Aita oia i faaea i te aro

I TE 5 no Atopa 1995, ua tâpûhia o Matt Tapio, 14 matahiti, no te hoê puu i nia i te uaua rahi i raro aˈe i to ˈna roro. E nehenehe taua puu ra e parare. O te matamua teie o te mau tâpûraa e rave rahi ta ˈna i faaruru i na matahiti e piti e te afa i muri mai. I muri iho, ua ravehia te rapaauraa chimiothérapie e te rapaauraa na roto i te hihi.

Te faaea ra o Matt i Michigan, mau Hau Amui no Marite, i reira oia e haere ai i te fare haapiiraa a te hau e i te mau putuputuraa Kerisetiano. Ua faaohipa oia i te mau tupuraa au no te tauaparau e te mau orometua haapii e te mau hoa haapiiraa no nia i to ˈna mau tiaturiraa e te haere-atoa-raa e farerei ia vetahi ê i roto i te taviniraa i mua i te taata. I to ˈna mau faaea-pinepine-raa i te fare maˈi—18 avaˈe o na matahiti hopea e piti e te afa o to ˈna oraraa to ˈna mau-noa-raa i te fare maˈi—ua vaiiho oia e mau hanere papai Bibilia na te feia atoa o ta ˈna i farerei i reira.

E rave rahi taime to Matt fatataraa i te pohe, tera râ i te mau taime atoa, ua maitai mai oia. I te hoê taime, i nia i te eˈa haere tia ˈtu i te fare maˈi, ua fifi-taue-hia ˈtura oia e ua mau atura to ˈna aho. Ua haamatahia ˈtura i te faahaere faahou i te aho e te mafatu, e ua oraora faahou mai nei oia. I to ˈna maitairaa mai, ua haamata ihora oia i te taˈi e ua parau ma te reo puai e: “E taata aro vau! E taata aro vau! Eita vau e mǎtaˈu haere noa!” Ua parau te taata e na te faaroo o Matt i te Atua e tapea ra ia ˈna ia ora maoro atu â.

Ua faatupu o Matt i te hoê hinaaro faufaa roa i te 13 no Tenuare 1996, i to ˈna bapetizoraahia ei taipe no to ˈna pûpûraa ia ˈna no te Atua ra o Iehova. Ua faatupuhia te bapetizoraa i roto i te hoê vahi hopuraa taa ê eiaha to ˈna mau tâpû ia haapê. Tau mahana noa i muri iho, ua hoˈi faahou ˈtura oia i te fare maˈi no te tahi atu â tâpûraa. I te avaˈe Atete 1997, ehia rahiraa hebedoma to Matt pihae-noa-raa, tera râ, ua maitai mai oia i muri aˈe i te tahi atu tâpûraa.

Noa ˈtu râ teie mau tupuraa atoa, ua tamau noa o Matt i te tapea i te hoê huru ataata maitai, te hautiraa e te mau taote e te feia utuutu maˈi. Aita ratou i taa noa ˈˈe no te aha e huru oaoa ataata faahiahia mau to ˈna. Ua parau te hoê o te mau taote ia ˈna e: “Matt, o vau aˈe oe, e hinaaro vau e tapiri te paruru haamaramarama, e tapoˈi i to ˈu upoo, e e parau i te taata atoa ia haere i rapaeau.”

I te avaˈe Febuare 1998, ua hoˈi atu o Matt i te fare mai te fare maˈi mai no te hoê o te mau taime hopea. Ua oaoa roa oia te ora noa râ oia e tei fare oia e i te taime iho a tomo ai oia na te pae uputa, ua parau oia e: “Ua oaoa roa vau! E pure anaˈe.” I muri iho, ua faaite atu oia i to ˈna oaoa ia Iehova na roto i te pure. E piti avaˈe i muri iho, i te 19 no Eperera, ua pohe aˈera oia i te mariri ai taata.

Na mua ˈtu, ua faataˈihia te hoê uiuiraa manaˈo e o Matt i haruharuhia i te hoê putuputuraa a te mau Ite no Iehova i te Piha no te Basileia no taua vahi ra. Ua anihia ˈtu oia e: “Eaha ta oe e hinaaro e parau i te feia i rotopu ia matou o tei oraora maitai i te pae tino no nia i te taviniraa e te mau putuputuraa Kerisetiano?”

Ua pahono atura o Matt e: “A rave i tei maraa ia outou i teie nei . . . Aita roa ˈtu outou i ite eaha te ohipa e tupu mai . . . Teie râ, noa ˈtu e eaha te ohipa e tupu mai, eiaha roa ˈtu e faaea i te poro no nia ia Iehova.”