5. E ore anei te mauiui i te hoê mahana?
No te aha mea faufaa ia ite?
Mai te peu e ore te mauiui i te hoê mahana, e noaa mai te hoê tiaturiraa papu no ananahi e e taui to tatou manaˈo no nia i te Atua.
Ua feruri anei oe?
Mea rahi te taata e hinaaro e faaore i te mauiui, mea iti râ ta ratou e nehenehe e rave. A tapao na:
Noa ˈtu te mau ravea apî no te rapaau i te taata . . .
Mea rahi te pohe nei no te maˈi mafatu.
I te mau matahiti atoa, ehia mirioni taata te pohe nei no te mariri ai taata.
Ua faataa te aivanaa David Bloom i roto i te tahi vea, noa ˈtu mea rahi te ravea apî, eita te mau taote e nehenehe e rapaau e rave rahi maˈi. E roohia te taata i te mau maˈi apî, e oia atoa te mau maˈi tahito o te hoˈi faahou mai ra.—Frontiers in Immunology.
Noa ˈtu mea rahi te faufaa a te tahi mau fenua . . .
I te mau matahiti atoa, e mirioni tamarii te pohe nei, i te mau vahi iho â râ mea veve te taata.
E miria e e miria taata aita e vahi haumitiraa no ratou.
E rave rahi mirioni taata aita e pape mâ ta ratou.
Noa ˈtu te mau faaararaa tuutuu ore no nia i te tiaraa o te taata . . .
Ia au i te tahi faatiaraa a te Hau amui, te vai noa ra te mau hamani-ino-raa i nia i te taata i roto e rave rahi fenua e eita te feia e rave nei i tera mau ohipa e roaahia nei. Te tumu, aita te feia mana i ite i te ohipa e tupu ra aore ra aita ta ratou e ravea no te faautua i tera mau taata ohipa ino.
NO TE ITE ATU Â
A mataitai i te video Eaha te Basileia o te Atua? i nia i te jw.org.
Ta te Bibilia e parau ra
Mea here na te Atua ia tatou.
Te haapeapea ra te Atua ia mauiui e ia oto tatou.
“Aita hoi [te Atua] i vahavaha, aita atoa i tapo i to ˈna mata i mua i te mauiui o te taata e ahoaho ra. Aita te Atua i tapuni i to ˈna aro ia ˈna. I to ˈna piiraa ia ˈna no te ani i te tauturu, ua faaroo oia.”—SALAMO 22:24.
“A huri . . . i to outou mau haapeapearaa atoa i nia ia ˈna, no te mea te haapeapea mai ra oia no outou.”—PETERO 1, 5:7, nota.
E faaorehia te mauiui.
Te haapapu ra te Bibilia e tupu ta te Atua i opua no tatou.
“E tamǎrô [te Atua] i te mau roimata atoa o to ratou mata. E ore roa te pohe, e ore atoa te oto e te auê e te mauiui.”—APOKALUPO 21:3, 4.
E faaore te Atua i te mau mea e faatupu i te mauiui.
E na reira te Atua na roto i to ˈna Basileia, oia hoi ta ˈna Faatereraa.
“E haamau te Atua o te raˈi i te hoê faatereraa arii o te ore roa e haamouhia. E e ore roa tera faatereraa arii e riro i te hoê nunaa ê atu. . . . O ˈna anaˈe te vai mai e a muri noa ˈtu.”—DANIELA 2:44.