Basileia

Auraa: Te Basileia o te Atua, o te faaiteraa ïa i te mana arii o Iehova na te ao taatoa nei i nia i ta ˈna mau mea ora i poiete, aore ra te ravea ta ˈna e faaohipa no te faaite i taua mana arii ra. Te faataa nei iho â râ teie parau i te faatereraa mea na reira teie mana arii e itehia ˈi, faatereraa o te arataihia e te Tamaiti a te Atua, te Arii ra o Iesu Mesia. E tano atoa te parau “Basileia” i te mana o teie Arii faatavaihia aore ra i te tuhaa fenua e raatirahia ra e ta ˈna faatereraa no te raˈi mai.

E faatereraa mau anei te Basileia o te Atua?

E ere anei râ i te hoê huru o te mafatu?

Luka 17:21: “E ore hoi te taata e parau e, Teie inaha! e Tera inaha! inaha hoi te basileia o te Atua tei roto ïa ia outou nei [“tei roto ia outou,” De, Ce; area “tei rotopu ia outou,” CT, Li, TOB; “tei ropu ia outou,” Jé, MN].” (A tapao na e ia au i te irava 20, te paraparau ra o Iesu i te mau Pharisea, ta ˈna i faahapa no to ratou haavare. Eita hoi oia e nehenehe e parau e tei roto te Basileia i to ratou mafatu. Area râ, tei rotopu te Mesia, tei riro ei tia no te Basileia, ia ratou. No reira te taiohia ra i roto i The Emphatic Diaglott e: “Tei rotopu te hanahana arii o te Atua ia outou.”)

Te faahiti mau ra anei te Bibilia i te Basileia o te Atua mai te hoê faatereraa?

Isa. 9:6, 7: “Ua fanau mai hoi te hoê tǎmǎ na tatou, ua horoahia mai te hoê tamaiti na tatou; ei nia i to ˈna ra tapono te hau [“hau emepera,” Ma, Os, VB; “mana faatere,” SO; “mana,” Jé; “mana hui arii,” MN] vai ai: e mairihia to ˈna iˈoa, ia Hau ê, e Aˈo, te Atua puai, te Metua no te ui a muri atu, te Arii no te hau. E te tupuraa o to ˈna mana i te rahi e to ˈna hau, aore ïa e hopea.”

O vai te mau arii o teie Basileia?

Apo. 15:3; MN: “E ohipa rahi e te faahiahia ta oe, e [Iehova] ra, e te Atua Mana hope ra e; e haerea tia e te parau mau ta oe, e te Arii [mure ore].”

Dan. 7:13, 14: “Te hoê mai te Tamaiti a te taata ra [Iesu Mesia; hiˈo Mareko 14:61, 62] i te haerea mai na roto i te mau ata o te raˈi ra; e ua haafatata ˈtura oia i To te mau mahana tahito ra [te Atua ra o Iehova], e tuuhia ihora i pihai iho ia ˈna. E ua horoahia maira te mana, e te hinuhinu, e te basileia no ˈna [Iesu Mesia], ia auraro mai te taata atoa, e te mau fenua atoa, e te reo atoa ia ˈna.”

Apo. 5:9, 10: “I taparahihia hoi oe [Iesu Mesia], e ua hoo oe ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa; e ua faariro oe ia matou ei hui arii, e ei tahuˈa na to matou Atua, e e riro ia matou te hau i teie nei ao.” (Ia au i te Apokalupo 14:1-3, teie mau taata tei ‘hoohia mai i nia i te fenua’ no te faatere e te Arenio i nia i te mouˈa Ziona no te raˈi, 144 000 ïa ratou.)

Eaha te ohipa ta teie Basileia e rave i nia i te mau faatereraa taata nei?

Dan. 2:44: “Ia tae i te anotau o taua mau arii ra, e faatupu ai te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.”

Sal. 2:8, 9; MN: “A ani mai ia ˈu, e na ˈu e horoa ˈtu ia oe i te mau [nunaa] ei tufaa na oe, e te mau fenua hopea atoa ei taoˈa na oe. E parari ratou ia oe i te papai auri, e huˈahuˈa roa ia oe mai te auˈa a te potera ra.”

Eaha ta te Basileia o te Atua e rave?

E faaraa oia i te iˈoa o Iehova e e turu oia i to ˈna mana arii

Mat. 6:9, 10; MN: “E na ô outou ia pure: E to matou Metua i te ao ra, ia raa to oe iˈoa. Ia tae to oe ra [basileia].” (I roto i teie irava, ua taai-piri-hia te faaraaraa i te iˈoa o te Atua e te haerea mai o to ˈna Basileia.)

Ezek. 38:23: “E na reira vau i te faarahi ia ˈu iho, e te haamaitai ia ˈu iho; e itehia hoi au e te mau fenua atoa e rave rahi; e ite hoi ratou e, o vau o Iehova.” (E horoihia te iˈoa o te Atua i te mau faahaparaa atoa; e faarirohia oia ei iˈoa moˈa e te tia ia faaturahia. E turu pauroa te mau taata ora i te mana arii o Iehova ma te aau tae e e oaoa ratou i te rave i to ˈna hinaaro. Ua taaihia te hau e te maitairaa o te ao taatoa nei i te faaraaraa i te iˈoa o Iehova.)

E faaore oia i te faatereraa a Satani i vaiiho-noa-hia i nia i te ao nei

Apo. 20:2, 3: “Ua haru ihora oia [Iesu Mesia, te Arii no te raˈi] i te teni ra, i taua ophi tahito ra, oia hoi te Diabolo ra, o Satani, ua ruuruu ihora ia ˈna e ia hoê tausani i te matahiti. Ua huri atura ia ˈna i raro i te abuso ra, ua opani atura i te opani ia ˈna, tuu ihora oia i te tapao i nia ihora, ia ore oia ia haavare faahou i te mau fenua, e ia hope roa taua na matahiti hoê tausani ra: e i muri aˈe i te reira; ia tuu-iti-noa-hia ˈˈe oia e tia ˈi.” (E faatiamâhia ïa te huitaata i te mana o Satani o tei haafifi rahi i te oraraa o te mau taata tia. Ua hope ïa te mana o te Diabolo, o ˈna hoi te tumu o te mau ohipa hairiiri roa ˈˈe, e te mana o te mau demoni o tei faariaria i te taata e rave rahi.)

E tahoê oia i te poieteraa taatoa i roto i te haamoriraa i te Atua mau hoê ra

Apo. 5:13; 15:3, 4: “E faaroo atura vau i to nia atoa i te raˈi ra, e to te fenua nei, e to raro i te repo, e to te moana, e to roto ia ratou atoa ra, i te na ôraa e, O te haamaitai, e te tura, e te hanahana, e te mana, ei ia ˈna ïa ei tei parahi i nia iho i te terono ra [te Atua ra o Iehova], e ei te Arenio [Iesu Mesia], e a muri noa ˈtu.” “E ohipa rahi e te faahiahia ta oe, e te Fatu ra [Iehova], e te Atua Mana hope ra e; e haerea tia e te parau mau ta oe, e te Arii [“mure ore,” MN]. O vai hoi te ore e mǎtaˈu ia oe, e te Fatu [Iehova] e, e te faahanahana i to oe iˈoa? o oe anaˈe hoi tei maitai roa: e hope atoa te mau fenua i te tae mai i mua i to aro ra a haamori ai: ua faaitehia ta oe ra mau utua tia.”

E faatia oia i te huitaata ia faatupu faahou i te mau taairaa maitatai e te Atua

Roma 8:19-21: “Te hinaaro rahi o te mau mea hamanihia nei [te huitaata] ma te faaoao, te tiai nei ïa i te faaiteraahia mai o te tamarii a te Atua [te taime i reira te mau Kerisetiano i faatiahia no te ora i nia i te raˈi e o Iesu Mesia e haamata ˈi i te ohipa ei mau arii]. (Ua faarirohia hoi te mau mea hamanihia nei ei mea faufaa ore noa, e ere ra i te mea hinaaro, na ˈna râ na tei faariro ei mea faufaa ore noa ma te tiai,) e faaorahia hoi te mau mea hamanihia nei [te huitaata nei] i te tapea ra o te pohe, ia noaa te tiamâ maitai o te tamarii a te Atua ra.”

E faatiamâ oia i te huitaata i te mau haamǎtaˈuraa atoa a te tamaˈi

Sal. 46:8, 9: “A haere mai na, a hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua.”

Isa. 2:4: “E tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.”

E faaore oia i te feia faatere tia ore e te feia haavî i nia i te fenua

Sal. 110:5: “Na te Fatu [Iehova] i to rima atau ra, e tairi i te hui arii ia tae i te mahana e riri ai oia ra.”

Sal. 72:12-14: “O tei veve ra e ua tiaoro maira, na ˈna [te Arii Mesia a Iehova] ïa e faaora; e tei ati ra e aita o ˈna e tauturu. E faaherehere oia i tei paruparu ra e tei veve, e faaora hoi oia i te feia taoˈa ore ra. E faaora oia ia ratou i te haavare e te rave ino ra, e to ratou toto e riro ei mea taoˈa na ˈna.”

E horoa mai oia i te maa pue noa na te mau taata atoa

Sal. 72:16; MN: “E riro hoi e maa sitona [e rave rahi] tei te fenua [e e hotu rahi te maa] i nia i te tupuai o te mau mouˈa ra.”

Isa. 25:6: “Ei reira Iehova sabaota ra e rave ai, na te taata atoa i teie nei mouˈa [i te mouˈa Ziona no te raˈi, te vairaa o te Basileia o te Atua, e ravehia te mau faanahoraa no te feia o te fenua e auraro i teie faatereraa], i te oroa amuraa maa maitatai, i te oroa uaina tahito, i te mau mea maitatai roa ra, i te uaina tahito faaateate-maitai-hia ra.”

E faaore oia i te mau maˈi e te mau huru huma atoa

Luka 7:22; 9:11: “A haere a parau atu ia Ioane, i ta orua i faaroo e ta orua i ite iho nei; e te roaa nei te ite i te matapo, te haere nei te pirioi, te tamâhia nei te lepera, te faaroo nei te turi, te faatiahia nei tei pohe, e te parauhia nei te evanelia i te taata rii.” “Ua farii atura oia [Iesu Mesia] ia ratou, e ua parau atura i te parau o te basileia o te Atua, e faaora ˈtura i te feia maˈi.” (I te na reiraraa, ua faaite Iesu i ta ˈna e rave no te taata ia riro mai oia ei Arii no te raˈi.)

E horoa oia i te nohoraa tano maitai no te mau taata atoa

Isa. 65:21, 22: “E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu.”

E haapao oia e ia fanaˈo te taatoaraa i te hoê ohipa au maitai

Isa. 65:23: “E ore hoi ratou e ohipa faufaa ore noa; e ore ratou e faafanau i te tamarii pohe noa; e tamarii hoi ratou na tei haamaitaihia mai e Iehova: ratou, e ta ratou atoa ra mau tamarii.”

E haapapu oia i te oraraa ma te ino ore o te taata e e paruru oia i te mau taoˈa

Mika 4:4: “E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou: o te vaha hoi o Iehova sabaota ra, tei parau mai.”

Sal. 37:10, 11: “No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei. Area te feia mǎrû ra, e parahi ïa i te fenua, e oaoa ratou i te rahi o te hau ra.”

E haamau oia i te parau-tia e te titiaifaro

Pet. 2, 3:13: “Te tatari nei râ tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.”

Isa. 11:3-5: “E ore hoi ta ˈna [te Arii Mesia] parau e faaauhia i tei itea e tana mata; e ore hoi oia e aˈo i ta to ˈna tariˈa i faaroo ra: e haava râ oia i te taata rii ma te parau-tia ra; e tuu hoi oia i te parau au i te feia mamahu o te fenua nei . . . E te parau-tia ra, o te tatua ïa o tana tauupu; e te parau mau ra, o te ruuruu ïa o tana opu.”

E paruru oia i te huitaata i te mau ati natura

Mar. 4:37-41: “Ua tupu maira te hoê maa mataˈi rahi, fati maira te are i nia i te pahi e î roa aˈera. . . . Ua tia aˈera oia [Iesu] i nia, avau atura i te mataˈi, e ua na ô atura i te are, A faaea, a mania. Pohe ihora te mataˈi, mania roa ˈtura. . . . Rahi roa ˈtura to ratou mǎtaˈu, e ua na ô aˈera ratou ratou iho, O vai hoi teie o tei faaroo te mataˈi e te moana atoa ia ˈna?” (I tera taime, ua faaite te Mesia e e riro oia ei Arii no te raˈi o te nehenehe e haavî i te mau puai o te natura.)

E faatia mai oia i te feia pohe

Ioa. 5:28, 29: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo [te reo o te Mesia, te Arii], e e haere mai i rapae.”

Apo. 20:12: “E ite atura hoi au i tei pohe ra, o te taata rii, e te feia rarahi, i te tiaraa i mua i te [“terono,” MN] ra; e heua ihora hoi na buka ra: e heua ihora hoi te tahi buka, oia te buka ora ra: e haavahia ihora taua feia i pohe ra i te mau parau i papaihia i roto i taua na buka ra, i ta ratou ra mau ohipa [to muri iho i to ratou tia-faahou-raa; hiˈo Roma 6:7].”

E faaore oia i te pohe no roto mai i te hara a Adamu

Isa. 25:8: “Na ˈna e haamou roa i te pohe e a muri noa ˈtu; e na te Fatu ra, na Iehova, e horoi i te roimata i te mau mata atoa ra.”

Apo. 21:4: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”

E haamau oia i te hoê ao i reira te mau taata e here mau ai te tahi i te tahi

Ioa. 13:35: “O te mea teie e ite ai te taata atoa e, e pǐpǐ outou na ˈu [te feia e apiti atu ia Iesu i roto i te Basileia no te raˈi aore ra te feia o te fenua e auraro i teie Basileia], ia aroha outou ia outou iho.”

E faatupu faahou oia i te hau i rotopu i te taata e te animala

Isa. 11:6-9: “Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoê â amuiraa mai, e na te hoê tamaiti iti e aratai. Te puaatoro apî ra, e te daba maiaa ra, hoê â ïa amuiraa, e hoê â taotoraa to te fanauˈa. E amu hoi te liona i te aihere mai te puaatoro atoa ra. E hauti noa hoi te tamarii aiû i te apoo o te asepi, e te tamaiti no mairi aˈe te û ra, e tuu ïa i te rima i nia i te pupuniraa o te zepho ra. E ore ratou e hauti, e ore e rave ino, i to ˈu atoa nei mouˈa moˈa.” (Hiˈo atoa Isaia 65:25.)

Hos. 2:18; MN: “E ia tae i taua mahana ra e fafau ai au i te tahi faufaa no ratou i te mau [puaa oviri] o te fenua nei, e te mau manu o te raˈi ra, e te mau mea rii e nee i nia i te fenua nei; . . . e faataoto atu vau ia ratou ma te ora.”

E faariro oia i te fenua ei paradaiso

Luka 23:43, MN: “Oia mau, te parau atu nei au ia oe i teie mahana, Ei te Paradaiso oe e o vau atoa nei.”

Sal. 98:7-9: “Ia haruru te tai e to ˈna îraa, te ao atoa e to ˈna ra mau taata. Ia paipai te mau pape i to ratou rima; e ia umere tahi te mau mouˈa atoa, i te aro o Iehova, te haere maira hoi oia e haava i te fenua. E haava oia i to te ao ma te parau-tia, e te mau taata ma te piˈo ore.”

Hiˈo Genese 1:28; 2:15; Isaia 55:11.

Afea te Basileia o te Atua e haamata ˈi i te faatere?

I te senekele matamua ra anei?

Kol. 1:1, 2, 13: “Paulo, e aposetolo na Iesu Mesia i te hinaaro o te Atua ra, e tau taeae nei ia Timoteo, i te feia moˈa [te feia tei riro ei feia aiˈa no te Basileia no te raˈi] . . . O [te Atua] tei faaora ia tatou i te varua mana o te pouri, e ua tahiti ê mai ia tatou [te feia moˈa, te mau melo o te amuiraa Kerisetiano] i roto i te basileia o ta ˈna Tamaiti here ra.” (Inaha, ua haamata te Mesia i te faatere i nia i te amuiraa Kerisetiano hou a papaihia ˈi teie mau reni i te senekele matamua. Tera râ, aitâ to ˈna Basileia i faatere atura i te fenua taatoa nei.)

Kor. 1, 4:8: “Te îî na outou i tena na; te rahi na to outou maitai i tena na; e hau aˈenei to outou mai te hui arii ra, aita râ matou. Te hinaaro nei â vau ei hau â to outou ia hau-atoa-hia to matou ia outou na.” (Papu maitai, te faahapa ra te aposetolo Paulo i to Korinetia no to ratou manaˈo hape.)

Apo. 12:10, 12: “Teie mai nei te ora, e te puai, e te basileia o to tatou Atua, e te mana o ta ˈna ra Mesia: ua hurihia hoi te tihotiho i to tatou mau taeae i raro, o tei tihotiho ia ratou i mua i te aro o to tatou Atua i te rui e te ao. E teie nei, a oaoa, e te mau raˈi ra e, e o outou atoa hoi o tei parahi i reira ra. E ati râ hoi to te fenua e to te tai, tei raro atu na hoi te Diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei.” (Te faatuea ra teie irava i te haamauraahia te Basileia o te Atua e te tiavaruraahia o Satani i rapaeau i te mau raˈi. Aita teie mau ohipa i tupu i te taime o te orureraa hau i te ô i Edene ra, mai ta te faatiaraa i roto i te Ioba pene 1 e te 2 e haapapu ra. Ua papaihia te Apokalupo i te matahiti 96 T.T., e ia au i ta ˈna irava matamua, te faahiti ra oia i te mau ohipa e tupu a muri aˈe.)

E taui anei te ao i te faaroo hou te haerea mai o te Basileia o te Atua?

Sal. 110:1, 2: “Ua parau atura Iehova i tau Fatu [Iesu Mesia], E parahi oe i tau rima atau nei; e ia faarirohia e au to mau enemi ei taahiraa avae no oe. E faatae atu â Iehova i te sepeta ra o to oe mana mai Ziona ˈtu nei: e arii hoi oe i rotopu i to mau enemi ra.” (E tia ia Iesu ia mana i nia i to ˈna mau enemi; eita ïa pauroa te mau taata e auraro i ta ˈna faatereraa.)

Mat. 25:31-46: “Ia tae maira te Tamaiti a te taata [Iesu Mesia] ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa te mamoe i te puaaniho ra . . . [Tei ore i hamani maitai i to ˈna mau taeae faatavaihia] o te haere ê ïa e rave i te pohe mure ore, area te feia parau-tia ra, o te rave ïa i te ora mure ore.” (Papu maitai, eita te taatoaraa o te mau taata e taui na mua ˈˈe i te faaariiraahia o te Mesia; eita te taatoaraa e haere i te pae o te feia parau-tia.)

Te faaite ra anei te Bibilia afea te Basileia e haamauhia ˈi?

Hiˈo i te mau api 371-373, i te tumu parau “Taio mahana,” e te mau api 211-216, i te tumu parau “Mahana hopea.”

Ia parau mai te hoê taata e:

‘Eita tera Basileia e tae mai a ora noa ˈi au’

E nehenehe oe e pahono e: ‘Tera râ, e tia iho â i te reira ia tae mai, e ere anei? . . . E taa anei i te mau taata e o to ratou ui te ite atu i tera ohipa? Ua hinaaro te mau aposetolo iho a Iesu e ite, e e tano atoa te pahonoraa i horoahia ia ratou ra no tatou i teie mahana. (Mat. 24:3-14)’

Aore ra e nehenehe oe e parau e: ‘Mea rahi te taata e manaˈo ra mai ia oe. Tera râ, te tiaturi papu nei te mau Ite no Iehova, ia au i te Bibilia, e ua haamau-aˈena-hia te Basileia o te Atua i nia i te mau raˈi e e tia ia tatou taitahi ia faaite mai te peu e te hinaaro ra oia e ora i nia i te fenua nei i raro aˈe i te faatereraa a taua Basileia tia ra. Tera ïa te tumu i haere mai ai au i ǒ oe i teie mahana. A tapao na eaha ta te mau Papai e parau ra i roto i te Mataio 24:14.’