10 Neheneheraa e tiaturi

EAHA TE AURAA?

E nehenehe to ratou mau metua, hoa e paoti ohipa e tiaturi ia ratou. E haapao ratou i te mau faatureraa, e tapea i ta ratou parau e e faaite noa i te parau mau.

NO TE AHA MEA FAUFAA?

I te rahiraa o te taime, rahi noa ˈtu â oe i te faaite i te taata e nehenehe oe e tiaturihia, rahi noa ˈtu â ratou i te horoa ia oe i to oe tiamâraa.

“E nafea oe e faaite ai i to oe metua e e nehenehe raua e tiaturi ia oe? Ma te faaite ïa e taata feruriraa paari oe e te haapao maitai, eiaha noa to reira anaˈe raua, oia atoa râ aita anaˈe raua.”​—Sarahi.

ARATAIRAA BIBILIA: “A tamau . . . i te tamata ia outou teihea huru taata outou.”​—Korinetia 2, 13:5.

EAHA TE NEHENEHE E RAVE?

Teie ta oe e nehenehe e rave ia tiaturi atu â aore ra ia tiaturi faahou te taata ia oe.

A faaite i te parau mau. Noa ˈtu mea tiaturi na te taata ia oe, hoê noa haavare ta oe, e ore ai ratou e tiaturi faahou mai. Area ia faaite oe i te parau mau, ia hape iho â râ oe, e tiaturi mai vetahi ê ia oe.

“Mea ohie ia faaite i te parau mau aita anaˈe e fifi. Ia faaite râ oe i te parau mau no nia i te tahi ohipa tano ore ta oe i rave, e tiaturi atu â te taata ia oe.”—Caiman.

ARATAIRAA BIBILIA: “Te hinaaro ra matou ia afaro noa to matou haerea i te mau mea atoa.”​—Hebera 13:18.

A faaite e e taata tiaturihia oe. I roto i te hoê titorotororaa i Marite, ua haapapu e 78 i nia i te hanere o te taata tihepu e o te neheneheraa e tiaturi “hoê o na tuhaa e toru te titauhia ia tihepuhia hoê taata.” Ia haapii oe i teie nei ia faaite e e taata tiaturihia oe, e faufaahia oe ia paari mai oe.

“E ite mai to ˈu na metua mea haapao maitai e e rave au i ta ˈu ohipa i te fare e aita raua e haamanaˈo noa mai ia ˈu eaha ta ˈu e rave. Rahi noa ˈtu vau i te haapao i te reira, rahi noa ˈtu raua i te tiaturi mai.”—Sarah.

ARATAIRAA BIBILIA: “Te tiaturi nei au e e na reira iho â oe, . . . ua ite hoi au e e rave hau atu â oe i ta ˈu e ani atu ra.”​—Philemona 21.

A faaoromai. Taa ê atu i te tupuraa o te tino, o te ite-mata-hia, e titauhia te taime ia ite mai vetahi ê ua paari to oe feruriraa.

“E ere no te mea ua rave oe i te ohipa maitai hoê taime e tiaturi ai to oe metua e vetahi ê ia oe. E tiaturi mai râ ratou mai te peu e tamau noa oe i te rave i te ohipa maitai.”—Brandon.

ARATAIRAA BIBILIA: “Ia ahu mai outou i . . . te faaoromai.”​—Kolosa 3:12.