Ia papu ia oe o vai mau na oe, e nehenehe ta oe e faaruru i te vero puai
NO TE FEIA APÎ
9 O vai mau na outou?
EAHA TE AURAA?
Ia anihia outou o vai mau na outou, eita noa outou e faaite i to outou iˈoa aore ra to outou hohoˈa. E ô mai râ te parau o to outou haerea, ta outou e tiaturi ra e to outou huru, oia hoi to outou taatoaraa, i roto e i rapaeau.
NO TE AHA MEA FAUFAA?
Ia papu ia outou o vai mau na outou, e paturu outou i ta outou e tiaturi e eita e vaiiho i to outou mau hoa ia faatere mai.
“E au te rahiraa o te taata i te pepe hurio i roto i te fare toa hooraa ahu. E ere na ratou e maiti i te ahu no ratou, na vetahi ê râ.”—Adrian.
“Ua haapii au i te paturu i te mea maitai noa ˈtu mea fifi. Ua ite au o vai mau na to ˈu mau hoa ia au i to ratou huru i nia ia ˈu e to ˈu huru i nia ia ratou.”—Courtney.
ARATAIRAA BIBILIA: “Eiaha atoa outou ia faaau faahou i to outou haerea i to teie faanahoraa o te ao nei, ia taui râ outou a faaapî ai i to outou feruriraa.”—Roma 12:2.
EAHA TE NEHENEHE E RAVE?
Ia papu ia oe o vai mau na oe i teie nei e teihea huru taata ta oe e hinaaro e riro mai ma te hiˈopoa i to oe mau puai, to oe mau paruparu e te mea ta oe e tiaturi papu ra. E haamata anaˈe ma te pahono i teie mau uiraa.
Puai: Mea aravihi au i roto i teihea ohipa? Eaha to ˈu mau puai? (Ei hiˈoraa: E tae anei au hou te hora? Ua ite anei au i te haavî ia ˈu iho? Mea rave anei au i te ohipa? E aau horoa anei to ˈu?) Eaha te maitai ta oe e rave nei?
MANAˈO TAUTURU: Mea fifi anei no oe ia ite i to oe mau puai? A ani i to oe metua aore ra hoê hoa mea tiaturi na oe eaha to oe mau puai e no te aha.
ARATAIRAA BIBILIA: “Ia hiˈopoa te taata tataitahi i ta ˈna iho ohipa, e na reira hoi oia e oaoa ˈi ia ˈna iho, eiaha râ no te mea ua faaau o ˈna ia ˈna i te tahi atu.”—Galatia 6:4.
Paruparu: Teihea tuhaa o to ˈu huru te tia ia haamaitai atu â? I teihea taime e fati ai au i mua i te faahemaraa? I roto i teihea tuhaa e tia ˈi ia haavî ia ˈu iho?
ARATAIRAA BIBILIA: “Ia parau tatou: ‘Aita ta tatou e hara,’ te haavare nei ïa tatou ia tatou iho.”—Ioane 1, 1:8.
Tiaturiraa: Eaha te mea maitai e te mea ino no ˈu, e no te aha? E tiaturi anei au i te Atua? Eaha te mau haapapuraa i tiaturi ai au i te Atua? Eaha te mau ohipa ta ˈu e parau e mea tano ore, e no te aha? Eaha ta ˈu mau tiaturiraa no a muri aˈe?
ARATAIRAA BIBILIA: “E haapao maitai te aravihi ia feruri ia oe, e e paruru te haroˈaroˈa ia oe.”—Maseli 2:11.