Eaha te ohipa a te Tino aratai i teie mahana?

I te senekele matamua, i haa na te hoê pǔpǔ iti, oia hoi “te mau aposetolo e te mau matahiapo” i Ierusalema, ei tino aratai o te rave i te mau faaotiraa faufaa no te taatoaraa o te amuiraa Kerisetiano faatavaihia. (Ohipa 15:2) Ia rave ratou i te hoê â faaotiraa, no te mea ïa ua paraparau ratou i nia i te mau Papai e ua pee ratou i te aratairaa a te varua o te Atua. (Ohipa 15:25) Mai tera atoa i teie mahana.

Maitihia e te Atua no te rave i to ˈna hinaaro. Mea faufaa roa te Parau a te Atua no te mau taeae faatavaihia o te Tino aratai. Mea ite roa ratou i te haapao i te mau mea tei taaihia i ta matou ohipa e haamoriraa. E putuputu ratou i te mau hebedoma atoa no te hiˈopoa i te mau hinaaro mau o te mau taeae i te ao nei. Mai te tino aratai matamua, te horoa nei ratou i te mau aratairaa Bibilia na roto i te rata, te mau tiaau ratere e te tahi atu mau ravea. E tauturu te reira i te nunaa o te Atua ia hoê to ratou manaˈo e ta ratou ohipa. (Ohipa 16:4, 5) Na te Tino aratai e tiaau i te faaineineraa i te maa varua e te faatoroaraa i te mau taeae no te amo i te hopoia. Te faaitoito atoa nei ratou i te taatoaraa ia poro na mua roa.

E pee ratou i te aratairaa a te varua o te Atua. E imi te Tino aratai i te aratairaa a Iehova te Arii hau ê o te ao taatoa e a Iesu te Upoo o te amuiraa. (Korinetia 1, 11:3; Ephesia 5:23) Aita ïa ratou e faariro nei ia ratou ei faatere i te nunaa o te Atua. Te “pee tamau” nei râ ratou e te mau Kerisetiano faatavaihia atoa “i te Arenio [Iesu] i te mau vahi atoa ta ˈna e haere.” (Apokalupo 14:4) Te mauruuru roa nei te Tino aratai ia pure matou no ratou.

• O vai te tino aratai i te senekele matamua?

• E nafea te Tino aratai i teie tau e imi ai i te aratairaa a te Atua?