Nafea ia amo i ta ˈna hopoia?

EAHA TE AURAA?

Mea tiaturihia te feia e amo i ta ratou hopoia no te mea e rave faahope ratou i te ohipa i horoahia ˈtu i te taime titauhia.

E nehenehe te tamarii e faatupu i te feruriraa paari noa ˈtu mea apî roa ratou. Te na ô ra te tahi buka: “Ia tia to te aiû 15 avaˈe, e rave ratou i ta te metua e faaue atu. Mai te 18 avaˈe atu, e rave ratou i te mau mea atoa ta to ratou mau metua e rave. I te tahi mau fenua, ia tia to te tamarii e pae aore ra e hitu matahiti, e faaite te mau metua eaha te mau ohipa ta ratou e nehenehe e rave i te fare. E nehenehe te mau tamarii e rave maitai i te hoê ohipa noa ˈtu mea apî roa ratou.”—Parenting Without Borders.

NO TE AHA MEA FAUFAA?

I te tahi taime, eita te mau metua e haapii i ta ratou tamarii ia faaohipa maitai i ta ratou moni, ia atuatu i te fare e ia amo i te hopoia. Ia farerei ratou i te fifi i muri aˈe i to ratou faarueraa i te fare, e hoˈi faahou mai ratou ia papa e ia mama ra.

No reira mea maitai aˈe ia haapii i ta outou tamarii i teie nei â ia amo i ta ˈna hopoia ia paari to ˈna feruriraa. Te na ô ra te tahi buka: “Eita outou e hinaaro ia tiaturi noa te tamarii ia outou e ia tia roa ˈtu to ratou 18 matahiti i reira noa ratou e ite ai mai te aha mau na te oraraa.”—How to Raise an Adult.

NAFEA IA HAAPII I TE TAMARII?

A tamau i te horoa ˈtu i te ohipa.

ARATAIRAA BIBILIA: “E faufaa noa te noaa ia ravehia te mau huru ohipa rohirohi atoa.”—Maseli 14:23.

Mea au na te tamarii e rave i te ohipa e to ratou metua, e taime tano ïa tera no te haamatau i te tamarii ia rave i te ohipa i te fare.

Eita vetahi metua e hinaaro e na reira. No ratou, ua navai noa te ohipa haapiiraa, aˈunei ta ratou tamarii e teimaha roa ˈi!

Tera râ, mea manuïa aˈe te tamarii i te haapiiraa ia rave ratou i te ohipa i te fare. Ua haapii hoi ratou i te farii i te ohipa e i te rave faahope i te reira. Hau atu â, te na ô ra te tahi buka: “Ia ore te metua e haapii i ta ratou tamarii ia rave i te ohipa i te apî-roa-raa, e ô mai te manaˈo i roto i te tamarii: ‘Aita e faufaa ia tauturu atu!’ E haamata ratou i te tiaturi na te tahi atu e rave i te ohipa.”—Parenting Without Borders.

Ma te faarave i te tamarii i te ohipa i te fare, e haapii outou ia ratou ia tauturu ia vetahi ê, eiaha râ ia haapao noa ia ratou iho. E taa ïa i te tamarii mea faufaa ratou e e hopoia atoa ta ratou i roto i te utuafare.

A tauturu i ta outou tamarii ia amo i ta ratou hopoia ia hape ratou.

ARATAIRAA BIBILIA: “A faaroo i te aˈoraa e a farii i te aˈo ia noaa mai ia oe te paari a muri aˈe.”—Maseli 19:20.

Ia hape ta outou tamarii, ei hiˈoraa, ia tuino o ˈna i te taoˈa a vetahi ê ma te opua ore, eiaha e huna. E nehenehe te tamarii e amo i ta ˈna hopoia ma te tatarahapa e peneiaˈe, ma te tataî i te ohipa ta ˈna i rave.

Ia farii te tamarii i te amo i ta ˈna hopoia, e haapii oia . . .

• i te haerea afaro

• eiaha e pari ia vetahi ê

• eiaha e imi i te otoheraa

• ia tatarahapa