4. Ua opuahia anei ia mauiui tatou?

No te aha mea faufaa ia ite?

E nehenehe te pahonoraa e taui i ta tatou huru hiˈoraa i te oraraa.

Ua feruri anei oe?

Inaha ua hamani te Atua i te fenua ma te nehenehe mau, mea tano anei ia manaˈo ua opua o ˈna ia mauiui tatou?

No te mau taata o te ore e anaanatae ra i te haapaoraa, ia ite ratou i te mau mauiui, e feruri ratou: Te vai mau ra anei te hoê Atua î i te here? Te vai mau ra anei te Atua? No ratou, ua riro te mau mauiui ei haapapuraa (1) Aita to te Atua e mana no te faaore i te reira, (2) Eita te Atua e hinaaro e faaore i te reira aore ra (3) Aita e Atua.

Tera iho â anei te tumu?

Ta te Bibilia e parau ra

Aita te Atua i poiete ia tatou ia mauiui tatou.

Te hinaaro ra te Atua ia oaoa tatou.

“I te hopea, taa ihora ia ˈu e aita e mea maitai aˈe no [te taata] ia oaoa noa e ia rave i te maitai i te roaraa o to ratou oraraa, e ia tamaa atoa, ia inu e ia oaoa no ta ratou ohipa rohirohi taatoa. O te ô tera a te Atua.”—KOHELETA 3:12, 13.

Ua fanaˈo na taata matamua i te mau mea atoa eiaha raua ia mauiui.

Aita te Atua i opua ia mauiui raua, na reira atoa to raua huaai.

“Na ô atura te Atua: ‘Ia tamariihia orua e ia rahi, a faaî i te fenua e a haapao atu.’”—GENESE 1:28.

Ua maiti na taata matamua i te ore e faaroo i te Atua.

No reira raua e to raua huaai i mauiui ai.

“Mai te hara i ô mai i te ao nei na roto i te taata hoê ra e te pohe na roto i te hara, e ua raea roa te mau taata atoa i te pohe no te mea ua hara ratou paatoa.”—ROMA 5:12.a

Aita te Atua i poiete i te taata no te faatere ia ratou iho.

Mai ia tatou i ore i poietehia no te ora i roto i te miti, e ore e tia i te taata ia faatere ia ratou iho.

“Aita e tiaraa to te taata e haere ra ia aratai i to ˈna mau taahiraa.”—IEREMIA 10:23.

Eita te Atua e hinaaro ia mauiui te taata.

Eita te Atua e hinaaro ia fifi te taata.

“Ahani iho â oe i haapao i ta ˈu mau faaueraa! E riro ïa to oe hau mai te hoê anavai.”—ISAIA 48:18.