Mea faufaa te aratairaa a te feia paari

EAHA TE AURAA?

E hinaaro te tamarii i te aratairaa e te aˈoraa a te feia paari i roto i to ratou oraraa. Ei metua, na outou tera hopoia. Tera râ, e nehenehe te tahi atu taata paari e tauturu atu ia horoa i te aratairaa e te aˈoraa i ta outou tamarii.

NO TE AHA MEA FAUFAA?

I te tahi mau fenua, mea varavara roa te taime e amuimui ai te feia apî i te feia paari. A feruri na i to muri nei mau tupuraa:

• Te rahiraa o te taime, tei te fare haapiiraa ïa te mau tamarii. I reira, mea rahi aˈe te tamarii i te taata paari.

• Ia oti te haapiiraa, e faaea noa te tamarii o ratou anaˈe no te mea tei te ohipa to ratou na metua.

• Ia au i te tahi hiˈopoaraa i Marite, te mau tamarii mai te 8 e tae atu 12 matahiti, tei nia ïa i te matini roro uira fatata e ono hora i te mau mahana atoa.a

Te parauhia ra i roto i te tahi buka: “No te fanaˈo i te haapiiraa, te aratairaa aore ra te aˈoraa, te fariu nei te feia apî eiaha i nia i to ratou mama, papa, orometua aore ra te tahi atu taata paari, i nia râ i te feia apî mai ia ratou.”—Hold On to Your Kids.

NAFEA IA HAAPII I TE TAMARII?

A horoa i te taime no te tamarii.

ARATAIRAA BIBILIA: “A haapii i te tamarii i te eˈa ia na reira oia i te haere, ua ruhiruhia anaˈe oia, eita oia e faarue i te reira.”—Maseli 22:6, nota.

I te apî-roa-raa, e imi iho â te tamarii i te aratairaa e te tauturu a to ratou metua. No reira te feia hiˈopoa e parau ai noa ˈtu ua hau atu i te 12 matahiti to te tamarii, e haafaufaa aˈe iho â ratou i te aˈoraa a to ratou mau metua, eiaha râ i te parau a te tahi atu tamarii. Ua papai te taote Laurence Steinberg: “I te tamariiraa e i te taurearearaa, e pee iho â te tamarii i te huru e te haerea o to ratou mau metua. E hinaaro iho â te feia apî e ite i to outou manaˈo e e faaroo i ta outou e parau atu noa ˈtu eita ratou e farii noa e e mauruuru i te reira.”—You and Your Adolescent.

I tera faito matahiti, e taime tano ïa tera no te horoa i te aratairaa i ta outou tamarii. A rave i te taime no ta outou tamarii, a faaite i to outou manaˈo e eaha te mea faufaa no outou. A faatia atoa i te mau tupuraa ta outou i farerei.

A faahoa ia ˈna i te tahi atu taata paari hiˈoraa maitai.

ARATAIRAA BIBILIA: “Te taata e haere ra e te feia paari, e paari ïa.”—Maseli 13:20.

Te manaˈo ra anei outou i te tahi taata paari o te nehenehe atoa e riro ei hiˈoraa maitai no ta outou tamarii? Papu, e maiti outou i te hoê taata paari tiaturihia o te ore e haamauiui i ta outou tamarii. E nehenehe paha outou e faataa i te tahi taime ia haamatau ta outou tamarii ia ˈna. Eita outou e huri i ta outou hopoia metua i nia ia ˈna, e nehenehe râ ta ˈna mau faaitoitoraa e tauturu i ta outou tamarii. I roto i te Bibilia, ua faahoa te taurearea ra o Timoteo i te aposetolo Paulo. Ua faufaa-mau-hia Timoteo i te hiˈoraa o Paulo, e o Paulo, i te auhoaraa o Timoteo.—Philipi 2:20, 22.

I te mau matahiti i mairi, e rave rahi utuafare tei atea ê i te tahi e te tahi mero utuafare. Te ora ra paha te papa aore ra mama ruau, te tonton, te tati i te tahi atu fenua. Mai te peu tera to outou tupuraa, a faaitoito i ta outou tamarii ia faahoa i te taata paari o te faatupu ra i te mau huru maitatai ta outou e hinaaro ia faaite atoa ta outou tamarii.