Te mau haamâuˈaraa maoti te mau ô horoa-noa-hia
Te ravehia ra te taatoaraa o te mau ohipa o ta matou i faataa ˈtu na te mau taata e horoa noa i to ratou taime, e riro te reira i te faaiti mai i te moni hoo o te mau buka. Te rave nei te mau Ite o Iehova i te taviniraa i tera e i tera fare e te opereraa i ta matou mau vea na roto i te manaˈo tauturu e na ratou iho e amo nei i ta ratou mau haamâuˈaraa. Aita roa te taime o te mau matahiapo e aratai nei i te amuiraa e tae noa ˈtu i to te mau tavini tauturu e aufauhia ra no ta ratou mau ohipa e rave ra. Na ratou iho e amo nei i ta ratou mau haamâuˈaraa.
Te farii nei te mau melo o te Tino aratai e vetahi atu mau Ite o te rave tamau nei i te ohipa no te faaineineraa e no te neneiraa i te mau Bibilia e te mau buka bibilia, i te hoê tuhaa moni iti noa no ta ratou iho mau haamâuˈaraa noa ˈtu â ïa e te tauturuhia ra ratou no te pae o te nohoraa e no te pae maa. Hoê â ia huru no te mau tiaau haaati.
Te moni iti e noaa mai no te mau buka no te aufau noa ïa i te mau haamâuˈaraa no te neneiraa, te hamaniraa e te haaponoraa. Te tahi atu mau haamâuˈaraa ra na te mau ô ïa a te mau Ite o Iehova iho aore ra te tahi mau pûpûraa ô aore ra na roto i te tahi mau faufaa e horoa-noa-hia i roto i te mau fenua e fariihia ra te reira e te ture e aufau ra i te reira.
Te vai ra i roto i te mau vahi haaputuputuraa atoa aore ra tairururaa, te mau afata no te ô, i reira te taata e hinaaro ra e tauturu e vaiiho ai i ta ˈna e hinaaro ra e horoa. Aore roa e anihia te moni. Aita atoa e faahepohia te tuhaa ahuru e te hoê tuhaa moni. Mai ta te mau Papai e faahiti ra, e horoa te taata atoa i ta ˈna i opua i roto i to ˈna mafatu. — Korinetia 2, 8:12; 9:7.
● Mea nafea te ohipa a te mau Ite o Iehova te tururaahia i te pae moni?