Eaha te auraa o te Basileia o te Atua no outou

UA HAAPII o Iesu Mesia i ta ˈna mau pǐpǐ ia pure: “Ia tae [mai] to oe ra [basileia].” (Mataio 6:10) Ehia rahiraa taime to te feia e parau nei e e pǐpǐ ratou na Iesu faataeraa i teie mau parau i te Atua ra!

Teie râ, ua rave hau atu Iesu i te haapii-noa-raa i ta ˈna mau pǐpǐ ia pure no te Basileia o te Atua. Ua rave oia i te Basileia ei tumu parau matamua no ta ˈna pororaa. Inaha, te na ô ra te Buka parau paari beretane e “te hiˈohia nei [te Basileia o te Atua] mai te tumu parau matamua o te haapiiraa a Iesu.”

Ia pure anaˈe te mau pǐpǐ a te Mesia no te Basileia, eaha mau na ta ratou e ani ra? Eaha te auraa o te Basileia o te Atua no ratou e no outou atoa? E eaha te hiˈoraa o Iesu?

Te hiˈoraa o Iesu no nia i te Basileia

Ua pii pinepine o Iesu ia ˈna iho “te Tamaiti a te taata.” (Mataio 10:23; 11:19; 16:28; 20:18, 28) Te faahaamanaˈo ra te reira ia tatou i te parau a te peropheta Daniela no nia i te hoê “Tamaiti a te taata.” Ma te faahiti i te hoê ohipa e tupu a muri aˈe i nia i te raˈi, ua parau o Daniela e: “Hiˈo ihora vau i taua orama i te rui ra, e inaha, te hoê mai te Tamaiti a te taata ra i te haerea mai na roto i te mau ata o te raˈi ra; e ua haafatata ˈtura oia i To te mau mahana tahito ra, e tuuhia ihora i pihai iho ia ˈna. E ua horoahia maira te mana, e te hinuhinu, e te basileia no ˈna, ia auraro mai te taata atoa, e te mau fenua atoa, e te reo atoa ia ˈna.”—Daniela 7:13, 14.

No nia i te tau e noaa mai ai te faatereraa ia ˈna, ua parau o Iesu i ta ˈna mau aposetolo e: “Ia parahi te Tamaiti a te taata i nia iho i to ˈna terono hanahana, e parahi atoa outou, o tei pee mai ia ˈu nei, i nia iho i te terono hoê ahuru e ma piti.” Ua parau atoa Iesu e: “Ia tae maira te Tamaiti a te taata ma ta ˈna hanahana, . . . e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra . . . O te haere ïa [te feia parau-tia ore] e rave i te pohe mure ore, area te feia parau-tia ra, o te rave ïa i te ora mure ore.”—Mataio 19:28; 25:31, 32, 46.

Te faaite ra teie mau parau tohu no nia i te mau terono e te mau nunaa atoa e ua riro te Basileia ei faatereraa i reira o Iesu e vetahi o ta ˈna mau pǐpǐ e faatere ai i nia i te huitaata nei. E mana to taua faatereraa nei no te haapohe te feia parau-tia ore. Teie râ, i raro aˈe i te faatereraa a te Basileia, e fanaˈo te feia parau-tia i te ô o te ora mure ore no ǒ mai i te Atua ra.

Oia mau, ua riro te Basileia o te Atua ei faatereraa haamauhia e te Atua i nia i te raˈi. Te Basileia, e ere ïa te ekalesia, e aita te mau Papai e faaite ra e ua taaihia oia i teie nei ao. Hau atu, eita te faatereraa a te Atua e nehenehe e vai i roto i te mafatu o te hoê taata. I te mea e ua riro te Basileia o te Atua ei faatereraa, eita oia e riro ei tuhaa no to tatou mafatu ia farii anaˈe tatou i te faaroo kerisetiano. No te aha râ vetahi e tiaturi ai e ua riro te Basileia ei huru o te mafatu?

Tei roto anei te Basileia ia tatou?

Te manaˈo nei vetahi e tei roto te Basileia i to tatou mafatu no te huru tatararaa a te tahi feia huri i te Bibilia no nia i te Luka 17:21. Ia au i te hoê tatararaa beretane (New International Version), te na ô ra o Iesu e: “Tei roto te basileia o te Atua ia outou na.”

I roto i teie tuhaa, te na ô ra te Titionare a te taata tatara i te Bibilia (beretane) e: “Noa ˈtu e e faahiti-pinepine-hia te reira mai te hoê hiˈoraa o te ‘faaroo hohonu’ aore ra te ‘huru no roto ra’ o Iesu, te niuhia ra teie tatararaa i nia te huriraa tahito ra, ‘i roto ia outou,’ . . . tei taahia ia au i te auraa tano ore o teie nei tau oia hoi ‘oe’; e tia ia rave i te parau ‘outou’ . . . na nia i te huru otini (te paraparau atura o Iesu i te mau Pharisea—irava 20) . . . Aita te faataaraa e ua riro te basileia o te Atua ei huru o te feruriraa, aore ra te faaoraraa o te taata, e tuea ra e te parau no reira te hutiraahia mai teie irava, e oia atoa e te taatoaraa o te faataaraa a te F[aufaa] A[pî] no nia i teie manaˈo.”

Te faaite ra te nota i raro i te apî no nia ia Luka 17:21 i roto i te hoê tatararaa beretane (Tatararaa apî a te ao) e e nehenehe te mau parau a Iesu e hurihia mai teie te huru: “Tei rotopu te basileia o te Atua ia outou.” Te na ô ra te tahi atu mau tatararaa beretane a te Bibilia e: “Tei rotopu te basileia o te Atua ia outou” aore ra “te tia ra i ropu ia outou.” (Te Bibilia Beretane Apî; Te Bibilia Ierusalema; Tatararaa hiˈopoa-faahou-hia) Ia au i te Tatararaa a te Ao apî no nia i te mau Papai moˈa, te na ô ra o Iesu e: “Tei ropu te basileia o te Atua ia outou na.” Aita o Iesu e hinaaro ra e parau e tei roto te Basileia i te mafatu o te mau Pharisea teoteo o ta ˈna e paraparau atura. Area ra, na nia i to ˈna tiaraa Mesia tiai-maoro-hia e Arii maitihia, te tia ra o Iesu i ropu ia ratou. Teie râ, e mairi te taime hou te Basileia o te Atua e tae mai ai.

Afea oia e tae mai ai

Ua maitihia vetahi mau pǐpǐ a Iesu Mesia ei mau arii apiti i roto i te Basileia Mesia no te raˈi. Mai ia Iesu, e pohe ratou ma te haapao maitai i te Atua e e faatiahia mai ratou no te oraraa varua i nia i te raˈi. (Petero 1, 3:18) Mea iti to ratou numera, inaha, e 144 000 ratou mau arii e mau tahuˈa e hoohia mai i rotopu i te huitaata nei. (Apokalupo 14:1-4; 20:6) Tei roto atoa te mau aposetolo haapao maitai i te mau arii apiti ia Iesu.—Luka 12:32.

Ma te faahiti i te parau no ta ˈna mau pǐpǐ i te hoê taime, ua tǎpǔ o Iesu e: “Oia mau teie ta ˈu e parau atu ia outou nei, O te tahi pae i teie nei feia e tia mai nei, e ore ïa e ite i te pohe, e ite ai ratou i te Tamaiti a te taata i te taeraa mai i to ˈna ra basileia.” (Mataio 16:28) Ma te anaanatae, te faaite ra te irava i muri iho e ua tupu te parau tǎpǔ a Iesu tau mahana noa i muri iho. Ua afai ihora oia e toru o ta ˈna mau pǐpǐ i nia i te hoê mouˈa i reira to ˈna faahuru-ê-raahia i mua ia ratou, e ua ite atura ratou i te hoê orama no ˈna i roto i te hanahana o te Basileia. (Mataio 17:1-9) Aita râ te Basileia i haamauhia i taua taime ra. Afea ïa te reira e tupu ai?

Te faaite ra te hoê o te mau parabole a Iesu e eita o ˈna e faatoroa-oioi-hia ei Arii Mesia. I roto i te Luka 19:11-15, te taio nei tatou e: “Ua tuu atoa ˈtura oia i teie nei parabole, no te mea te fatata maira Ierusalema ia ˈna, e te manaˈo ra ratou e, e itea mai te basileia o te Atua i reira ra. No reira oia i na ô atu ai, Haere atura te hoê taata mana i te fenua roa ia noaa ia ˈna te toroa arii ra, e a hoˈi mai ai. Ua parau atura oia i te mau tavini no ˈna e tino ahuru ra, e ua tuu atura i na mina hoê ahuru ia ratou, na ô atura, E hoo outou, e ia hoˈi mai au ra. . . . E hoˈi maira oia ma te toroa arii atoa i nia ia ˈna, ua faaue atura oia e tii i taua mau tavini ta ˈna i tuu atu i te moni ra, ia ite oia i te huru o te taoˈa i noaa ia ratou i te hooraa ra.”

I taua tau ra, e taime maoro te titauhia ia tere te hoê taata mai Iseraela e tae atu i Roma, ia tiai oia i roto i taua oire ra ia noaa mai te toroa arii, e ia hoˈi atu oia i to ˈna ra fenua ei arii. O Iesu taua “taata mana” ra. E noaa ia ˈna te mana ei Arii no ǒ mai i to ˈna Metua i nia i te raˈi, tera râ, eita o ˈna e faatoroa-oioi-hia ei Arii Mesia. E haapao ta ˈna mau pǐpǐ i te faufaa na roto i te faatupuraa i te ohipa faaiteraa i te parau apî maitai o te Basileia i roto i te hoê tau maoro hou oia e hoˈi mai ai ei Arii.

Mea nafea te Basileia e tae mai ai

Eaha ta te feia e here ra i te Atua e ani ra ia pure ratou ia tae mai to ˈna ra Basileia? Te ani ra ratou e ia rave te Basileia o te raˈi i te ohipa papu na roto i te haamouraa i te mau faatereraa a te taata nei o tei ore i manuïa i te faatupu i ta ratou parau tǎpǔ no te haamau i te hau e te ruperupe mau. Ma te faahiti i teie huru tupuraa, ua papai te peropheta Daniela e: “Ia tae i te anotau o taua mau arii ra, e faatupu ai te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.” (Daniela 2:44) Afea te reira e tupu ai?

Ua faaite atea mai o Iesu e e tupu te reira i roto i te ui o te feia o te ite i te hoê tauiraa rahi o te mau ohipa a te taata nei. No nia i te tau o to ˈna “vairaa mai,” ua horoa o Iesu i te hoê “tapao” e rave rau mau tuhaa o te faatupu i te mau ohipa mai te tamaˈi rahi, te mau aueueraa fenua, te mau oˈe, te mau maˈi pee—e oia atoa te pororaa na te ao atoa nei i te parau oaoa o te Basileia o te Atua.—Mataio, pene 24, 25; Mareko, pene 13; Luka, pene 21.

Te faahiti ra te parau tohu a Iesu i te mau ohipa e tupu ra i teie nei—i teie nei senekele e 20. No reira, eita e maoro faahou hou te Basileia o te Atua e hopoi mai ai i te mau haamaitairaa rahi no te huitaata nei. E nehenehe atoa outou e fanaˈo i te mau ohipa maitatai a te Basileia. Teie râ, eaha te auraa o te Basileia o te Atua no outou iho e no te feia o ta outou e here ra?

Te mau haamaitairaa a te faatereraa a te Basileia

E tupu te oaoa na te fenua atoa nei. I raro aˈe i “te raˈi apî”—te Basileia o te raˈi—e vai mai te hoê “fenua apî,” oia hoi te hoê totaiete taata auraro i te Basileia na te ao atoa nei. “Ei pihai atoa iho te Atua ia ratou,” o ta te aposetolo Ioane ïa i papai. “E na te Atua e horoi i to ratou roimata atoa.” O te oaoa anaˈe te vai mai inaha “te oto, e te mihi, e te mauiui, e ore atoa ïa.”—Apokalupo 21:1-4.

E ore roa te pohe. Eita teie ati mauiui mau e faaere faahou ia tatou i to tatou mau hoa e te feia herehia e tatou. “E taua enemi hopea ra o te pohe, e haamouhia ïa.” (Korinetia 1, 15:26) Auê te oaoa e ia monohia te mau tanuraa taata e te mau tia-faahou-raa o te feia ta te Atua e haamanaˈo noa ra!—Ioane 5:28, 29.

E mono te oraora-maitai-raa i te maˈi e te hapepa. Eita te mau roˈi fare maˈi e î faahou i te taata o tei roohia i te mau maˈi i te pae tino e i te pae feruriraa. E faaohipa te Taote Rahi, o Iesu Mesia, i te faufaa o to ˈna tusia o te hoo “ei faaora ïa i te mau fenua.” (Apokalupo 22:1, 2; Mataio 20:28; Ioane 1, 2:1, 2) Ua riro noa hoi te mau rapaauraa o ta ˈna i rave i to ˈna parahiraa mai i nia i te fenua nei ei hiˈoraa no te ohipa o ta ˈna e rave a muri aˈe na roto i te arai o te Basileia.—A faaau e te Isaia 33:24; Mataio 14:14.

E taoˈa pue noa te maa. Mai ta te papai salamo i parau, “e riro hoi e maa sitona tei te fenua i nia i te tupuai o te mau mouˈa ra.” (Salamo 72:16) I teie parau, te apiti atura te parau tohu a Isaia i teie faaiteraa: “Ei reira Iehova sabatoa ra e rave ai, na te taata atoa i teie nei mouˈa, i te oroa amuraa maa maitatai, i te oroa uaina tahito, i te mau mea maitatai roa ra, i te uaina tahito faaateate-maitai-hia.” (Isaia 25:6) Papu maitai, eita te oˈe e tairi faahou i te feia o te fenua nei i raro aˈe i te faatereraa a te Basileia.

E riro te fenua taatoa ei paradaiso. E tupu ïa teie parau ta Iesu i tǎpǔ i te hoê taata rave hara o tei tatarahapa: “Ei te paradaiso ïa oe e o vau atoa.” (Luka 23:43) E nehenehe atoa outou e fanaˈo i te ora mure ore i nia i teie nei fenua, te hoê fenua tamâhia i te ino e tei faarirohia ei palaneta au mau e te unauna.—Ioane 17:3.

Te vauvauhia nei teie mau tiaturiraa faahiahia atoa i mua i te mau taata auraro atoa. Te horoa maira te Parau faauruahia a Iehova, te Bibilia, i teie mau haapapuraa maitatai. E te reira te auraa o te Basileia o te Atua no outou.

[Hohoˈa i te api 7]

Te tiaturi ra anei outou i te parau ta Iesu i faaite no nia i te Basileia o te Atua?