EAHA TE RAVE IA MARAA TE MONI HOO?

A faaohipa maitai ta oe moni

Ia maraa te moni hoo mea fifi roa. Eiaha râ e haapeapea rahi roa, te vai ra te tahi ohipa ta oe e nehenehe e rave no te haamaitai i to oe oraraa.

NO TE AHA MEA FAUFAA?

Mai te peu eita oe e haamata i te faaohipa maitai i ta oe moni, e rahi roa ïa te fifi i te pae moni. Noa ˈtu aita e rahi ta oe moni, e nehenehe râ oe e rave te tahi mau ohipa ia haamaitai to oe oraraa.

EAHA TE NEHENEHE E RAVE?

A ora ia au i ta oe moni. Mai te peu eita oe e haamâuˈa hau atu i te moni e vai ra, e tauturu te reira ia ore oe e haapeapea rahi roa. E ineine atoa ïa oe no te mau haamâuˈaraa manaˈo-ore-hia.

No te ora ia au i ta oe moni, a haamau i te hoê tapura faufaa. A tapao ta oe moni avaˈe e te mau haamâuˈaraa. A na reira ˈi, e ite ïa oe eaha te mau haamâuˈaraa hinaaro-mau-hia. A rave ta oe i faaoti e ia taui noa ˈtu te moni avaˈe, a faatano ïa ta oe tapura faufaa. Tera râ, mai te peu ua faaipoipo oe, a rave amui te mau faaotiraa.

A tamata na: Ia hoo oe te tahi taoˈa, mea hau aˈe ia aufau roa ˈtu i te tarahu mai. Ia na reira oe, mea ohie aˈe ïa ia haapao maite ta oe tapura faufaa e aita atoa ïa e tarahu ta oe. I te hopea avaˈe, a rave i te taime no te hiˈopoa ta oe tapura moni i te fare moni. E iti mai ïa to oe hepohepo a ite ai te toe ra ta oe moni.

Parau mau, e ere i te mea ohie ia faaherehere i te moni. Tera râ, ia haapao maite oe ta oe tapura faufaa e ia rave mai ta oe i faaoti, e vai hau noa ïa oe.

“A numera . . . i te haamâuˈaraa.”—Luka 14:28.

A haapao maitai ta oe ohipa. E nafea ïa? Teie te tahi mau manaˈo tauturu: A tae oioi i te ohipa, a faatupu i te hoê feruriraa maitai no nia i ta oe ohipa, a tauturu te mau hoa ohipa, a fetu, a faatura ia vetahi, a pee i te mau faaueraa e a tutava ia aravihi atu â.

Eiaha e haamâuˈa hanoa ta oe moni. A ui ia oe iho: “Ua matau anei au i te haamâuˈa rahi i te moni?” Ei hiˈoraa, e rave rahi taata o tei haamâuˈa te moni ta ratou i rohi ia noaa mai, i roto i te raau taero, te hauti pere, te avaava e te inu hua. E haafifi teie mau peu i to ratou ea e ta ratou ohipa.

“E oaoa te taata o te ite mai i te paari . . . Mea au aˈe ia noaa mai te paari i te noaaraa mai te ario.”—Maseli 3:13, 14.

A haaputu i te moni no te tupuraa ru. Mai te peu e nehenehe, a tuu i te hiti te hoê tino moni no te mau haamâuˈaraa manaˈo-ore-hia e te mau tupuraa ru. A na reira ˈi, eita ia oe e haapeapea rahi roa ia tupu anaˈe te fifi i te pae ea, ia erehia te ohipa aore ra te tahi atu ohipa manaˈo-ore-hia.

“No te mea e roohia [t]atou pauroa i te taime e te tupuraa manaˈo-ore-hia.”—Koheleta 9:11.

Manaˈo tauturu no te haaputu i te moni

A faaineine te maa i te fare.

Mea moni roa ia haere pinepine e tamaa i rapae aore ra ia hoo mai te maa ua ineine aˈena. Oia mau, e titauhia i te taime e te tutavaraa no te faaineine i te maa i te fare. I te pae hopea râ, e rahi mai ta oe moni haaputu. Hau atu â, na oe e maiti te mau maa maitai aˈe no to utuafare.

A feruri maite hou a hoo ai.

Hou a haere ai i te fare toa, a faaineine i te hoê tapura maa e a faatura i te reira. Eita ïa oe e hoo hanoa.
Mai te peu mea mâmâ aˈe, a hoo faarahi te tahi mau mea. Tera râ no te maa, a faataa te tahi vahi au maitai i te fare no te haaputu i te reira ia ore ia ino.
A hiˈopoa maitai hou a hoo ai te mau taoˈa, mai te peu mea mâmâ aˈe e e mea maitai atoa.
A imi i te hoo-mâmâ-raa i nia i te natirara, eita ïa oe e turaihia ia hoo i te mau mea ta oe e ite atu i roto i te fare toa. E nehenehe atoa ïa oe e ara i nia te mau haamâuˈaraa. Mai te peu te vai ra i to oe vahi te hooraa i nia i te natirara, e nehenehe anei oe e tamata?
A imi i te hoo-mâmâ-raa e a faaohipa i te mau titeti hoo mâmâ. A faaau te tino moni mai te uira anei, te pape e te tahi atu.

A feruri maitai hou a hoo ai i te mea apî.

Pinepine te mau taiete e hamani i te mau taoˈa apî, mai te niuniu afaifai e te tahi atu ia hoonahia ratou. A rave i te taime no te uiui ia oe iho: “E faufaahia anei au ia hoo i te mea apî aˈe? E titauhia anei ia taui au i teie nei â? E ia hoo vau i te mea apî, e nehenehe anei au e imi i te mea mâmâ aˈe?”

A tataî e a faaohipa faahou.

A atuatu maitai ta oe mau taihaa ia vai maoro noa, e ia ino noa ˈtu a tataî mai te peu mea mâmâ aˈe. E nehenehe atoa oe e hoo i te mau taihaa faaohipa-aˈena-hia.

A tanu i ta oe iho maa.

E nehenehe anei oe e faataa i te tahi vahi no te faaapu? E iti mai ïa ta oe mau haamâuˈaraa e hau atu â e nehenehe oe e hoo ta oe i tanu, e opere aore ra e ai taui.

“E manuïa iho â te mau opuaraa a te taata itoito.”—Maseli 21:5.

“Pinepine mâua ta ˈu vahine e hiˈopoa i te moni hoo e ta mâua faaohiparaa i te tareta moni.”—Miles, Beretane.

“Hou a haere ai i te fare toa, e faaineine matou i te hoê tapura maa no te mau mea hinaarohia.”—Jeremy, Marite.

“E faatano pinepine matou i ta matou tapura faufaa ia au i te mau tauiraa o te oraraa e e tuu atoa matou i te hiti te tahi tino moni no te mau haamâuˈaraa manaˈo-ore-hia.”—Yael, Iseraela.

“Ua haapii mâua i ta mâua mau tamarii ia tataî te mau taihaa i te hoo mai i te mea apî. No te pereoo anei aore ra te mau taihaa i roto i te fare. E haapae atoa mâua i te hoo mai i te mau matini apî roa ˈˈe.”—Jeffrey, Marite.

“Ua faaiti au i ta ˈu mau haamâuˈaraa ma te faaamu i te moa e ma te tanu i ta ˈu iho maa. E ia rahi anaˈe e nehenehe au e opere na vetahi.”—Hono, Birmanie.