Ua faatano te Piha Haavaraa Rusia i te mau Ite no Iehova

E HAAPOPOU te mau Ite no Iehova i te mau faatiaraa no nia ia ratou i roto te mau vea mai te peu e ua faaineinehia te reira ma te feruri-maitai-hia. Hau atu â, te hinaaro nei te mau Ite no Iehova e faaite i te parau mau no nia ia ratou iho e to ratou mau tiaturiraa faaroo e ta ratou mau ohipa. Teie râ, ia neneihia te mau tumu parau tano ore aore ra pari haavare no nia ia ratou, i te tahi taime, e titau te mau Ite i te mau mana faatere no te faatia i to ratou mau tiaraa faaroo e tivila. E rave anaˈe i te hoê hiˈoraa hopea nei.

I te 1 no Atete 1997, ua nenei te Komsomolskaya pravda, te hoê vea Rusia matauhia, i roto i ta ˈna tuhaa no St Petersbourg, i te hoê tumu parau o te faaino rahi ra i te mau Ite no Iehova. I roto i te tumu parau ra, teie hoi te upoo parau “Pǔpǔ faaroo amahamaha no Petersbourg. E tia te hoê hiero-oire i ǒ nei,” te parau ra te taata papai o Oleg Zasorin e mea atâta te mau Ite no Iehova no to ratou mau tiaturiraa e e ofati ta ratou mau ohipa i te Pǎpǎ ture Rusia. Te rahiraa o te mau aroraa, te taviriraa ïa i te mau tiaturiraa o te mau Ite niuhia i nia i te Bibilia no nia, ei hiˈoraa, i te mau pâmuraa toto e te mau auraa fetii. Hau atu â, ua pari te tumu parau ra e e “pǔpǔ faaroo amahamaha” te mau Ite no Iehova, a parau ai e, ia au i vetahi pae, o ratou “te mea atâta roa ˈˈe o te mau pǔpǔ faaroo amahamaha atoa.”

Ua titau te Pu tiaauraa a te faanahonahoraa faaroo a te mau Ite no Iehova no Rusia i te Piha Haavaraa a te Peretiteni no te mau Mârôraa i te pae o te mau Vea a te Hau amui Rusia, ia hiˈopoa faahou i te mau parau i roto i te tumu parau ta te mau Ite no Iehova e hiˈo ra ei mea haavare. I te haavaraa a te Piha Haavaraa, i te 12 no Febuare 1998, tei reira te mau tia a te mau Ite no Iehova e ua pahono ratou i te mau uiraa e rave rahi i uihia e te mau melo o te piha, e te mau papai vea atoa e te mau paruru. No te haapapu eaha mau na ta te mau Ite no Iehova e tiaturi e e haapii, ua hiˈopoa maite te mau melo o te Piha Haavaraa i te mau papai i neneihia e te mau Ite no Iehova, i te buka iho â râ Te ravea e itehia ˈi te oaoa i te utuafare.

Ua parau o V. V. Borshchyov, tepute no te tuhaa fenua o Duma i te Hau amui Rusia, e e manaˈo ino mau te parau ra “pǔpǔ faaroo amahamaha.” Ua parau o Borshchyov Tane e: “Mea atâta roa [te raveraa i teie huru] tiamâraa e te pariraa parau. Mea faufaa roa te mea e ua farii te Piha Haavaraa e hiˈopoa i te hororaa a te mau Ite no Iehova. E tia ia faaea teie mau faahuehueraa e mau faainoraa i te mau faanahonahoraa faaroo tiamâ.”

I muri aˈe i te faarooraa i te mau haapapuraa atoa, ua faaoti te Piha Haavaraa e aita te tumu parau e vai ra i roto i te Komsomolskaya pravda i tia i te ture e i te morare; ua manaˈo atoa ratou e ua î roa te tumu parau i te haavare e aita to te reira e niu. “Aita te taata papai e horoa maira i te hoê noa ˈˈe tupuraa taa ê . . . Ua haaparare te taata i papai i te vea i te mau parau mai te huru ra e e mau faatiaraa tano, a faaohipa ˈi i te mau tiaraa o te mau papai vea ma te tano ore,” ta te Piha haavaraa ïa i parau. Taa ê roa ˈtu i ta te tumu parau i faatia, te manaˈo ra te Piha Haavaraa e e feia auraro i te ture te mau Ite no Iehova e e haapii ratou i ta ratou mau melo ia ora i roto i te hau e to ratou utuafare e vetahi ê o tei ore i farii i to ratou mau tiaturiraa faaroo.

Hoê hora i muri aˈe a faaroohia ˈi te ite hopea, ua faaite maira te Piha Haavaraa i ta ratou faaotiraa:

“1. E faˈi e ua ofati te neneiraa i te tumu parau ra ‘Pǔpǔ faaroo amahamaha no Petersbourg. E tia te hoê hiero-oire i ǒ nei’ i te mau faaueraa a te irava 4, 49 e 51 o te Ture a te Hau amui Rusia ‘no nia i te mau vea.’

“2. E faaitoito e ia feruri faahou te Tomite a te Hau no te mau Tumu parau Neneihia a te Hau amui Rusia i te parau e faatae atu i te hoê faaararaa i te tomite no te neneiraa a te vea ra Komsomolskaya pravda.

“3. E faatae atu i te hoê parau faahapa i te papai vea ra o O. Zasorin.

“4. E faaitoito e ia nenei te tomite neneiraa a te vea ra Komsomolskaya pravda i te hoê parau tatarahapa no to ratou neneiraa i te mau faaiteraa haavare o te faaino ma te tumu ore i te faanahonahoraa faaroo a te mau Ite no Iehova.”

E au maite teie faaotiraa a te Piha Haavaraa i te mau manaˈo i noaa mai ia Sergei Ivanenko, taata ite i te pae faaroo e e parau tuite teitei roa hoi ta ˈna no nia i te philosophia. I muri aˈe i to ˈna tuatapapa-maitai-raa i te mau tiaturiraa o te mau Ite no Iehova e te amuiraa i roto ia ratou, ua papai o Ivanenko Tane, e ere hoi oia i te Ite no Iehova, i te hoê tumu parau i neneihia i roto i te numera o te 20-26 no Febuare 1997 o te Moscow News.a Teie te mau manaˈo o Ivanenko Tane: “E taa ê te mau Ite no Iehova no to ratou tiaturiraa papu e ora ia au i te Bibilia. . . . No te mau Ite no Iehova, o te Bibilia te pǎpǎ ture, te ture tivila e te parau mau hoê roa. . . . E nehenehe te mau Ite no Iehova e riro ei hiˈoraa no te toea o te huiraatira no to ratou haapao maitai i te parau mau a te Bibilia e to ratou hinaaro e paturu i ta ratou mau tiaturiraa ma te haapae ia ratou iho.”

Te haapapu faahou ra ïa te faaotiraa a te Piha Haavaraa e te mau manaˈo o Ivanenko Tane e e ere te mau Ite no Iehova i te mea atâta no te totaiete, e ohipa râ ratou no te maitai o te mau taata atoa ma te mafatu tia. ‘E ineine noa’ te mau Ite no Iehova ‘i te faatia ia ratou iho i mua i te taata atoa e ani mai ia ratou i te tiaturiraa i roto ia ratou ra, ma te mǎrû râ e te auraro maite.’—Petero 1, 3:15.

[Nota i raro i te api]