “te puaaniho.” I roto i teie parau tohu no nia i te mau mahana hopea, ua tohu o Iesu e: “E e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.” Te mau mamoe, o te feia haehaa ïa o te apiti atu e o te turu atu i te mau taeae o te Mesia, ma te auraroraa i te faatereraa a te Atua. Te mau puaaniho, o te mau taata feruriraa etaeta ïa o te patoi i te mau taeae o te Mesia e o te ore roa ˈtu e turu i te faatereraa a te Atua. Eaha ïa te tupu i te pae hopea? Ua parau o Iesu e: “O te haere ê ïa [oia hoi te mau puaaniho] e rave i te pohe mure ore, area te feia parau-tia ra [te mau mamoe], o te rave ïa i te ora mure ore.”—Mataio 25:31-46.
16. Eaha te tia ia outou ia rave mai te peu e te hinaaro ra outou e ora i roto i te Paradaiso i mua nei?
16 Oia mau, te haapao maira te Atua ia tatou! Fatata roa oia i te hohora mai i te hoê fenua oaoa tei riro ei paradaiso. Te hinaaro ra anei outou e ora i roto i taua Paradaiso ra? Mai te peu e e, a faaite ïa i to outou mauruuru no te mau faanahoraa a Iehova na roto i te haapiiraa e o vai ra o ˈna e te faaohiparaa i te mea o ta outou e haapii ra. “E imi outou ia Iehova, oi itea ˈˈe oia, e tiaoro outou ia ˈna, oi fatata mai oia: e faarue te paieti ore i to ˈna haerea, e te taata parau-tia ore i to ˈna manaˈo: a hoˈi ai oia ia Iehova, e na ˈna oia e aroha mai.”—Isaia 55:6, 7.
17. No te aha eita e tia ia faataere no te maiti e o vai ta tatou e tavini?
17 Eiaha e faataere. Ua fatata roa mai te hopea o teie nei faanahoraa tahito. Te aˈo maira te Parau a te Atua e: “Eiaha e [here] i teie nei ao, e te mau mea atoa o teie nei ao. O te taata i [here] i teie nei ao ra, aore te [here] i te Metua ra i roto ia ˈna. . . . E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:15-17.
18. Maoti teihea haerea e nehenehe ai outou e tiaturi papu e ora i roto i te ao apî faahiahia a te Atua?
18 Te faaineinehia ra te nunaa o te Atua i teie nei no te ora e a muri noa ˈtu i roto i te ao apî. Te haapii nei ratou i te mau huru aravihi i te pae varua e vetahi atu â te tia ia faatupu i roto i te paradaiso. Te faaitoito ru atu nei matou ia outou ia maiti i te Atua ei Arii no outou e ia apiti atu i roto i te ohipa faaoraraa o ta ˈna e rave nei na te fenua atoa nei i teie mahana. A haapii i te Bibilia na muri i te mau Ite no Iehova, e a ite i te huru o te Atua o te tapitapi mau ra no outou e o te faaore roa i te mauiui. Ia na reira outou, e ô atoa ˈtu ïa outou i roto i te niu o te ao apî. E nehenehe ïa outou e tiaturi papu e fanaˈo i te farii maitai o te Atua e e ora e a muri noa ˈtu i roto i taua ao apî faahiahia ra.
[Hohoˈa i te api 31]
Te fanaˈo nei te mau Ite no Iehova i te autaeaeraa mau na te ao atoa nei
[Hohoˈa i te api 32]
Te faaineinehia ra te niu o te ao apî a te Atua i teie nei