Te faaamu ra ratou i te nǎnǎ a te Atua i roto i te autahoê

Te uiui nei te tahi pae taata: ‘Mea nafea te amuiraa a te mau Ite o Iehova i te ao taatoa nei te faatereraahia?’ Te pahono nei matou: Ia au ïa i te hiˈoraa i haamauhia e te amuiraa kerisetiano o te senekele matamua.

I roto i te mau matahiti 1870, ua faaoti o Charles Russell e to ˈna mau hoa e haaparare i te hotu o ta ratou mau maimiraa e ta ratou haapiiraa i te Bibilia na roto i te ravea o te mau oreroraa parau e te mau parau neneihia. Ua hiˈo te feia, no taua fenua ra, e tei amui mai i roto i teie ohipa a Russell e to ˈna mau hoa rave ohipa mai te hoê pǔpǔ taata aravihi i roto i te ohipa a te Fatu, e e mau taata ta ratou e nehenehe e ani i te mau manaˈo no nia i ta ratou mau ohipa.

I te matahiti 1884, ua haamauhia te Zion’s Watch Tower Tract Society ia au i te mau ture o te aihuˈa raau marite (Commonwealth) no Pennsylvania. Na Russell e to ˈna mau hoa matamua e faatere ra i teie taiete e e aratai ra i te mau ohipa a te mau Haapii Bibilia. I te matahiti 1909, ua afaihia ˈtu ta ratou mau piha toroa i Brooklyn. I te roaraa ïa o te mau matahiti, ua riro maira te mau faatere o te Taiete Watch Tower e te tahi atu mau hoa rave ohipa te vai ra te mau huru maitai i te pae varua titauhia e o tei faatavaihia i te varua ei Tino aratai na te mau Ite o Iehova.

E pǔpǔ kerisetiano faatavaihia tei riro mai ei Tino aratai (13 ratou i te matahiti 1986), e e hitu i rotopu ia ratou no roto i te tino faatere a te Taiete Watch Tower. Na ratou e peretiteni nei i te mau ohipa i te ao taatoa nei a te mau Ite o Iehova. I te mea aita ratou i faauruahia mai e te varua o te Atua, e nehenehe ïa ratou e hape; tera râ te tiaturi nei ratou i nia i te Parau hapa ore a te Atua, te mana teitei aˈe i te fenua nei, ua noaa mai ia ratou te aravihi na roto i te hoê oraraa auraro i te hinaaro o te Atua. E ua naeahia ia ratou tataitahi hau atu e 40 matahiti i roto i te taviniraa ma taime taatoa e te mau Ite o Iehova.

Na te Tino aratai e faatere nei te papairaa o te mau buka atoa a te Taiete. Te maitiraa o te mau tumu parau ra, tei te huru ïa o te mau hiaai i te pae varua o te nǎnǎ, e teie mau buka atoa ra e hotu ïa no te hoê tuatapaparaa i te taatoaraa no te Parau a te Atua e te maimiraa i ravehia na roto i te mana o te pure. I te mea hoi te haapii tamau noa nei taua mau taata ra i te Bibilia, te hiˈopoa nei ratou i te tupu-rii-raa o te mau opuaraa a te Atua, te tupuraa o te mau parau tohu i roto i te mau ohipa e itehia ra i te ao taatoa nei e te tiaraa o te nunaa o te Atua ia au i teie nei ao, i faatupu ai ratou i te tahi taime i te mau tauiraa haamaramaramahia no nia i te faataaraa o te tahi mau haapiiraa. E mea na reira ïa te ite i te parau mau te tupu-noa-raa mai i te rahi. — Salamo 97:11; Maseli 4:18; Daniela 12:4.

I roto i teie e 90 amaa tataitahi i te ao taatoa nei, ua haamau te Tino aratai i te hoê tomite e toru taata aravihi i te pae varua, ta ˈna i ani e na ratou e aratai i te mau ohipa e ravehia ra i roto hau atu e 200 fenua e mau motu. E auraa fatata roa to te mau amaa e te mau amuiraa i tuuhia ˈtu i raro aˈe i ta ratou faatereraa. E auraa tamau to te Tino aratai e te mau tomite amaa, e te tere nei te mau melo o teie tino aratai i te mau matahiti atoa i roto e rave rahi mau amaa ia taa papu ia ratou te tupuraa i roto ia ratou tataitahi.

Aore roa teie mau taata e faatere nei i nia i te faaroo o to ratou mau hoa; e mau tavini anaˈe ratou o te rohi nei ia ite te tahi atu pae taata i te Parau a te Atua. Aore hoi ratou e maimi nei ia monihia ratou, te mau mea atoa e hinaarohia no te oraraa e mea horoahia mai ïa mai to te tahi atu mau melo o te fetii no te Betela. Te tavini nei ratou ma te haapao mau, e e papuhia te reira na roto i to ratou itoito, te autahoê, te morare teitei e to ratou here rahi i te Bibilia e e itehia ïa i nia i te mau Ite o Iehova na te ao taatoa nei. — Korinetia 1, 3:5-9; 4:1, 2; Korinetia 2, 1:24; 3:1-3; Petero 1, 5:2, 3.

● Mea nafea te amuiraa a te mau Ite o Iehova ia faaterehia?

● O vai i teie mahana to roto i te Tino aratai e eaha ta ratou mau hopoia?

● Mea nafea te ohipa te faatereraahia i roto i te tahi atu mau fenua?

[Hohoˈa fenua i te api 26]

(Hiˈo i te papai)

Mau tuhaa fenua i reira te mau Ite o Iehova te faatupuraa i te hinaaro o te Atua.

[Hohoˈa i te api 

Mau peretiteni no te Taiete Watch Tower.

Charles Russell, 1884-1916

Joseph Rutherford, 1916-1942

Nathan Knorr, 1942-1977

Frederick Franz, 1977

[Hohoˈa i te api 27]

Te tahi o te mau amaa e mai reira mai te faatereraahia te mau ohipa i te ao taatoa nei a te mau Ite o Iehova.

Kanada

Zambie

Helemani

Tapone

Auteralia

Beresilia